1 Ambuje ŵasalile che Nuhu, "Njinjile mu safina mmwe pamo ni ŵandu ŵa pannango penu, pakuŵa nammweni kuti mmwe jikape ni junkuunonyelesya une, pasikati ja ŵandu wose ŵa uŵelesi wu. 2 Mu inyama yaili yambone paujo pangu, njigale inyama sabasaba nkambaku ni nkolo, ni mu inyama yangaŵa yambone paujo pangu, njigale iŵili iŵili nkambaku ni nkolo. 3 Ni sooni njigale ijuni ya mwinani sabasaba nkambaku ni nkolo, nnyigose kuti ijendelechele kupagwa aina zote pa chilambo. 4 Pakuŵa pakumala moŵa saba, chinajilechelele ula pa chilambo jinye moŵa alobaini muusi ni chilo, ni chinaijonanje tikitiki yepanganyikwe yose inaigumbile yaili pachanya lisi." 5 Che Nuhu ŵatesile chilichose mpela iŵatite pa kulajiswa ni Ambuje.

6 Che Nuhu ŵaliji ni yaka mia sita katema pichatyochele chikumba meesi chachikulungwa pa chilambo. 7 Che Nuhu ni ŵankwawo ni achiŵanagwe ni achiŵankwawo ŵajinjile mu safina kuchiŵambala chikumba meesi chachikulungwa. 8 Inyama yaili yambone paujo pa Akunnungu ni inyama yangaŵa yambone paujo pa Akunnungu ni ijuni ni yepanganyikwe yaikukwaŵa, 9 iŵili iŵili nkambaku ni nkolo, ŵajinjile mu safina pamo ni che Nuhu mpela ila che Nuhu iŵatite pakulajiswa ni Akunnungu. 10 Pakumala moŵa saba, meesi ga chikumba meesi chekulungwa gatandite kuchiunichila chilambo.

11 Che Nuhu paŵaliji ni yaka mia sita, pa lyuŵa lya kumi na saba lya mwesi wa ŵili, lyele lyuŵa lyo uliŵa wose wa mwakusokolesya wajilime meesi mu chilambo ni kwinani kwaugwiche mpela madilisha. 12 Nipele ula janyele moŵa alobaini muusi ni chilo. 13 Lyuŵa lilyolyo che Nuhu ŵajinjile mu safina ni ŵankwawo pamo ni achiŵanagwe ŵatatu ŵachilume, che Shemu ni che Hamu ni che Yafeti pamo ni achiŵankwawo. 14 Ŵajinjile mu safina pamo ni inyama ya mmatinji ya uŵeleuŵele ni yakulangwa ya uŵeleuŵele ni yaikukwaŵa ya uŵeleuŵele ni ijuni ya uŵeleuŵele. 15 Yajinjile mu safina muŵaliji che Nuhu yepanganyikwe yaili ni umi yose iŵili iŵili. 16 Inyama yose yajinjile nkambaku ni likolo mpela Akunnungu iŵatite pakwalajisya che Nuhu. Nipele Ambuje ŵammugalile che Nuhu.

17 Chikumba meesi chekulungwa chalonjele moŵa alobaini. Meesi gagumbele ni kujijajaŵasya safina, nombejo jaliji pachanya meesi. 18 Meesi gapundile koonjecheka mchilambo ni safina jajajaŵele pachanya meesi. 19 Meesi gagumbele nnope pachilambo ni kugaunichila matumbi geleu gose gagali paasi kwinani. 20 Meesi gagumbele nnope mpaka kugaunichila matumbi mpela mita saba. 21 Yepanganyikwe yejumi yose yaili pachilambo yawile: Ijuni ni inyama yakulangwa ni inyama ya mmatinji ni yepanganyikwe yaikwenda pa litaka ni ŵandu, yose yawile. 22 Chepanganyikwe chilichose chachili pa litaka chachikupuumulila mumbula chawile. 23 Akunnungu ŵaijonasile yepanganyikwe yaili ni umi yose ya pachilambo, kutandilila ŵandu ni inyama ni yaikukwaŵa ni ijuni ya mwinani. Yose pachilambo yajonasikwe tipitipi. Che Nuhu pe ni juŵasigele pamo uŵaliji nawo mu safina wala. 24 Gele meesi gasigele pachilambo moŵa mia moja na hansini.