1 Yele ni iyatite pakutindimika kugumbikwa kwinani ni chilambo, pamo ni indu yose yaili mwelemo. 2 Pa lyuŵa lya saba Akunnungu ŵamalisisye masengo gao gose gaŵapanganyaga; Nipele pa lyuwa lya saba ŵapumulile kupanganya masengo gao gose gaŵapanganyaga. 3 Akunnungu ŵalipele upile lyuŵa lya saba ni kuliŵika pajika kuti liwe lyeswela, pakuŵa pa lyuŵa lyo Akunnungu ŵapumulile pa masengo gao gose ga kugumba.

4 Yele ni yaitite pakugumbikwa kwinani ni chilambo, pa lyuŵa liŵagumbile Akunnungu kwinani ni chilambo. 5 Nganijipagwa mimela pa chilambo atamuno itela pakuŵa Ambuje Akunnungu nganaatenda jinye ula pa chilambo ni nganaapagwa mundu jwakulima, 6 nambo chinyesi chakwesile ni kuchinyoya chilambo chose. 7 Nipele Ambuje Akunnungu ŵangumbile jwannume kwa litaka, ni ŵampepele mmbula mbumu ja umi nipele mundu jula jwaliji jwanjumi.

8 Nipele Ambuje Akunnungu ŵaupanganyisye ngunda wa mwana kungopochelo lyuŵa ku Edeni ko ni kumelesya mimela, ni ŵambisile ajula mundu juŵangumbile. 9 Mwelemo Ambuje Akunnungu ŵaimesisye itela yaikusalalila ya kila uwele, yaikusogola isogosi yaikufai kuligwa. Pasikati ngunda wo kwaliji ni chitela cha umi ni chitela chachikwatendekasya ŵandu aumanyilile umbone ni ungalimate.

10 Kwaliji ni lusulo lulwajilimaga meesi mu ngunda wa mwana wa Edeni, ni kutyochela pelepo lusulo lo lwagaŵanyiche sulo ncheche. 11 Liina lya lusulo lwa ndanda lili Pishoni, nombelo lwasyungwile chilambo chose cha ku Hawila, kwele ni kwasili sahabu. 12 Sahabu ja chele chilambo cho jili jambone. Sooni kwana mauta ga kununjila ni maganga ga ndalama jajikulungwa. 13 Liina lya lusulo lwa ŵili lili Gihoni, lwelelu lwasyungwile chilambo chose cha Kushi. 14 Ni liina lya lusulo lwa tatu lili Tigilisi, lwele lukuilimya meesi kungopochelo lyuŵa kwa chilambo cha ku Ashulu. Ni liina lya lusulo lwa ncheche lili Efulati.

15 Nipele Ambuje Akunnungu ŵanjigele jwannume jo ni kummika mu ngunda wa mwana wa Edeni aulime ni kuugosa. 16 Ambuje Akunnungu ŵansalile jwannume jo, "Nkukombola kulya isogosi ya chitela chilichose chachili mu ngunda wa mwana wu, 17 nambo nkalya isogosi ya chitela chachikwatendekasya ŵandu aumanyilile umbone ni ungalimate, pakuŵa lyuŵa lichinchilya isogosi ya chele chitela cho, isyene chimmwe."

18 Nipele Ambuje Akunnungu ŵatite, "Ngaŵa yambone jwannume ju atame jika. Chinampanganyichisye mundu, juchalandane nao." 19 Nipele Ambuje Akunnungu ŵajigele litaka mu lisi ŵapanganyisye inyama yose ya mmatinji kutyochela mu litaka lyo ni ijuni yose ya mwinani. Sooni ŵannyichisye jwannume jo kuti alole chiŵape meena chi, ni meena gaŵapele galiji ni meena gao. 20 Che Adamu ŵaipele meena inyama yose ya kulangwa ni ya mmatinji ni ijuni yose ya mwinani. Nambo mwa wose wo nganawoneka jwakulandana ni che Adamu.

21 Nipele Ambuje Akunnungu ŵangoneche lugono lwakutopela che Adamu jula. Ni paŵagonile, Akunnungu ŵalujigele luŵalati lwa che Adamu ni kupaunichila kwa nnou. 22 Nipele Ambuje Akunnungu ŵangumbile jwankongwe kwa luŵalati lula ni ŵampeleche kwa che Adamu. 23 Ni che Adamu ŵatite,

"Sambano aju ali liupa kutyochela mmaupa gangu,

ni nnou kutyochela mu nnou wangu.

Nombejo chaŵilanjikwe jwankongwe,

pakuŵa atyochele mu jwannume."

24 Kwaligongo lyo jwannume chiŵaaleche atati ŵao ni achikulu ŵao ni kulumbikana ni ŵankwawo, nombe ŵaŵili wo akuŵa chiilu chimo.

25 Che Adamu ni ŵankwawo, wose ŵaŵili ŵaliji matakope, nambo nganakola soni.