1 Nipele Akunnungu ŵaakumbuchile che Nuhu ni inyama yose ya mmatinji ni yakulangwa iyaliji pamo nawo mu safina. Nipele, Akunnungu ŵaichenajo mbungo pachilambo ni meesi gatandite kuumilila. 2 Uliŵa wa meesi wa mwakusokolesya ni madilisha ga kwinani yaugalikwe ni ula jalesile kunya, 3 ni meesi gajendelechele kuumilila mbolembole pachilambo. Nipele pagapite moŵa mia moja na hansini, meesi gapungwiche nnope. 4 Pa lyuwa lya kumi na saba lya mwesi wa saba Safina jatusile mmatumbi ga Alalati. 5 Meesi gajendelechele kuumilila mbolembole ni lyuŵa lyaandanda lya mwesi wa kumi, songa sya matumbi syaoneche.

6 Pagamasile moŵa alobaini, che Nuhu ŵaugwile lidilisha liŵakolosisye mu safina, 7 ni ŵalikopwesye likunguulu paasa, nombelyo nganiliuja nambo lyagulwichegulwiche ako ni ako mpaka pagajumwile meesi pachilambo. 8 Nipele che Nuhu ŵajikopwesye nguunda kuti alole iŵaga meesi galiji gajumilile pachilambo. 9 Nambo pakuŵa meesi galiji gagumbele pa chilambo pose, nguunda jila jalepele kutula, jausile ku che Nuhu mu safina. Che Nuhu ŵagolwesye nkono, ŵajijigele ni kujijinjisya mu safina. 10 Che Nuhu ŵalindilile moŵa gane saba ni kujituma ngunda kaaŵili. 11 Jele ngunda jo jausile ku che Nuhu katema ka ligulo jili jijigele lisamba lyeŵisi lya mseituni mu lugomo. Kwayele che Nuhu ŵaimanyilile kuti meesi gapuungwiche pa chilambo. 12 Nipele che Nuhu ŵalindilile moŵa gane saba, ŵajitumile sooni ngunda jila nambo ngunda jila nganijiuja sooni.

13 Che Nuhu paŵaliji ni yaka mia sita ni umo, pa lyuŵa lyaandanda lya mwesi waandanda, meesi gajumwile pachilambo. Che Nuhu ŵachityosisye chipagala cha safina ni paŵalolite, ŵaiweni kuti chilambo chejumule. 14 Pa lyuŵa lya ishilini na saba lya mwesi waaŵili, chilambo chajumwile.

15 Nipele, Akunnungu ŵansalile che Nuhu, 16 "Nkopoche mu safina, mwe ni ŵankweni, ni ŵanagwenu pamo ni achiŵankwawo. 17 Nnyikoposye yepanganyikwe yose ya uŵeleuŵele yaili pamo ni mmwe: Ijuni yose ni inyama yose ni yepanganyikwe yose yaikukwaŵa, kuti iŵelekane nnope, ijonjesyeche ni kuchigumbasya chilambo." 18 Nipele, che Nuhu ŵakopweche mu safina ni ŵankwawo ni achiŵanagwe pamo ni achiŵankwawo. 19 Inyama yose ni yepanganyikwe yaikukwaŵa yose ni ijuni yose yakopweche mu safina mpela iyatite kwinjila.

20 Nipele che Nuhu ŵaataŵile Ambuje chilisa, ŵajigele jumo jumo mwa inyama ni ijuni yaili yambone paujo pa Akunnungu ni kwapelechela Akunnungu mbopesi ja kutinisya pa chilisa. 21 Ambuje ŵanusisye ununjile wambone wa mbopesi jo ni kunonyelwa najo, Ambuje ŵalisalile, "Nganguchilwesya sooni ng'oo chilambo kwaligongo lya aila yakuitendekanya ŵandu, nguimanyilila kuti ng'anisyo syao sili syangalimate chitandile kuuwanache wao. Atamuno ngunajonanga sooni yepanganyikwe yose yejumi mpela inatite kupanganya. 22 Mpela ichikuti kulonjela chilambo, chikapagwe katema kakupanda ni katema kakugungula ni katema kamalili ni katema kantukuta ni katema kachuuku ni katema ka chau ni katema ka muusi ni chilo, ngaimala."