1 Ŵeleŵa ali iŵelesi i che Esau, yaani che Edomu. 2 Che Esau ŵalombele achakongwe wa Chikanaani: Che Ada mwali ju che Eloni Mhiti, Oholibama mwali ju che Anah, juŵaliji chisukulu chachikongwe chi che Sibeoni Mhifi, 3 ni che Basemati mwali ju che Ishumaeli, nnumbugwe che Nebayoti. 4 Che Ada ŵaaŵelechele che Esau Elifasi nombe che Basemati ŵaaŵelechele che Leueli, 5 nombe che oholibama ŵaaŵelechele che Yeushi, ni che Yalamu ni che Kola. Ŵelewo ni ŵanache ŵachilume wa che Esau ŵaŵapagwile paŵatamaga ku Kanaani.

6 Nipele che Esau ŵaajigele achiŵankwakwe ni ŵanache achalume ni achakongwe ni ŵandu ŵa pannango ŵakwe, ni ilango yakwe ni indu iŵapatile ku Kanaani, ni kusamila kwiine kwa kutalichila ni mpwakwe che Yakubu. 7 Ŵatesile yeleyo pakuŵa ŵaliji ni indu yejinji kwati nganakombola kutama pamo sooni ligongo, ni ligongo ŵakwete ilango yejinji, kwayele chilambo chiŵatamaga chila nti achalendo nganichakwana. 8 Kwayele che Esau, yaani Edomu, ŵapite kutama ku Seili chilambo cha matumbi.

9 Ŵeleŵa ali iŵelesi i che Esau, atati ŵa Ŵaedomu, ku Seili chilambo cha matumbi. 10 Ŵanache achalume ŵa che Esau ŵaŵapagwile ni che Ada ŵankwakwe ni che Leuheli uŵapagwile ni che Basemati ŵankwawo ŵaane. 11 Ŵanache ŵa che Elifasi nsano; meena gao galiji che Temali ni che Omali ni che Sefo ni che Gatamu ni che Kenasi. 12 Che Elifasi ŵaliji ni kapolo mwali, liina lyakwe che Timina juŵammelechele mwanache liina lyao che Amaleki. Ŵeleŵa ali isukulu i che Ada wankwakwe che Esau. 13 Che Basemeti ŵankwakwe che Esau, ŵammeleche che Leueli.

Ŵanache ŵa che Leueli ali, che Nahati ni che Sela ni che Shama ni che Misa. Ŵelewo ali isukulu i che Basemati ŵankwakwe che Esau.

14 Che Oholibama ŵankwakwe che Esau mwali ju che Anah, mwali ju che Sibeoni, ŵammelechele ŵankwakwe ŵanache achalume ŵatatu, yaani che Yeushi ni che Yalamu ni che Kola.

15 Ŵeleŵa ali achakulu ŵa ngosyo sya iŵelesi i che Esau. Che Elifasi mwanache jwakwitiwo ju che Esau ŵaaŵeleche che Temani ni che Omali ni che Sefo pamo ni che Kenasi, 16 che Kola ni che Gatamu ni che Amaleki. Ŵelewo ni uŵaliji achakulu ŵa ŵandu uŵapagwile ni che Elifasi ku Edomu, aŵaŵa ali isukulu yachilume i che Ada.

17 Che Leueli mwanagwe che Esau ŵaaŵeleche che Nahati ni che Sela ni che Shama ni che Misa. Ŵelewo ali achakulu ŵa ngosyo sya iŵelesi i che Leueli ŵaŵatamaga ku Edomu. 18 Asi sili ngosyo sya paulongo u che Esau ni ŵankwakwe che Oholibama, mwali ju che Anah; che Yeushi ni che Yalamu ni che Kola. Kila mundu ŵaliji jwankulu jwa lukosyo lwakwe. 19 Ngosyo syose si sityochele mu iŵelesi i che Esau, nombewo ŵaliji achakulu ŵa ngosyo syawo.

20 Awuwu uli uŵelesi u che Seili Mholi, uŵatamaga mu chilambo chila; che Lotani ni che Shobali ni che Sibeoni ni che Anah, 21 ni che Dishoni ni che Eseli ni che Dishani. Ŵele ŵaliji achachekulu ŵa ngosyo. Mipingo jose jaŵilanjikwe kwa mena ga achachekulu ŵao.

22 Ŵanache achalume ŵa che Lotani ŵaliji che Holi ni che Hemani ni alumbu ŵao che Lotani liina lyao che Timina.

23 Ŵanache achalume ŵa che shobali ŵaliji che Alufani ni che Manahati ni che Ebali ni che Shefo ni che Onamu.

24 Ŵanache ŵa che Sibeoni ŵaliji che Aiya ni che Anah. Che Anah ni uŵaiŵeni iliŵa ya meesi ga mooto kwipululu, paŵaliji aninkuchinga mbunda sya atatigwe jwakuŵilanjikwa che Sibeoni. 25 Che Anah ŵakwete ŵanache ŵaŵili, jwannume liina lyakwe che Dishoni ni jwankongwe liina lyao che Oholibama. 26 Ŵanache achalume ŵa che Dishoni ali che Hemidani ni che Eshibani ni che Itilani ni che Kelani.

27 Ŵanache achalume ŵa che Eseli ŵaliji, che Bilihani ni che Saawani ni che Akani.

28 Ŵanache achalume ŵa che Dishani ŵaliji che Usi ni che Alani. 29 Ŵeleŵa ali achakulu ŵa Ŵaholi; che Lotani ni che Shobali ni che Sibeoni ni che Anah ni che Dishoni ni che Eseli pamo ni che Dishani. 30 Ŵelewo ŵaliji achakulu wa ngosyo sya Ŵaholi ku Seili chilambo cha matumbi.

31 Ŵanyaŵa ni mamwenye ŵaŵatawele ku Edomu akanaŵe mwenye jwajulijose kwatawala Ŵaisilaeli. 32 Che Bela mwanache jwannume ju che Beoli ŵaliji mwenye jwa ku Edomu. Liina lya musi wakwe lyaliji Dinihaba. 33 Che Bela paŵajasiche, che Yobabu mwanache jwao che Sela juŵatyochele ku Bosila ŵakamwile umwenye. 34 Ni che Yobabu nombe ŵajasiche ni che Hushamu jwa ku Temani ŵaliji mwenye. 35 Che Hushamu paŵajasiche, che Hadadi mwanache ju che Bedadi ŵakamwile umwenye. Che Hadadi paŵamenyene ngondo ni Ŵamidiani ŵapundile, mu chilambo cha Moabu kwati musi wakwe wekulu ŵaliji Aviti. 36 Nipele che Hadadi ŵajasiche, ni che Samila kutyochela ku Masileka, ŵakamwile umwenye. 37 Che Samila paŵajasiche, che Shauli kutyochela ku Lehoboti, wauli chiŵandi ni lusulo lwa Euflate, jwakamulile umwenye. 38 Nombe paŵajasiche che Shauli, che Baal Hanani mwanache ju che Akiboli jwakamulile umwenye. 39 Che Baal Hanani mwanache ju che Akiboli paŵajasiche, che Hadadi jwakamulile umwenye. Chilambo chakwe chaŵilanjikwe Pau, ni ŵankwakwe ŵaliji che Mehetabeli mwali ju che Matiledi, juŵaliji chisukulu chi che Mesahabu.

40 Achakulu ŵa ngosyo syasityochele ni uŵelesi u che Esau, ni kumanyika malinga ni ngosyo syao ni matame gao galiji, Timina ni Alifa ni Yeteti, 41 che Aholibama ni che Ela ni che Pinoni, 42 che Kenasi ni che temeni ni che Mibisali, 43 che Magidieli ni che Ilamu. Ŵele ni uŵaliji achakulu ŵa ngosyo sya Edomu malinga ni matame gao mu chilambo chiŵatamaga.