1 Che Ablamu paŵaliji ni yaka tisini ni tisa, Ambuje ŵaakopochele ni kwasalila, "Une ndili Akunnungu Jwamachili. Mumbikanile ni kutenda yaili yambone moŵa gose. 2 None chimiche lilangano nomwe ni chinampe uŵelesi wangaŵalanjikwa." 3 Che Iblamu ŵakoteme mpaka paasi. Nombe Akunnungu ŵaasalile, 4 "Nguŵika lilangano li ni mmwe: Chimme atati ŵa ilambo yejinji. 5 Kutandilila sambano, ngammilanjikwa sooni che Iblamu nambo chimmilanjikwe che Ibulahimu, pakuŵa nantesile kuŵa atati ŵa ilambo yejinji. 6 Chinampe uŵelesi wejinji nnope, kutyochela kwa mmwe chaakopochele ŵandu ŵa ilambo yejinji ni ŵane mwa ŵelewo chaŵe mamwenye.

7 "Ngulilimbisya Lilangano lyangu pasikati jangu une ni mmwe, ni uŵelesi wenu ni iŵelesi yao yose moŵa gose pangali mbesi. Chime Akunnungu jwenu ni chime Akunnungu jwa uŵelesi wenu. 8 None chinampe mmwe ni uŵelesi wenu achi chilambo chinkutama mpela achalendo. Chilambo chose cha Kanaani chichiŵe cha uŵelesi wenu moŵa gose pangali mbesi ni une chime Akunnungu jwao."

9 Nipele Akunnungu ŵaasalile che Ibulahimu, "Ni mmwe iyoyo, nlikamule lilangano lyangu, mmwe mwasyene ni uŵelesi wenu ni iŵelesi yao yaikwika yose. 10 Ali lili lilangano lyangu pasikati jangu une ni mmwe pamo ni iŵelesi yenu lichinjendelechele kulikamulisya, jwannume jwalijose pasikati jenu aumbale. 11 Chimbumbale, chele ni chichiŵe chimanyisyo cha lilangano pasikati jangu ni ŵanyamwe. 12 Kila mwanache jwannume jwa moŵa nane pakumala kupagwa mwa ŵanyamwe aumbale. Kila jwannume jwa mu uŵelesi wenu, pamo ni kapolo jwapagwile mu nyuumba jenu pane kapolo jwasumikwe kutyochela kwa achalendo aumbale. 13 Elo kila mwanache jwannume jwapagwile mu nyuumba jenu atamuno jwasumikwe kwa mbiya syenu aumbale. Chelechi chichiŵe chimanyisyo mu ilu yenu cha lilangano lyangu lya moŵa gose pangali mbesi. 14 Jwannume jwalijose jwangaumbala chatyosyekwe pasikati ja ŵandu, pakuŵa nganakamulisya lilangano lyangu."

15 Nipele Akunnungu ŵaasalile che Ibulahimu, "Yankati ŵankwenu, ngamwaŵilanga soni che Salai, nambo liina lyao chiliŵe che Sala. 16 Chinaape upile, nombe chachimmelechela mwanache jwannume. Kusyene chinaape upile che Sala, nombejo chaŵe achikulu jwa ilambo yejinji ni mamwenye chatyochele mu uŵelesi wao."

17 Pelepo che Ibulahimu ŵakoteme mpaka paasi ni kuseka chikatikati achilisalilaga, "Ana chikomboleche chinauli kwa mundu jwa yaka lichila kola mwanache? Ni uli che Sala jwa yaka tisini ikomboleka kola mwanache?" 18 Nipele che Ibulahimu ŵaasalile Akunnungu, "Ikaliji mmbaya che Ishumaeli akaatemi mu upile wenu!"

19 Nambo Akunnungu ŵajanjile, "Ngwamba, ŵankwenu che Sala chammelechele mwanache jwannume, nomwe chimummilanje liina lyakwe che Isaka. None chimiche lilangano lyangu ni jwelejo liŵeje lya moŵa gose pangali mbesi kwa uŵelesi wao waukwika. 20 Mbilikene intite kuŵenda nkati che Ishumaeli. Kusyene chinaape upile ni chinaape ŵanache ŵajinji ni uŵelesi wejinji. Che Ishumaeli chaŵe atati jwa ŵakutawala kumi ni mbili, ni chinaatende aŵe atati ŵa chilambo chachikulungwa. 21 Nambo lilangano lyangu nguliŵika ni mwanagwenu che Isaka juchammelechele che Sala, katema mpela akano pa chaka chachikwika." 22 Akunnungu paŵamasile kuŵecheta ni che Ibulahimu, ŵannesile ni kwaula kwinani.

23 Pa lyuwa lilyolyo che Ibulahimu ŵammumbesye che Ishumaeli mwanagwe, iyoyo ŵaaumbesye achikapolo ŵao wose ŵaŵapagwile mu nyuumba jao ni achikapolo ŵaŵaasumile kwa mbiya syao, mpela Akunnungu iŵatite pakwalajisya. 24 Che Ibulahimu ŵaumbele ali ni yaka tisini ni tisa. 25 Ni che Ishumaeli mwanagwe ŵaumbele ali ni yaka kumi ni tatu. 26 Che Ibulahimu ŵaumbele pa lyuŵa limo ni che Ishumaeli mwanagwe, 27 pamo ni achalume wose ŵa munyuumba jao ni achikapolo wose ŵaŵapagwile mu nyuumba jao ni achikapolo wose ŵaŵaasumile kwa mbiya syao.