1 Katema ko ŵandu wose ŵa pachilambo ŵaŵechete chiŵecheto chimo, ni maloŵe gao galandene. 2 Nipele, paŵasamagasamaga ŵandu kutyoka kungopochelo lyuŵa, ŵaiche pachilambo chachili ni lutando cha ku Shinali ni kutama kweleko. 3 Ŵaŵechetesyene achinsyene achitiji, "Ayaga! Tugumbe matofali, tugachome galimbangane." Ŵataŵile kwa matofali pamalo pa maganga ni lami pamalo pa chokaa. 4 Ŵatite, "Ayaga, tutaŵe musi ni tutaŵe lusonga lwati kumbesi kwakwe kuiche kwinani, pakuti tukole liina, tukaika kupwilingana pachilambo chose."

5 Nipele Ambuje ŵatulwiche paasi kukulola wele musi ni lusonga lwalukutaŵikwa ni ŵandu. 6 Ambuje ŵatite, "Nnole, ŵandu ŵa aŵele ŵandu ŵa chilambo chimo ni chiwecheto chimo, ni gelega gali ndande ja agala gakusaka kupanganya. Sambano ngaikomboleka kwasiŵila kuchitendekanya chilichose chakusaka kuchipanganya. 7 Ayaga, tutuluche paasi ni kwatindiganya chiŵecheto chao anakombole kwilana." 8 Nipele Ambuje ŵaapwilingenye ŵandu kutyochela pepala ajaule palipose mu chilambo pose, nombewo ŵalesile kutaŵa musi ula. 9 Musi ula waŵilanjikwe Babeli ligongo kweleko Ambuje ni kuŵatindigenye chiŵecheto cha chilambo chose, ni kutyochela pelepo Ambuje ŵaapwilingenye ŵandu ajaule mu chilambo chose.

10 Ayiyi ni iŵelesi i che Shemu. Yaka iŵili pachamasile chikumba meesi, che Shemu ŵaliji ni yaka mia moja, ni ŵammeleche che Alifakisadi. 11 Che Shemu paŵammeleche che Alifakisadi, che Sela ŵatemi yaka ine mia tano, ni ŵakwete sooni ŵanache ŵane ŵachilume ni ŵachikongwe.

12 Che Alifakisadi paŵaliji ni yaka selasini na tano, ŵammeleche che Sela. 13 Che Alifakisadi paŵammeleche che Sela, che Alifakisadi ŵatemi yaka ine mia nne ni itatu, ni ŵakwete ŵanache ŵane ŵachilume ni ŵachikongwe.

14 Che Sela paŵaliji ni yaka selasini, ŵammeleche che Ebeli. 15 Che Sela paŵammeleche che Ebeli, che Sela ŵatemi yaka mia nne ni itatu, ni ŵakwete ŵanache ŵane ŵachilume ni ŵachikongwe.

16 Che Ebeli paŵaliji ni yaka selasini na nne, ŵammeleche che Pelegi. 17 Che Ebeli paŵammeleche che Pelegi, che Ebeli ŵatemi yaka mia nne na selasini, ni ŵakwete ŵanache ŵane ŵachilume ni ŵachikongwe.

18 Che Pelegi paŵaliji ni yaka selasini, ŵammeleche che Leu. 19 Che Pelegi paŵammeleche che Leu, che Pelegi ŵatemi yaka mia mbili na tisa, ni ŵakwete ŵanache ŵane ŵachilume ni ŵachikongwe.

20 Che Leu paŵaliji ni yaka selasini na mbili, ŵammeleche che Selugi. 21 Che Leu paŵammeleche che Selugi, che Leu ŵatemi yaka mia mbili na saba, ni ŵakwete ŵanache ŵane ŵachilume ni ŵachikongwe.

22 Che Selugi paŵaliji ni yaka selasini, ŵammeleche che Naholi. 23 Che Selugi paŵammeleche che Naholi, che Selugi ŵatemi yaka mia mbili, ni ŵakwete ŵanache ŵane ŵachilume ni ŵachikongwe.

24 Che Naholi paŵaliji ni yaka ishilini na tisa, ŵammeleche che Tela. 25 Che Naholi paŵammeleche che Tela, che Naholi ŵatemi yaka mia moja na kumi na tisa, ni ŵakwete ŵanache ŵane ŵachilume ni ŵachikongwe.

26 Che Tela paŵaliji ni yaka sabini, ŵaaŵeleche che Iblamu ni che Naholi ni che Halani.

27 Ayiyi ni iŵelesi i che Tela, atati ŵao che Iblamu ni che Naholi ni che Halani. Che Halani ŵammeleche che Lutu. 28 Che Halani ŵawilile ku Ulu, chilambo cha Ŵakalidayo kuŵapagwile katema che Tela atatigwe ali nkutama mu musi wo. 29 Che Iblamu ni che Naholi ŵalombele. Ŵankwawo che Iblamu ŵaŵilanjikwe che Salai, ni ŵankwawo che Naholi ŵaŵilanjikwe che Milika mwali ju che Halani. Che Halani ali atati ŵa che Milika ni che Isika. 30 Che Salai nganakola ŵanache ligongo ŵaliji ngaakuŵeleka.

31 Che Tela ŵaajigele che Iblamu mwanagwe pamo ni che Lutu chisukulu chao, mwanache ju che Halani, ni che Salai akwegwao, ŵankwakwe che Iblamu, wose ŵatyosile musi wa ku Ulu chilambo cha Ŵakalidayo ni kwaula ku Kanaani. Nambo paŵaiche ku Halani, ŵatemi pelepo. 32 Yaka yose iŵatemi che Tela yaliji yaka mia mbili na tano ni ŵawilile akula ku Halani.