1 Katema ŵandu paŵajonjesyeche pa chilambo ni kwaŵeleka ŵanache ŵachikongwe, 2 ŵana ŵa Akunnungu ŵane ŵaweni achiŵali ŵa ŵandu ali ŵakusalala, ŵaajigele ŵaŵaasachile ni kuŵa achiŵankwawo. 3 Nipele Ambuje Akunungu ŵatite, "Mbumu jangu ngajitama mwa ŵandu moŵa gose pangali mbesi, pakuŵa ŵanyaŵa ali ŵa kuwa pe. Sambano ngaatama kupunda yaka mia moja na ishilini." 4 Mu gele moŵa go ni kanyuma kakwe, paliji ni mikammandu pa chilambo yayapagwile ni achiŵali ŵa ŵandu ŵaŵajigalikwe ni ŵana ŵa Akunnungu. Mikammandu yo yaliji ni machili ni yaliji nkumanyika mmoŵa go kwa kuputana ngondo, ni yaŵilanjikwe Ŵanefili.

5 Ambuje ŵaiweni kuti ŵandu akupanganya yachigongomalo kwannope pa chilambo, ni yose yakuiganisya mmitima jao ili yachigongomalo moŵa gose. 6 Ambuje ŵasongoneche nnope kwa kungumba mundu pa chilambo, ni yaapoteche nnope mu ntima. 7 Nipele Ambuje ŵatite, "Chinaaulaje ŵandu unaagumbile pa chilambo, iyoyopeyo chinaiulaje inyama ya mmatinji, ni yaikukwaŵa ni ijuni ya mwinani. Ngusongoneka pakuŵa naagumbile pa chilambo." 8 Nambo che Nuhu ŵakundikwe paujo pa Akunnungu.

9 Aji ni ngani ji che Nuhu ni uŵelesi wakwe. Che Nuhu ŵaliji mundu jwambone paujo pa Akunnungu, ni sooni nganalalatilwa ni ŵandu ŵa katema ko. Ŵatemi kwakukulupilichika paujo Akunnungu. 10 Che Nuhu ŵakwete ŵanache ŵatatu ŵachilume, che Shemu ni che Hamu ni che Yafeti. 11 Akunnungu ŵachiweni chilambo chijonasiche ni gumbala utindiganyo. 12 Akunnungu ŵachilolite chilambo, ŵachiweni kuti chijonasiche, pakuŵa mundu jwalijose ŵakuiye litala lyakwe lyangalumbana.

13 Nipele Akunnungu ŵaasalile che Nuhu, "Amwiwe kwaulaga ŵandu wose pachilambo, pakuŵa ŵandu wo augumbesye utindiganyo pa chilambo pose. Ngusala isyene, chinaajonanje ŵandu wose pamo ni chilambo chose. 14 Kwayele nlikolochesye ngalaŵa jekulungwa kwa chitela chakulimba, njiŵilanje safina. Nkatanye yuumba ni kupaka lami nkati ni pasa. 15 Nkolosye yelei, uleu mita mia moja selasini na tano, ni wipi wakwe mita ishilini na mbili ni lisusa lyakwe mita kumi na nne. 16 Safina jo jiŵe ni golofa sitatu ni mmiche nnango chamumbalati. Nwimbe chipagala, nipele nneche lipesa lya nusu mita sikati ja chipagala ni mwalikomele likumba lya golofa jaatatu. 17 Mpilikane! Chinyichenacho chikumba meesi pa chilambo ni kuchijonanga chilichose chachili ni umi chachili paasi kwinani. Chilichose chejumi cha pa chilambo chichiwe. 18 Nambo chindende lilangano ni mwe. Chinjinjile mu safina, mwe ni ŵankwenu ni ŵanache ŵenu ni achiŵankwawo. 19 Nomwe chinjinjisye mu safina yepanganyikwe yejumi ya uŵeleuŵele, iŵili iŵili likambaku ni likolo, aŵe ŵajumi pamo ni mmwe. 20 Chinjinjisye ijuni iŵili iŵili ya uŵeleuŵele nkambaku ni nkolo, ni inyama ya uŵeleuŵele nkambaku ni nkolo ni yepanganyikwe yaikukwaŵa yauŵeleuŵele nkambaku ni nkolo, aŵe ŵajumi pamo ni mmwe. 21 Nombe njigale yakulya ya uŵeleuŵele, nligosele kwaligongo lyenu ni kwaligongo lyao." 22 Che Nuhu ŵapangenye yose mpela iŵatite pakulajiswa ni Akunnungu.