1 Che Ibulahimu ŵatyosile ku Mamle ni kwaula ku lujenda ni kutama pasikati ja Kadeshi ni Shuli. Nipele ŵatemi kwa moŵa kanandi ku Gelali. 2 Paŵaliji kwele, che Ibulahimu ŵaasalile wandu kuti che Sala ali alumbu ŵao. Nipele, mwenye che Abimeleki jwa ku Gelali ŵanjigele che Sala. 3 Nambo chilo Akunnungu ŵankopochele che Abimeleki mu sagamisi ni kwasalila, "Mmwejo chimmwe pakuŵa jwankongwe jumunjigele ali jwankongwe jwa mundu."

4 Nambo che Abimeleki ŵaliji nganagone ni che Sala, kwayele ŵatite, "Ambuje, chimwaulaje ŵandu ŵanganaaleŵa? 5 Che Ibulahimu asyene ŵaasalile kuti che Sala ali alumbugwe, ni che Sala iyoyo ŵatite kuti che Ibulahimu ali achimwene jwao! Une natesile yelei kwa mtima wambone, uneji nganineŵa." 6 Nipele Akunnungu ŵansalile che Abimeleki mu sagamisi, "Elo, nguimanyilila kuti ntesile yelei kwa ntima wambone, noneji ni junankanyisye ngasimundendela sambi. Lyelelyo ni ligongo nannekasisye nkagona nawo. 7 Ni sambano mumpeleche jwankongwe jo kwa ŵankwakwe. Che Ibulahimu ali jwakulondola, nombejo champopelele ni mmwejo ngammwa. Nambo naga ngamwausya, ngunjamuka kusyene mmwe ni ŵandu ŵenu wose chimmwe."

8 Nipele, che Abimeleki ŵajimwiche kundaŵipe, ni ŵaŵilasile ŵakutumichila ŵao wose ni kwasalila yose yaiweni mu sagamisi. Ni ŵakutumichila ŵala ŵajogwepe kwannope. 9 Pele che Abimeleki ŵammilasile che Ibulahimu ni kwausya, "Ana ntutesile ichichi? Ana nantesile chichi mpaka muneŵasye kwanti yele une ni umwenye wangu? Chimuundesile ngaŵa chambone." 10 Nipele che Abimeleki ŵammusisye che Ibulahimu, "Ana kwachichi mundendekenye yeleyo?"

11 Che Ibulahimu ŵajanjile, "Natesile yele ligongo naiweni kuti pelepa ngapagwa mundu jwakwajogopa Akunnungu, kwayele akaamuleje kuti ŵajigale ŵankwangu. 12 Isyene, che Sala ali alumbwangu, ŵele ni une atati jwetu jumo nambo achikulu ŵetu ŵakulekangana, nipele naajigele aŵe ŵankwangu. 13 Akunnungu paŵandyosisye kumusi kwa atati ŵangu kuti nyaule ku chilambo chakutalika, nansalile che Sala, ‘Yelei ni ichinchilosya unonyelo wenu kukwangu, kulikose kuchitujaule mwasalile ŵandu kuti une ndili achimwene jwenu!’ "

14 Nipele che Abimeleki ŵammuchisye che Ibulahimu ŵankwakwe ŵala, ŵampele ni ngondolo ni ng'ombe ni achikapolo ŵachilume ni ŵachikongwe. 15 Che Abimeleki ŵansalile che Ibulahimu, "Nnole, chilambo chose chi chili changu! Nipele, nsagule palipose pinkusaka, ntame." 16 Nipele che Abimeleki ŵansalile che Sala, "Nnole, une ngumpa mpwenu ipande elufu moja ya madini ga feza kwalosya wose ŵaali pamo nomwe kuti nganinkola chileŵo, ni jwalijose akumanyilila kuti nganinkola chileŵo." 17 Nipele che Ibulahimu ŵapopele Akunnungu, ni Akunnungu ŵaalamisye che Abimeleki ni ŵankwawo ni achikapolo ŵakwe ŵachikongwe nombewo ŵakombwele kuŵeleka sooni, 18 pakuŵa kundanda ko Akunnungu ŵaatendekasisye ŵandu ŵa mu nyuumba ji che Abimeleki anaŵeleche kwaligongo lya che Sala ŵankwawo che Ibulahimu.