Akunnungu akwaŵilanga che Iblamu
1 Ambuje ŵaasalile che Iblamu, "Ntyoche mu chilambo chenu, mwaleche achalongo achinjenu ni ŵandu ŵaali mu nyuumba ja atati ŵenu, njaule ku chilambo kuchinannosye. 2 Chinantende mme chilambo chachikulungwa, ni kumpa upile ni kulitenda liina lyenu limanyiche, ni mmwe chimme upile.
3 Uchampe upile mmwe, none chinaape upile,
Nambo juchannwesye mmwe, none chinaalwesye.
Ni kutyochela kwenumwe ŵandu wose ŵa ilambo yose chapegwe upile."
4 Kwayele, che Iblamu ŵatyosile mpela iŵatite pakusalilwa ni Ambuje ni che Lutu ŵaliji pamo nawo. Che Iblamu ŵaliji ni yaka sabini na tano paŵatyosile ku Halani.