1 Ɩya-ɩya 20

Dafidi e di Raba wo koro

1 Ɛsʋn gɛnʋ̀n gɩɩya waanɩ gɛtɛ begyu bee ye bɛ san bɩtà fɔ, Yowabi e gyegeyelɛ ɛ tɛ bɩtà bʋʋ bɛtàlɛ fɔ gɛ bɛ ma muru Amon gɩfɩɩ. Gɛ bɛ ma sʋ Raba bɛ sa. Fɔ Dafidi ɛ wɔ ɛ sara Yerusalem. Yowabi ɛ tà Raba ditele bɩtà, gɛ e muru dɩ. 2 Gɛ Dafidi e tiri boogyu fɔ digyu-koto e ye wo duyu dii koro. Dikoto fɔ dɩɩdʋrʋ wʋ̀ ba bekilo dikpilin ma fwo-bɛnaa (34), gɛ bɛ ka ataa-kpara bɛ sa dɩ adawʋ. Gɛ bɛ ka dɩ be tin Dafidi duyu. Gɛ Dafidi e kpila anyan-kpara kpekpesi e ye ditele fɔ daanɩ. 3 Ɛwʋ gɛ ɛ ka bɛnɩ fɔ e ye ditele fɔ daanɩ, gɛ ɛ nyɩ bɛ ɛ sa gʋtʋn gɩɩ gɛmɛ gaanɩ. Bɛ ka sɔya, ma bɛkpakya, ma bɩlɛlɛ, ma akyɔɔ bɛ mɛ gʋtʋn. Gɛlɛ gɛ ɛ mɛ Amon bete baatele fɔ powu. Wʋʋ gama fɔ, Dafidi ma wɔ bɩtà bʋʋ bɛtàlɛ powu be biri bɛ da Yerusalem.

Dafidi e di Filisiti bete boo koro

4 Nyawʋ wʋʋ gama fɔ, akpa i biri i sere Isareli bete ma Filisiti bete boo getite, ɔkʋn gɛtɛ bee kpèlè Geseri fɔ. Waanɩ gɛ Husati-te Sibekayi e wolo Sipayi, gɛtɛ è di Refayim bete boodu waanɩ wʋʋnɩ ɛkɩ fɔ, gɛ be di Filisiti bete boo koro.

5 Wʋʋ gama fɔ, akpa-fon i ni sere ma Filisita bete, gɛ Yayiri wobi Elihanan e wolo Gati-te Goliyati wonobi Lahimi, gɛtɛ è de gɩsɩnta gɛtɛ giiyon wʋ̀ lɩ anlɛ oyon-lɔlɛ ayan fɔ.

6 Gɛlɛ ke gɛ akpa ɩkɩ i sere Gati ditele gɛtɛ ete garam ɛkɩ gɛtɛ wɔ gʋlɔ-kamasɛ gɩ̀ ba alobi kooron, gɛ wɔ gɩsɩrɩ-kamasɛ gɩ̀ ba bisiribi kooron. Okoro walobi ma wo bisiribi powu ɩ ma yela dikpilin ma anaa. Ɛwɔ mɔ e ye Rafa wodu waanɩ. 7 Gɛtɛ ɛ sa Isareli bete dɩkpàtà fɔ, Sama wobi Yonatan gɛtɛ è di Dafidi wokperebi fɔ e wolo ete garam fɔ.

8 Bɛnɩ-garam-garam besiyee nyabɛ bè di gɛ Rafa wodu wʋʋ bɛnɩ gɛtɛ be ye Gati fɔ. Dafidi ma wɔ bɩtà bʋʋ bɛtàlɛ be wolo bɛ.