Deuteronômio 22

1 Mose ɔɣere Israel mabi sɔ: Si anya fɔ ɔnyii nantsuĩrɛrɛ̃ ɣee sɛrɛrerɔ̃ sɛ ɔto ɔbo sikua ne, daabara sɔ aisu kuira i ne iso ɣɛɛ nyɔ sɔ amɔɛ̃ wũ akɛlɛgu sate. 2 Ɣɛɛ si kã sate si ɔdzoro ne ɣee aiɣe kã sate ne, iyɔ su kã kɛlɛgu i fɔ iyo gbɔgbɔɔgbɔ kã sate to ɔbie kã. Iyɔ su kã tã wũ. 3 Bara ngbɔ si anya fɔ ɔnyii ɔfirimu ɣee arapia ɣee ira mama nɛ ɔnyii sɛ ɔyura. Daasɛ̃ ne ibara.

4 Si anya fɔ ɔnyii ɔfirimu ɣee nantsuĩrɛrɛ̃ ɔrɔ̃ ɔrɛ i ɔri ne, daabara lɛ ainya. Buai sate si mitara bɔi miɣedza i ɔ̃ ngba iso.

5 Iikote sɔ ɔrɔ̃go aapia ɔrɛrɛ̃ arapia fiɛ ɔrɛrɛ̃ daapia ɔrɔ̃go arapia ana. Ala Bosate mi Ɣaa sɛ ɔtsiri ɔturi ɔrere wɔ nsɛ ɔbara nnɛgbe ɔso.

6 Si anya irodzayo i ɔri kuruɛ ɣee i kudziri ame ɣee i karɔ̃ ne, si karodzainyimɔ fu i abi iso ɣee i aɣɔ iso ne, daasu karodzainyimɔ gu abi. 7 Aawo abi ɔsu ɣɛɛ ne, nyua karodzainyimɔ si karui. Ito ialɛgu-ɔ si aasɛ ngbã tagbaraa.

8 Si atsue iyo ɣɛtɛ ne, tsue ɔkpã ki lɔ isã. Si ɔturi ɔkpase ne aibabɔ ituriɖue iɣɛrɛ i fɔ iyo iso.

9 Daapia siraɖui inyɔ i fɔ wainkakpɛkɔ̃ ame. Si abara ne, iiɖe siraɖui dzɛ apia kere ɣɛɛ wainabi pelepele ana to aapukutu.

10 Daanyi ikpuã iwɛ̃ asia i nantsuĩrɛrɛ̃ gu ɔfirimu iso asakanya si makpɛ̃.

11 Daapia arapia wa masu bɔi siwɛrɛ̃ gu ɖɔti mawe masakanya.

12 Kã siwɛ̃ dzɛ mafɛ̃ sia i fɔ arapia tagbaraa siyokã ina iso.

Mmara i Ɔrɛrɛ̃ Gu Ɔrɔ̃go Isɛ i Ɔri Sekelea Iso

13 Ɔrɛrɛ̃ sɛ ɔyiri ɔrɔ̃go ne ɔ̃ɔrɛgu wũ ɣɛɛ ɔwi kama ɔ̃isito ɔɖuɛ wũ. 14 Ne ɔto ɔnina wũ iyere ku mila ɔɣɛ sɔ, "Loyiri ɔrɔ̃go wɔgbe ɣɛɛ gɔ borɛ ne, loinya nnɛ loate sɔ ɔbitɛ kagbɔɔ ɔɖe." 15 Si iba ngbɔ ne, ɔbirɔ̃gomi ɔse gu ɔnyi si masu nnɛ loate sɔ ɔɖe ɔbitɛ kagbɔɔ, makɛlɛgu maate matɔ̃ɖedze i ɔmagɛ̃ kayogodɔ̃. 16 Ɔbitɛ ɔse to ɔ̃aɣere matɔ̃ɖedze sɔ, "Losu wũ ɔbibirɔ̃gomi lotã ɔrɛrɛ̃ wɔgbe i kuyiri ame. Ɣɛɛ ne ɔ̃isito ɔɖuɛ wũ. 17 Kiniɔ ne ɔrɛrɛ̃ ɔɔnina ɔbitɛ iyere ɔɣɛ sɔ, 'Loinya fɔ ɔbibirɔ̃gomi sɔ ɔɖe ɔbitɛ kagbɔɔ.' Ɣɛɛ nya nnɛ nto ite sɔ wũ ɔbibirɔ̃gomi ɖe ɔbitɛ kagbɔɔ." Iyɔ ɔbitɛ maɣese to maawarɛ ɔkati masɛ i ɔmagɛ̃ matɔ̃ɖedze anɔ. 18 Iyɔ ɔmagɛ̃ matɔ̃ɖedze to maakɔ ɔrɛrɛ̃ wɔgbe fiɛ maakpadzɛ̃ wũ kutsue. 19 Mato maatã sɔ ɔtã kuso gɔ nɖe sikãfudza abi kulafa fiɛ maasu sɛ̃ matã ɔbirɔ̃gomi ɔ̃ ɔse alasɔ ɔrɛrɛ̃ wɔgbe ɔɔsopara Israelse ɔbitɛ kagbɔɔ. Ne kama ɔrɔ̃go wɔgbe to ɔ̃akɛlɛ i katɔ̃ ɔɖe ɔrɛrɛ̃ wɔgbe ɔre. Ayi kumɛgɔ i ɔrɛrɛ̃ pia ngbã ne, iikote sɔ ɔ̃asɛ̃ ɔrɔ̃go.

20 Ɣɛɛ si iɖe ɔnukuare fiɛ maiwo nnɛ loate sɔ ɔbitɛ kagbɔɔ ɔɖe ɔnya ne, 21 mato maakɔ ɔrɔ̃go makɛlɛgu i ɔ̃ ɔse kayogodɔ̃, i mmɔ ne, marɛrɛ̃ ma i ɔmagɛ̃ ame aapɛ wũ ata ɔkpi. Ɔbara inuarɛra i Israel ala ɔɖe asɔrɔ̃ gɔ ɔpia i ɔ̃ ɔse iyo. Ikote sɔ miaɖi iranyanyariã i mi ndɛ̃.

22 Si manya ɔrɛrɛ̃ to ɔrɛgu ɔrɛrɛ̃ mama ɔ̃ ɔre ne, ikote sɔ ɔrɔ̃go gu ɔrɛrɛ̃ wɔ lorɛgu wũ aakpi. Ikote sɔ miaɖi iranyanyariã i Israel.

23 Si ɔrɛrɛ̃ ɔsarɛgu ɔbitɛ kagbɔɔ wɔ maɔkarɛ matã ɔturi mama, i kuyiri ame fiɛ ɔrɛgu wũ ne, 24 miakɔ ma inyɔ ɔɖuɖu mikɛlɛgu ɔmagɛ̃ kayogodɔ̃ mipɛ ma ata makpi. Ikote sɔ ɔrɔ̃go aakpi alasɔ ɔ̃ilakulu si ɔna kabuai atoasɔ ɔpia i ɔmagɛ̃ ame. Ɔrɛrɛ̃ ne ikote sɔ ɔ̃akpi alasɔ ɔrɛgu ɔturi mama ɔre. Ikote sɔ miaɖi iranyanyariã i mi ndɛ̃.

25 Ɣɛɛ si ɔrɛrɛ̃ ɔsu ɔɣiɛ fiɛ ɔrɛgu ɔrɔ̃go wɔ maɔkarɛ matã ɔturi mama, i kuyiri ame i karɔ̃ ndɛ̃ ne, iyɔ ɔrɛrɛ̃ wɔ lobara ne ɔnɔwɛ̃ loakpi. 26 Midaabara ɔbitɛ kuira. Ala ɔ̃ibara ikpi nɛ ikote sɔ ɔ̃akpi ɔso. Itɔ̃me nɛgbe se lɛ ɔturi wɔ lota ɔbo i ɔ̃ ɔnyii iso fiɛ ɔɖue wũ awe. 27 Ala ɔrɛrɛ̃ ɔnya ɔbitɛ i karɔ̃ ndɛ̃, atoasɔ ɔbitɛ wɔ maɔkarɛ ɔlakulu ne, kuwɛ̃ na ɔ̃afɔ wũ.

28 Si ɔrɛrɛ̃ ɔnya ɔbitɛ kagbɔɔ wɔ maikarɛ matã kuwɛ̃, ne ɔsu ɔɣiɛ ɔrɛgu wũ fiɛ manya ma ne, 29 ɔrɛrɛ̃ aatã ɔrɔ̃go ɔ̃ ɔse sikãfudza abi siru. Ikote sɔ ɔ̃ayiri ɔbitɛ wɔmɔ ala ɔ̃ɔnina wũ. Ayi kumɛgɔ i ɔrɛrɛ̃ pia ngbã ne ɔ̃ibawo wũ ɔsɛ̃.

30 Iikote sɔ ɔrɛrɛ̃ aayiri ɔ̃ ɔse ɔre. Iikote sɔ ɔ̃aɖi ɔ̃ ɔse isɔ̃ ɔsɛ.