Deuteronômio 33

Mose Ɔfere Israel Kumele Kusɛkusɛ

1 Nwagbe nɖe kusɛkusɛ gɔ i Mose, Ɣaameturi ɔfere Israel mabi fiɛ ɔkpi ne: 2 Ɔɣɛ sɔ,

"Bosate ɔbɔrɛ i Sinai Kube iso.

Ne ɔbɔrɛ i Seir ɔfiɛ ɔfere i ma iso,

ne ɔfiɛ ɔbɔrɛ i Paran Kube iso.

Ɔbagu makpabo sekelea kukpi kukpi

mabɔrɛ i kagbalɔ, mabɔrɛ i ɔ̃ kube sikparuɛ.

3 Ɔnukuare, fɔ nsɛ aɖuɛ maturi.

Masekelea ɔɖuɖu pia i fɔ nrɔɔ̃ ame.

Masɛ mabɔ ati karɔ̃ i fɔ ngbatɔ̃,

fiɛ masɛ mafɔ asɛra i fɔ kɔrɛ.

4 Mose mmara mɛ ɔtã bo,

nɖe ira nɛ Yakob mabi ba.

5 Ɔɖe igara i Yesurun*33.5 Yesurun: Ne karɔ̃ nɖe ɔsɛɛ, iɖe iyere mama itã Israel. iso

ku ɔwi wɔ i maturi matɔ̃ɖedze ɔsikanya,

ku Israel kumele.

6 "Mitã Ruben si ɔsɛ ngbã si ɔdaakpi,

ɣee ɔ̃ maturi si mase tɛmi."

7 Ne ɔɣɛ i Yuda kamele iso sɔ:

" O Bosate si ɔkã Yuda kamele maturi kaku atsue.

Si akɔ wũ abɔ ɔ̃ manyii kumele tsɔra.

Ɔsɛ ɔkpɛ̃ ɔtã so ku ɔ̃ mɔmɔ nrɔɔ̃.

Ao, ɖe buaidze tã wũ i ɔ̃ matsirise iso!"

8 Ɔɣɛ i Levi kamele iso sɔ,

"Fɔ Urim gu Tumim*33.8 Urim gu Tumim: Iɖe ara anyɔ wa i sɔrɛdze sɛ ɔsu ɔla ɔ̃atsue ala Ɣaa kuɖɔɛ iso ara i Israel. ɖe

ɔturi wɔ lobo-ɔ anɔ ɔkpɛ.

Ala wũ anyɔ i Masa.

Ne awanɛkɛ̃gu wũ i Meriba ndu kɔrɛ.

9 Ɔɣɛ i ɔ̃ ɔse gu ɔ̃ ɔnyi iso sɔ,

'Loinya ma sɔ maɖe ira.'

Ɔ̃inya ɔ̃ manyibirɛrɛĩ ɔɖiite

ɣee ɔ̃inya ɔ̃ mɔmɔ mabi ɔsɛ ikpo,

ɣɛɛ ɔdzuɛ̃ fɔ itɔ̃me

fiɛ ɔdzuɛ̃ fɔ ndamu.

10 Ɔsɛ ɔte Yakob mabi fɔ asɛra

fiɛ ɔsɛ ɔte Israel mabi fɔ mmara.

Ɔsɛ ɔsu kuakɔrɔ̃kɔrɔã ɔbɔ i fɔ anɔ

fiɛ ɔsɛ ɔsu araifɛ̃ asɔrɛ ɔsia i fɔ isɔrɛkasege iso.

11 O Bosate, fere ɔ̃ kusɛ̃ ɔɖuɖu kusɛkusɛ.

Si ana isoɣɔ i ɔ̃ nrɔɔ̃ ame karabara iso.

Wuĩ matsirise ma loata maya i ɔ̃ iso i karɔ̃;

wuĩ ɔ̃ makpɛ̃guse i karɔ̃ gbɔgbɔɔgbɔ maisibata ana."

12 Ɔɣɛ i Benyamin kamele iso sɔ,

"Kamele ga i Bosate sɛ ɔɖuɛ sɛ kawarã i ɔ̃ kaɣɔ ame.

Ala ɔsɛ ɔnyɔ wũ iso ku ɔwi biara,

ne nwɔ ɔsɛ ɔɖuɛ sɛ ɔwarã i ɔ̃ amɔiti ndɛ̃."

13 Ne ɔɣɛ i Yosef kamele iso sɔ,

"Bosate si ɔfere ɔ̃ karɔ̃ kusɛkusɛ

ku kuɖobiobio fɔkuɣa gɔ nsɛ kubɔrɛ i kuɖokpo i kato

gu ku ndu mɛ i karɔ̃ kawodorokɔ̃ i kayirinɔ ame.

14 Fere kusɛkusɛ i aɖedziribi wa kuɣɛ̃ sɛ kutã

si afere kusɛkusɛ i asɛɛ wa i ɔgbaleti aawo ɔtã iso.

15 Ɔtã ɔraɖui wɔ nsɛ ɔlɛ i abe kuere iso

gu i abemi wa ɔwi biara asɛ aɣɔ̃ adziribi.

16 Ɔ̃ karɔ̃ si katã ara wa nlɛ gbodzoo

si ɔbo nwɔ lowe i kadzirimi ga nto katsue ame anɔ.

Tã nwagbe ɔɖuɖu si asia i Yosef iti,

si asia i ɔsiare i ɔ̃ manyibi ndɛ̃.

17 I ɔ̃ ɔle ame ne ɔse lɛ nantsuĩibirɛrɛ̃ ɖeakatɔ̃.

Ɔ̃ asa se lɛ iputu ame nantsuĩrɛrɛ̃.

Wã ɔ̃asu ɔli nɖebi ɔfere i karɔ̃,

isɛ iabo ta mma mpia i karɔ̃ kawirikɔ̃ kɔraa.

Ngbɔ nɖe Efrayim kukpi kuweo ne;

kumɛɔ nɖe Manase kukpi kuweo ne."

18 Ɔɣɛ i Zebulon kamele iso sɔ,

"Zebulon, na isoɣɔ i fɔ irisɛ ame,

Isakar, fɔ si ana isoɣɔ i fɔ akpayo ame.

19 Mato maakpedza maturi mabɔ i ma kube kɔrɛ

fiɛ maabara asɔrɛ bɔlɔlɔa i mmɔ.

Mato maaɖe iyi ku ara gbodzoo wa lobɔrɛ i ɔpo ame,

fiɛ maana aranyaa wa makɔla i ɔpo iwarĩ ame."

20 Ɔɣɛ i Gad kamele iso sɔ,

"Mato maale nwɔ nsɛ ɔtã Gad ɔmɔ ɔbua!

Gad si i mmɔ lɛ dzata awe,

si ɔkɛkɛ kɔrɔ̃ ɣee iti.

21 Ɔɖi karɔ̃ kasɛ sɛɛ kaɖo ɔtã so;

maɖi kasɛ siare ga nɖe tɔ̃ɖedze kare masɛ wũ,

ɔwi wɔ i maturi makpakpa ɔsa so kanya.

Ɔbara i Bosate sibɔlɔlɔ kuɖuɛ iso gu i

ɔ̃ mmara mɛ ɔtã Israel maturi."

22 Ɔɣɛ i Dan kamele iso sɔ,

"Dan se lɛ dzata ibi awe,

ɔsɛ ɔkɔlɛ ɔɣo ɔbɔrɛ i Basan."

23 Ɔɣɛ i Naftali kamele iso sɔ,

"Naftali kamele, ɔɔbo Bosate anɔ gbaã

fiɛ ɔ̃ɔfere ma kusɛkusɛ gbodzoo.

Ɔ̃ kaɖekɔ̃ aaɖe kagbalɔ isɛ ikɛlɛ ibu iso."

24 Ɔɣɛ i Aser kamele iso sɔ,

"Aser nɖe ɔbibirɛrɛĩ wɔ mafere kusɛkusɛ maɖo.

Ɔ̃ ara si aɣɔ ɔ̃ manyibi anɔ,

si mitã ɔ̃ ngba si mipie nnɔĩ.

25 Fɔ kuyogodɔ̃isɛ̃ra aaɖe ibɔrakpinaa gu ayiwa,

fiɛ fɔ ɔle aakategu fɔ ayi.

26 "Kuwɛ̃ na lɛ Yesurun Ɣaa,

nwɔ nsɛ ɔsɛ i adɔdɔ iso i kato ɔfe

i ɔ̃ kulɛ ame si ɔba ɔ̃abuai-ɔ.

27 Ɣaa wɔ mpia ngbã ɔwi daaro nɖe mi katarikɔ̃.

Ɔmɔɛ̃ mi ɔto ku ɔ̃ nrɔɔ̃ daaro ɔwi biara.

Ɔto ɔ̃asa mi tsirise ɔɖi i mi katɔ̃.

Ne ɔɣɛ sɔ, 'Miwɔra wũ!'

28 Ne ɔso Israel sɛ ɔsɛ ngbã i kaɣɔ ame,

Yakob ibiɔ pia i inyɔiso ame

i karɔ̃ iso ngbegɔ geɖebu ɔraɖui gu wain ɣɛtɛ pia

fiɛ kuɖobiobio sɛ kupɛ kubɔrɛ i kato.

29 Israel kaɖe, iti ɔbua ilɛ mi!

Maturi ma i Bosate ɔɔɖi.

Nna nse lɛ mi awe?

Ɔ̃ nɖe mi akpiraifɔra gu buaidze,

gu mi ipɛmi nɛ loɖeiso.

Mi matsirise to maabɔbɔdzo ku ifɔ̃ i mi anɔ,

ɣɛɛ mito mianene ma kusɔrɛkɔ̃."