1 Mose ɔɣere Israel mabi sɔ: Mimɔɛ̃ mmara biara mɛ nto lotã mi nɔme mila. Si miasɛ ngbã miɣe misia fiɛ miasɛ miafɔ karɔ̃ ga i Bosate ɔkã ndamu sɔ ɔ̃atã mi mawa. 2 Minyigi kumɛgɔ i Bosate mi Ɣaa ɔkɔ mi i akɔ sina wa loɔfe i irisɛ i fafuĩ ame. Si ɔte mi karɔ̃ibɔso gu si ɔla mi ɔnyɔ, si ɔtsue nnɛ mpia i mi situ ame, si mito miabara i ɔ̃ mmara iso ɣee miibabara i me iso. 3 Ɔbɔ mi karɔ̃, ɔtã kukã ɔkpɛ̃ mi fiɛ ɔtã mi mana miɖe, mana wɔ nɖe aɖera wa mi gu mi mawa iiɖe minya kuiyikuiyi. Ɔbara ngbɔ si ɔsu ɔte mi sɔ ɔturi awune, iisɛ ɔsɛ ngbã i aɖera iso kere ɣɛɛ itɔ̃me biara nɛ nsɛ ibɔrɛ i Bosate kanya ame. 4 I akɔ sina wagbe ame ne, mi ngba iiɣe ɣee mi arapia iikpi i mi iso. 5 Iyɔ mitsue i mi situ ame sɔ lɛ kumɛgɔ i ɔrɛrɛ̃ sɛ ɔkpadzɛ̃ ɔ̃ ɔbi ne, ngbɔ ame i Bosate mi Ɣaa sɛ ɔkpadzɛ̃ mi ne.

6 Ne ɔso minyɔ sɔ mibara i Bosate mi Ɣaa mmaraisi iso, si misɛ ngbã i ɔ̃ siri iso si miwarɛ wũ ku kunigã. 7 Ala Bosate mi Ɣaa to ɔkɔ mi ɔbɔ i karɔ̃ sɛɛ iso. Karɔ̃ ga ame i siwore gu abiɔ pia gu karɔ̃ ame ndu wodoroa mɛ nto mifuĩdza so mibɔrɛ fiɛ mito mibore i abemi iso gu kugbolomi ame ana pia. 8 Karɔ̃ ga nsɛ kalɛ ara lɛ kamɔ gu kakpã gu ndã adziri gu abo gu akpɛtikɔkɔi gu nnɔĩ adziri fiɛ maɣendu pia, 9 karɔ̃ ga iso araɖea iibanya mi ɖuɖuuɖu fiɛ kuira iibanya mi. Karɔ̃ ga i ata ɖe abɔrakpinaa fiɛ miawo abɔrarɛtɛa ɔkuri mibɔrɛgu i kã abemi ame.

10 Si miɔɖe ara mimi ne, mile Bosate mi Ɣaa ala karɔ̃ sɛɛ ga ɔtã mi iti. 11 Minyɔ kukaakɔ sɔ miibaɣara Bosate mi Ɣaa. Midaasɛ̃ sɔ miibawarɛ ɔ̃ mmaraisi, ɔ̃ mmara gu ɔ̃ asɛ̃ra ara wa nto lotã mi nɔme. 12 Si iiɖe ngbɔ ne si miɖe fiɛ miɔmi ne, si miɔtsue ayo sɛɛ ka misi ne, 13 si mi manantsuĩ gu masɛrɛ ɔmɔ masi fiɛ mi sikãfudza gu sikãrɛtɛa ɔɣe sisia fiɛ nwa ɔɖuɖu miba ɔɔɣe asia ne, 14 iyɔ mi ɔtu to ɔ̃akɔlɛ so kato iyɔ miaɣara Bosate mi Ɣaa. Nwɔ loɖi mi ɔbɔrɛgu i Egipte karɔ̃ iso ngbegɔ miɖe masande. 15 Ɣaa lokɔ mi ɔkigu i fafuĩ karɔ̃ ga nfere kakpa fiɛ kayigu afɔ̃ra fiɛ karɔ̃ ɔkore ndu na fiɛ maɣɛ nyanyariã gu siboitɛtɛ pia i mmɔ. Ɔtã mi ndu ɔbɔrɛgu i itasiare ame. 16 Ɔtã mi mana miɖe i fafuĩ ame, aɖera wa mi mawa iiɖe manya. Ɔtã miki i amɔrɛã ame si ɔbɔ mi karɔ̃ gu si ɔla mi ɔnyɔ si ialɛgu mi ku katsɔrakɔ̃. 17 Mito miaɣere so sɔ, "Wũ iwobara gu wũ mɔmɔ ɔle lotã lona ara wagbe." 18 Ɣɛɛ nyigi Bosate fɔ Ɣaa, ala ɔ̃ nsɛ ɔtã-ɔ ɔle fiɛ asɛ awo ara ɔbara akpese ranase. Ɔbara ngbɔ ɔsu ɔsiaita i ɔ̃ ndamu mɛ ɔkã ɔtã mi mawa lɛ ise nɔme.

19 Si ɔwi ɔrere miɣara Bosate mi Ɣaa fiɛ misiai maɣaa mama mibɔ ati karɔ̃ misumu ma ne, nto loɣɛ ku aɖansiɛ i mi iso nɔme, sɔ gbaã ne mato maawɔra mi. 20 Si miiwarɛ Bosate mi Ɣaa ne, mato maawɔra mi, lɛ kumɛgɔ i Bosate mi Ɣaa ɔwɔra nɖebi mɛ i mi katɔ̃ awe.