Omatiyu 25

Epwo koka ko gwejeji

31 <<Ishini Oyi ka Asuse ya wa ipu ko igyashi nu kpa ayoleho ko Owuso, oya wa yagye ebe nu ipu ko igyashi ki iso. 32 Kpiri ko okpagye kese mani ba wa gbayi obutu nu, kweyi oya ya asuse ya ko oyoye byoni inogwobize ya ko otukpo kpi ikpowu ni. 33 Oya kpo otukpo ya shabore nu, kweyi ikpowu ya shaboshe nu.

34 <<Bwebe ni Ose ya kada wo ba abore nu mo, <Ala wa, ala ni Ada hin sala aboneshi ni; ala zo ogwu kala, obula ni akyanu tu dala bwishi ni aye ese ni. 35 Koni ishini emye ya ngmu ni, ala da ami ozarore. Igyini ya ngmu, ala dami inyi gwa. Nwwo ogboga, ala byun gole kala. 36 Nyyewewa, ala kpa akyi yumeyi. Nyya gbere, ala byere hin. Nyyo oruduru, ala webe hin.>

37 <<Ebeni awase neshi ba kamo, <Adole, ishi nya ni emye ya ngmo kweyi aha dawo ozarore? Kwe igyini ya ngmo ni aha dawo inyi gwa? 38 Ishi nya ni owogboga ni aha byo gole ka? Kwe ishi nya in oye ewewa ni aha yaakyi? 39 Ishi wonya ni aha mo oya gbere kwe ayo toruduru kweyi aha gebe wo?>

40 <<Ose ya kamo, <Nyya ka dala okwokwoshi, oza ni ala ya kpa ayene hin leke kpiri, ala ya kpa ami la.>

41 <<Oki ya kada awase ni ba aboshe nu ni mo, <Ala nyiso shobutu hin, ala ni atala igbe ni, gipu kola ko gbogbo-gbogbo ni agwo di ibiri kpa ayoleho nu ni. 42 Koni emye ya ngmu, ala dami ozarore lo. Igyini ya ngmu, ala da ami inyi gwa lo, 43 Nwwo ogboga, ala byun gole kala lo. Nyyewewa, ala yuma akyi lo. Nyya gbere, kweyi abyun go oruduru, ala ke tumabo lo.>

44 <<Awa ki ba kamo, <Adole, ebenya ni aha mo ya ngmemye kwe igyini kwe owogboga, kwe oyewewa kwe oya gbere, kwe ayo toruduru kweyi aha tuwabo lo?>

45 <<Oya kamo, <Nyya ka dala okwokwoshi, oza ni ala tela ko ya da ayene leke, ala tela ko ya dami pini yoma.>

46 <<Ebeni aba mowe ko gbogbo-gbogbo, awo yoza neshi ke aba kpuwa ya sho olayi ko gbogbo-gbogbo.>>