सुलैमान के राज्य की शरुआत
1 दाऊद का बेट्टा सुलैमान राज्य म्ह स्थिर होग्या, अर उसका परमेसवर यहोवा उसकै गैल रहया अर उस ताहीं घणाए बढ़ाया।
2 सुलैमान नै सारे इस्राएल तै, यानिके सहस्त्रपतियाँ, शतपतियाँ, न्यायियाँ अर इस्राएल के सारे प्रधानां तै जो पितरां के घरान्यां के खास-खास आदमी थे, बात करी। 3 फेर सुलैमान पूरी मण्डळी समेत गिबोन नगर की आराधना ऊँच्ची जगहां पै गया, क्यूँके परमेसवर का मिलापआळा तम्बू, जिस ताहीं यहोवा के दास मूसा नै जंगळ म्ह बणाया था, वो ओड़ैए था। 4 पर परमेसवर की वाचा के सन्दूक नै दाऊद किर्यत्यारीम तै उस जगहां पै ले आया था जिस ताहीं उसनै उसके खात्तर त्यार करया था, उसनै तो उसकै खात्तर यरुशलेम म्ह एक तम्बू खड्या कराया था। 5 पर पीतळ की जो वेदी ऊरी के बेट्टे बसलेल नै, जो हूर का पोत्ता था, बणाई थी, वो गिबोन म्ह यहोवा के निवास कै स्याम्ही थी। ज्यांतै सुलैमान मण्डळी समेत आराधना करण खात्तर धोरै गया। 6 सुलैमान नै ओड़ैए उस पीतळ की वेदी कै धोरै जाकै, जो यहोवा कै स्याम्ही मिलापआळे तम्बू कै धोरै थी, उसपै एक हजार होमबलि चढ़ाए।
बुद्धि खात्तर सुलैमान की प्रार्थना
7 उसे रात म्ह परमेसवर नै सुलैमान तै दर्शन देकै उसतै कह्या, "जो किमे तू चावै के मै तन्नै देऊँ, वो माँग।" 8 सुलैमान नै परमेसवर तै कह्या, "तू मेरे पिता दाऊद पै बड़ी करुणा करदा रहया अर मेरै ताहीं उसकी जगहां पै राजा बणाया सै। 9 इब हे यहोवा परमेसवर! जो वचन तन्नै मेरे पिता दाऊद तै दिया था, वो पूरा हो; तन्नै तो मेरै ताहीं इसी प्रजा का राजा बणाया सै जो धरती की धूळ के किणक्यां कै बराबर घणीए सै। 10 इब मन्नै इसी बुद्धि अर ज्ञान दे के मै इस प्रजा के स्याम्ही भित्तर-बाहर आणा-जाणा कर सकूँ, क्यूँके कौण इसा सै के तेरी इतणी बड़ी प्रजा का न्याय कर सकै?" 11 परमेसवर नै सुलैमान तै कह्या, "तेरी जो इसीए इच्छा होई, यानिके तन्नै ना तो धन-सम्पत्ति माँगी सै, ना ऐश्वर्य अर ना अपणे दुश्मनां का प्राण अर ना अपणी लाम्बी उम्र माँगी, सिर्फ बुद्धि अर ज्ञान का वर मांग्या सै, जिसतै तू मेरी प्रजा का जिसके उप्पर मन्नै तेरे ताहीं राजा ठैहराया सै, न्याय कर सकै, 12 इस कारण बुद्धि अर ज्ञान तेरे तै दिया जावै सै। मै तन्नै इतणी धन-सम्पत्ति अर ऐश्वर्य भी दियुँगा1:12 तन्नै इतणी धन-सम्पत्ति अर ऐश्वर्य भी दियुँगा उसतै करे गए वायदे म्ह लम्बी उम्र भी थी, पर वो शर्त पै टिक्यी होई थी अर क्यूँके सुलैमान नै शर्त पूरी न्ही करी ज्यांतै वो प्रतिज्ञा प्रभावी न्ही होई। (1 राजा 3:14), जितना ना तो तेरे तै पैहल्या किसे राजा नै मिल्या अर ना तेरै बाद किसे राजा नै मिलैगा।"
सुलैमान की सेना अर आर्थिक शक्ति
13 फेर सुलैमान गिबोन की ऊँच्ची जगहां तै, यानिके मिलापआळे तम्बू कै स्याम्ही तै यरुशलेम म्ह आया अर ओड़ै इस्राएल पै राज करण लाग्या। 14 फेर सुलैमान नै रथ अर सवार कठ्ठे कर लिये; अर उसके चौदाह सौ रथ अर बारहा हजार सवार थे, अर उन ताहीं उसनै रथां के नगरां म्ह, अर यरुशलेम म्ह राजा कै धोरै ठहराए राख्या। 15 राजा नै इसा करया के यरुशलेम म्ह सोन्ने-चाँदी का मोल बहुतायत के कारण पत्थरां का सा, अर देवदार का मोल नीच्चै के देश के गूलरां का जिसा बणा दिया। 16 जो घोड़े सुलैमान राक्खै था, वे मिस्र तै आवैं थे, अर राजा के व्यापारी उन ताहीं झुण्ड के झुण्ड ठहराए होए दाम पै लिया करैं थे। 17 एक रथ तो छः सौ शेकेल चाँदी पै1:17 छः सौ शेकेल चाँदी पै लगभग सात किलो चाँदी, अर एक घोड़ा डेढ़ सौ शेकेल1:17 एक घोड़ा डेढ़ सौ शेकेल करीब दो किलो चाँदी पै मिस्र तै आवै था; अर इसे दाम पै वे हित्तियाँ1:17 इसे दाम पै वे हित्तियाँवे एक रथ कै खात्तर 600 चाँदी के सिक्के देवै थे अर एक घोड़े खात्तर 150 चाँदी के सिक्के देवै थे। उननै हित्तियाँ अर सीरिया के राजयां ताहीं भी रथ अर घोड़े बेचे थे। के सारे राजयां अर अराम के राजयां कै खात्तर उन्हे कै जरिये ल्याया करैं थे।