2 इतिहास 34

योशिय्याह का राज्य

1 जिब योशिय्याह यहूदा पै राज करण लाग्या, जिब वो आठ साल का था, अर यरुशलेम म्ह इकत्तीस साल ताहीं राज्य करदा रह्या। 2 उसनै वो करया जो यहोवा की नजर म्ह ठीक सै, अर जिस राह पै उसका मूलपुरुष दाऊद चाल्दा रह्या, उन्हे पै वो भी चाल्या करै था अर उसतै ना तो ओळी ओड़ मुड़या, अर ना सोळी ओड़।

योशिय्याह के सुधार

3 वो छोरा ए था, यानिके उस ताहीं गद्दी पै बैठ्ठे आठ साल पूरे भी न्ही होए थे के अपणे मूलपुरुष दाऊद के परमेसवर की खोज करण लाग्या, अर बारहवें साल म्ह वो ऊँच्‍चे स्थानां अर अशेरा नाम की मूरतां नै अर खुदी अर ढळी होई मूरतां नै दूर करकै, यहूदा अर यरुशलेम नै शुद्ध करण लाग्या।*34:3 यिर्मयाह की पैहली भविष्यद्वाणियाँ (यिर्म. 2, 3) योशिय्याह जरिये मूर्तिपूजा के निवारण के शरुआत्ती कोशिश के बखत करी सैं अर उनतै उसनै घणा साहस मिला होगा। 4 बाल देवत्यां की वेदी उसकै स्याम्ही तोड़ दी गई, अर सूरज की प्रतिमा जो उनकै उप्पर ऊँच्‍चे पै थी, उसनै काट दी, अर अशेरा नाम की देवी, अर खुदी अर ढळी होई मूरतां ताहीं उसनै तोड़कै पिस दिया, अर उनकी राख उन माणसां की कब्रां पै छितरा दी, जो उननै बलि चढ़ावै थे। 5 उनके पुजारियाँ की हाड्डी उसनै उन्हे की वेदियाँ पै जळाई। आखर उसनै यहूदा अर यरुशलेम ताहीं शुद्ध करया। 6 फेर मनश्शे, एप्रैम अर शिमोन के बल्के नप्ताली ताहीं के नगरां के खण्डहरां म्ह, उसनै वेदियाँ ताहीं तोड़ दिया, 7 अर अशेरा नाम की अर खुदी होई मूरतां ताहीं पिस कै राख कर दिया, अर इस्राएल के सारे देश म्ह की सूरज की सारी प्रतिमा ताहीं काटकै यरुशलेम म्ह बोहड़ ग्या।

योशिय्याह कै जरिये मन्दर की मरम्मत

8 फेर अपणे राज्य के अठारहवें साल म्ह जिब वो देश अर भवन दोनुवां नै शुद्ध कर चुक्या, फेर उसनै असल्याह के बेट्टे शापान अर नगर के हाकिम मासेयाह अर योआहाज के बेट्टे इतिहास के लेखक योआह ताहीं अपणे परमेसवर यहोवा के भवन की मरम्मत कराण खात्तर भेज दिया। 9 अंत म्ह उननै हिल्किय्याह महायाजक कै धोरै जाकै जो रुपया परमेसवर के भवन म्ह ल्याया गया था, यानिके जो लेवीय दरबानां नै मनश्शेइयां, एप्रैमियां अर सारे बचे होए इस्राएलियाँ तै अर सारे यहूदियाँ अर बिन्‍यामीनियाँ तै अर सारे यरुशलेम के बासिन्दया कै हाथ तै लेकै कठ्ठा करया था, उस ताहीं सौंप दिया। 10 यानिके उननै उस ताहीं उन काम करण आळयां कै हाथ सौंप दिया जो यहोवा के भवन के काम पै मुखिए थे, अर यहोवा के भवन के उन काम करण आळयां नै उस ताहीं भवन म्ह जो किमे टूट्या फुट्या था, उसकी मरम्मत करण म्ह लगाया। 11 यानिके उननै उस ताहीं बढ़इयाँ अर राजमिस्त्रियाँ ताहीं दिया के वे गढ़े होए पत्थर अर जोड़ां खात्तर लाकड़ी मोल लें, अर उन घरां नै छावैं जो यहूदा के राजयां नै नाश कर दिए थे। 12 वे माणस सच्‍चाई तै काम करै थे, अर उनके अधिकारी मरारीय, यहत अर ओबद्याह, लेवीय अर कहाती, जकर्याह अर मशुल्‍लाम, काम चलाण आळे अर गाण-बजाण का भेद सारे जाणण आळे लेवीय भी थे। 13 फेर वे बोझियाँ के अधिकारी थे अर न्यारे-न्यारे ढाळ की सेवा अर काम चलाण आळे थे, अर कुछ लेवीय मुंशी सरदार अर दरबान थे।

नियम-कायदे की किताब का मिलणा

14 जिब वे उस रपिये नै जो यहोवा के भवन म्ह पोहचाया गया था, लिकाड़ रहे थे, फेर हिल्किय्याह याजक नै मूसा के जरिये दी होई यहोवा के नियम-कायदे की किताब मिली। 15 फेर हिल्किय्याह नै शापान मंत्री तै कह्या, "मन्‍नै यहोवा के भवन म्ह नियम-कायदे की किताब मिली सै;" फेर हिल्किय्याह नै शापान ताहीं वा किताब दी। 16 फेर शापान उस किताब नै राजा कै धोरै लेग्या, अर यो खबर दी, "जो-जो काम तेरे कर्मचारियाँ ताहीं सौंप्या गया था उसनै वे कर रहे सैं। 17 जो रुपया यहोवा के भवन म्ह मिल्या, उसनै उन ताहीं उण्डेल कै मुखिया अर कारीगरां के हाथ्थां म्ह सौंप दिया सै।" 18 फेर शापान मंत्री नै राजा तै यो भी बता दिया के हिल्किय्याह याजक नै मेरे ताहीं एक किताब दी सै; फेर शापान नै उस म्ह तै राजा ताहीं पढ़कै सुणाया। 19 नियम-कायदे की वे बात सुणकै राजा नै दुख म्ह अपणे कपड़े पाड़े। 20 फेर राजा नै हिल्किय्याह, शापान के बेट्टे अहीकाम, मीका के बेट्टे अब्दोन, शापान मंत्री अर असायाह नाम के अपणे कर्मचारी तै हुकम दिया, 21 "थम जाकै मेरी ओड़ तै अर इस्राएल और यहूदा म्ह रहण आळयां की ओड़ तै इस पाई होई किताब के वचनां कै बारै म्ह यहोवा तै पूच्छो; क्यूँके यहोवा की बड़ीए जलजलाहट म्हारे पै ज्यांतै भड़की सै के म्हारे पुरखां नै यहोवा का वचन न्ही मान्या, अर इस किताब म्ह लिक्खे होए सारे हुकमां का पाळण न्ही करया।"

हुल्दा की भविष्यवाणी

22 फेर हिल्किय्याह नै राजा के और दूत्तां समेत हुल्दा नबिया कै धोरै जाकै उसतै उसे बात कै मुताबिक बात करी, वो तो उस शल्‍लूम की जनान्‍नी थी जो तोखत का बेट्टा अर हस्रा का पोत्ता अर वस्त्रालय का रखवाळा था: अर वा जनान्‍नी यरुशलेम के नये मोहल्‍ले म्ह रहवै थी। 23 उसनै उनतै कह्या, "इस्राएल का परमेसवर यहोवा न्यू कहवै सै, के जिस माणस नै थारे ताहीं मेरे धोरै भेज्या, उसतै या कहो, 24 ‘यहोवा न्यू कहवै सै, के सुण, मै इस जगहां अर इसके बासिन्दया पै मुसीबत गैर कै यहूदा के राजा कै स्याम्ही जो किताब पढ़ी गई, उस म्ह जितने श्राप लिखे सैं उन सारया नै पूरा करुँगा। 25 उन माणसां नै मेरे ताहीं त्याग कै पराए देवता खात्तर धूप जळाया सै अर अपणी बणाई होई सारी चिज्जां के जरिये मेरे ताहीं छो दिलाया सै, इस कारण मेरी जलजलाहट इस जगहां पै भड़क उठ्ठी सै, अर शान्त ना होवैगी। 26 पर यहूदा का राजा जिसनै थारे ताहीं यहोवा तै पूछण नै भेज दिया सै उसतै थाम यो कहो, के इस्राएल का परमेसवर यहोवा न्यू कहवै सै, 27 के ज्यांतै के तू वे बात सुणकै दीन होया, अर परमेसवर कै स्याम्ही अपणा सिर झुकाया, अर उसकी बात सुणकै जो उसनै इस जगहां अर इसके बासिन्दया के खिलाफ कही, तन्‍नै मेरै स्याम्ही अपणा सिर झुकाया, अर कपड़े पाड़कै मेरै स्याम्ही रोया सै, इस कारण मन्‍नै तेरी सुणी सै; यहोवा की याए वाणी सै। 28 सुण, मै तन्‍नै तेरे पुरखां कै गैल इसा मिलाऊँगा के तू शान्ति तै अपणी कब्र म्ह पोहचाया जावैगा; अर जो मुसीबत मै इस जगहां पै, अर इसके बासिन्दया पै गेरणा चाऊँ सूं, उस म्ह तै तन्‍नै अपणी आँखां तै कुछ भी देखणा ना पड़ैगा।’" फेर उन माणसां नै बोहड़कै राजा तै योए सन्देस दिया।

योशिय्याह के जरिये हुकम मान्‍नण की कसम लेणा

29 फेर राजा नै यहूदा अर यरुशलेम के सारे पुरनियां नै कठ्ठे होण नै बुलावा भेज्या। 30 राजा यहूदा के सारे माणसां अर यरुशलेम के सारे बासिन्दया अर याजकां अर लेवियाँ बल्के छोट्टे-बड़े सारी प्रजा के माणसां ताहीं गैल लेकै यहोवा के भवन म्ह गया; फेर उसनै जो करार की किताब यहोवा के भवन म्ह मिली थी उस म्ह की सारी बात उन ताहीं पढ़कै सुणाई। 31 फेर राजा नै अपणी जगहां पै खड़े होकै, यहोवा तै इस ऊमीद तै करार करया के मै यहोवा कै पाच्छै-पाच्छै चाल्‍लूँगा, अर अपणे सम्पूर्ण मन अर पूरे जी तै उसके हुकमां, चेतावनियाँ अर विधियाँ का पाळण करुँगा, अर इन करार की बात्तां नै जो इस किताब म्ह लिक्खे सैं, पूरी करुँगा। 32 फेर उसनै उन सारया तै जो यरुशलेम म्ह अर बिन्‍यामीन म्ह थे उसाए करार करवाया: अर यरुशलेम के बासिन्दया, परमेसवर जो उनके पितरां का परमेसवर था, उसके करार कै मुताबिक करण लाग्गे। 33 योशिय्याह नै इस्राएलियाँ के सारे देशां म्ह तै सारी अशुद्ध चिज्जां नै दूर करकै जितने इस्राएल म्ह मिले, उन सारया तै उपासना कराई; यानिके उनके परमेसवर यहोवा की उपासना कराई; उसके जीवन भर*34:33 जीवन भर योशिय्याह के राज्यकाल म्ह मूर्तिपूजा प्रत्यक्ष म्ह न्ही होवै थी। उन ताहीं अपणे पूर्वजां के परमेसवर यहोवा कै पाच्छै चालणा ना छोड्या।