2 इतिहास 14

आसा का राज्य

1 अन्त म्ह राजा अबिय्याह मरकै अपणे पुरखां कै गैल जा मिल्या, अर उस ताहीं दाऊदपुर म्ह माट्टी दी गई; अर उसका बेट्टा आसा उसकी जगहां पै राज करण लाग्या। इसके दिनां म्ह दस साल ताहीं देश म्ह चैन रह्या। 2 आसा नै वोए करया जो उसके परमेसवर यहोवा की नजर म्ह आच्छा अर ठीक था। 3 उसनै पराई वेदियाँ ताहीं अर ऊँच्‍चे स्थानां ताहीं दूर करया, अर लाठां ताहीं तुड़वा दिया, अर अशेरा नाम की मूरतां ताहीं तोड़ दिया। 4 अर यहूदियाँ तै हुकम दिया के अपणे पूर्वजां के परमेसवर यहोवा की खोज करैं, अर नियम-कायदे अर हुकमां नै मान्‍नै। 5 उसनै ऊँच्‍चे स्थानां अर सूरज की प्रतिमा ताहीं यहूदा के सारे नगरां म्ह तै दूर करया, अर उसकै स्याम्ही राज्य म्ह चैन रह्या। 6 उसनै यहूदा म्ह गढ़आळे नगर बसाए, क्यूँके देश म्ह चैन रह्या। उन साल्‍लां म्ह उसनै किसे तै लड़ाई न्ही करणी पड़ी क्यूँके यहोवा नै उस ताहीं आराम दिया था। 7 उसनै यहूदियाँ तै कह्या, "आओ हम इन नगरां नै बसावां अर उनके च्यांरु और शहरपनाह, गढ़ अर फाटकां के पल्‍ले अर बेंड़े बणावां; देश इब ताहीं म्हारे स्याम्ही पड़या सै, क्यूँके हमनै, अपणे परमेसवर यहोवा की खोज करी सै; हमनै उसकी खोज करी अर उसनै म्हारे ताहीं च्यांरु और तै आराम दिया सै।" फेर उननै उन नगरां ताहीं बसाया अर समृद्ध होए। 8 फेर राजा आसा कै धोरै ढाल अर बरछी राक्खण आळयां की एक सेना थी, यानिके यहूदा म्ह तै तो तीन लाख सैनिकां अर बिन्‍यामीन गोत्र म्ह तै ढाल राक्खण आळे अर धनुर्धारी दो लाख अस्सी हजार, ये सारे शूरवीर थे।

9 उनकै खिलाफ दस लाख माणसां की सेना अर तीन सौ रथ लिये होए जेरह नाम का एक इथियोपिया वासी लिकड़या अर मारेशा नगर ताहीं आ ग्या। 10 फेर आसा उसका सामना करण नै चाल्या अर मारेशा के धोरै सापता नाम की तराई म्ह युद्ध की पाँति बाँधी गई। 11 फेर आसा नै अपणे परमेसवर यहोवा की दुहाई दी, "हे यहोवा! जिस तरियां तू ताकतवर की मदद कर सकै सै, उस्से तरियां कमजोर की भी; हे म्हारे परमेसवर यहोवा! म्हारी मदद कर, क्यूँके म्हारा भरोस्सा तेरे पै सै अर तेरे नाम का भरोस्सा करकै हम इस भीड़ कै खिलाफ आए सां। हे यहोवा, तू म्हारा परमेसवर सै; माणस तेरे पै हावी न्ही होण पावैगा।" 12 फेर यहोवा नै कूशियाँ ताहीं आसा अर यहूदियाँ कै स्याम्ही मारया अर कूशी भाजगे। 13 आसा अर उसकै गैल के माणसां नै उनका पिच्छा गरार नगर ताहीं करया, अर इतणे कूशी मारे गए, के वे फेर सिर ना उठा सके क्यूँके वे यहोवा अर उसकी सेना तै हारगे, अर यहूदी भोत सी लूट लेगे। 14 उननै गरार कै आस्सै-पास्सै के सारे नगरां ताहीं मार लिया*14:14 उननै गरार कै आस्सै-पास्सै के सारे नगरां ताहीं मार लिया सम्भव सै की इस क्षेत्र के पलिश्तियाँ नै कूशी जेरह के इस अभियान म्ह साथ दिया सै।, क्यूँके यहोवा का भय उनके रहण आळयां कै मन म्ह समा ग्या अर उननै उन नगरां ताहीं लूट लिया, क्यूँके उन म्ह भोत सा धन था। 15 फेर पशु-शालां ताहीं जीत कै भोत सी भेड़-बकरियाँ अर ऊँट लूट कै यरुशलेम म्ह बोहड़े।