1 कुछ बखत बाद फेर परमेसवर का आत्मा ओदेद के बेट्टे अजर्याह कै उप्पर आ ग्या, 2 अर वो आसा तै मिलण नै लिकड़या, अर उसतै कह्या, "हे आसा, अर हे सारे यहूदा अर बिन्‍यामीन के गोत्र के लोग्गो, मेरी सुणो, जिब ताहीं थम यहोवा कै गैल रहोगे जिब ताहीं वो थारै गैल रहवैगा; अर जै थम उसकी खोज म्ह लाग्गे रहो, फेर तो वो थारे तै मिल्या करैगा, पर जै थम उसनै त्याग दोगे तो वो भी थमनै त्याग देगा। 3 घणे दिन इस्राएल बिना सच्‍चे परमेसवर के अर बिना सिखाण आळे याजक के अर बिना नियम-कायदे के रह्या। 4 पर जिब-जिब वे संकट म्ह पड़कै इस्राएल के परमेसवर यहोवा की और फिरे अर उस ताहीं टोह्या, तब-तब वो उननै मिल्या। 5 उस बखत ना तो जाण आळे नै शान्ति मिलै थी, अर ना आण आळे, बल्के सारे देश के सारे बासिन्दया म्ह बड़ा ए कोलाहल होवै था। 6 जात तै जात अर नगर तै नगर चूर करे जावैं थे, क्यूँके परमेसवर न्यारे-न्यारे ढाळ का कष्ट देकै उननै घबरा देवै था*। 7 पर थम हियाव बाँधो अर थारे हाथ ढील्‍ले ना पड़ै, क्यूँके थारे काम का बदला मिलैगा।"

8 जिब आसा नै ये वचन अर ओदेद नबी की नबूवत सुणी, फेर उसनै हियाव बाँधकै यहूदा अर बिन्‍यामीन के सारे देश म्ह तै, अर उन नगरां म्ह तै भी जो उसनै एप्रैम की पहाड़ी देश म्ह ले लिये थे, सारी घिनोणी चीज दूर करी, अर यहोवा की जो वेदी यहोवा के ओसारे कै स्याम्ही थी, उस ताहीं नये सिरे तै बणाया। 9 फेर आसा नै सारे यहूदा अर बिन्‍यामीन तै, अर एप्रैम, मनश्शे अर शिमोन म्ह तै जो माणस उसकै गैल रहवै थे, उन ताहीं कठ्ठा करया, क्यूँके वे यो देखकै के उसका परमेसवर यहोवा उसकै गैल रहवै सै, इस्राएल म्ह तै भोत-से उसकै धोरै चले आए थे। 10 आसा के राज के पन्द्रहवें साल के तीसरे महिन्‍ने म्ह वे यरुशलेम म्ह कठ्ठा होए। 11 उसे बखत उन ताहीं उस लूट म्ह तै जो वे ले आए थे, सात सौ बळध अर सात हजार भेड़-बकरियाँ, यहोवा तै बलि करकै चढ़ाई। 12 उन ताहीं करार करया* के हम अपणे पूरे मन अर सारे प्राण तै अपणे पूर्वजां के परमेसवर यहोवा की खोज करांगे; 13 अर के बड़ा, के छोट्टा, के जनान्‍नी, के माणस, जो कोए इस्राएल के परमेसवर यहोवा की खोज ना करै, वो मार गेरया जावैगा। 14 अर उननै जयजयकार की गैल तुरहियाँ अर नरसिंगे बजान्दे होए ऊँच्‍चे शब्द तै यहोवा की शपथ खाई। 15 यो कसम खाकै सारे यहूदी आनन्दित होए, क्यूँके उननै अपणे सारे मन तै कसम खाई अर बड़ी अभिलाषा तै उस ताहीं टोह्या अर वो उननै मिल्या, अर यहोवा नै च्यांरु और तै उन ताहीं आराम दिया।

16 आसा राजा की माँ माका जिसनै अशेरा कै धोरै धरण खात्तर एक घिनोणी मूर्त बणाई, उस ताहीं उसनै राजमाता कै पद पै तै तार दिया; अर आसाप नै उसकी मूर्त काटकै पिस दी अर किद्रोन नाळे म्ह फेंक दी। 17 मूर्तिपूजा की ऊँच्‍ची जगहां तो इस्राएलियाँ म्ह तै ना ढाई गई, फेर भी आसा का मन जीवन भर बेकसूर रह्या।* 18 उसनै जो सोन्‍ना-चाँदी, अर बरतन उसके पिता नै अर्पण करे थे, अर जो उसनै आप अर्पण करे थे, उन ताहीं परमेसवर के भवन म्ह पोंहचा दिया। 19 राजा आसा के राज के पैंतीसवें साल ताहीं यहूदा राज्य म्ह फेर लड़ाई ना होई।