2 इतिहास 17

यहोशापात का राज

1 आसा का बेट्टा यहोशापात उसकी जगहां पै राज करण लाग्या, अर इस्राएल कै खिलाफ अपणा बल बढ़ाया। 2 उसनै यहूदा के सारे गढ़आळे नगरां म्ह सिपाहियाँ के दल ठहरा दिए, अर यहूदा के देश म्ह अर एप्रैम के उन नगरां म्ह भी जो उसके पिता आसा नै ले लिये थे, सिपाहियाँ की चौंकी बैठा दी। 3 यहोवा यहोशापात कै गैल रह्या, क्यूँके उसनै अपणे मूलपुरुष दाऊद की प्राचीन चाल का ध्यान करया अर बाल देवत्यां की खोज म्ह न्ही लाग्या*17:3 बाल एक कनानी तूफान देवता अर उर्वरता देवता थे। 4 बल्के वो अपणे पिता के परमेसवर की खोज म्ह लाग्या रहवै था अर उसे के हुकमां पै चालै था, अर इस्राएल के जिसे काम*17:4 इस्राएल के जिसे काम खासकर करकै मूर्तिपूजा बाल की पूजा ल्याणा अर स्थापित करणा। न्ही करै था। 5 इस कारण यहोवा नै यहूदा के राज्य ताहीं उसके हाथ म्ह मजबूत करया, अर सारे यहूदी उसकै धोरै भेंट ल्याया करैं थे, अर उसकै धोरै भोत सा धन होग्या अर उसका वैभव बढ़ ग्या। 6 यहोवा के राह पै चाल्दे-चाल्दे उसका मन मगन होग्या; फेर उसनै यहूदा तै ऊँच्‍ची जगहां अर अशेरा नाम की मूरतां दूर कर दिया।

नियम-कायदे की शिक्षा

7 उसनै अपणे राज के तीसरे साल म्ह बेन्सैल, ओबद्याह, जकर्याह, नतनेल अर मीकायाह नाम के अपणे हाकिमां ताहीं यहूदा के नगरां म्ह शिक्षा देण ताहीं भेज दिया।*17:7 शिक्षा देण ताहीं भेज दिया। ये प्रधान वास्तव म्ह शिक्षा देण खात्तर न्ही, बलके शिक्षा देण आळयां के सर्वेक्षण खात्तर थे। शिक्षक तो याजक अर लेवी थे। (2 इति. 17:8) 8 उनकै गैल शमायाह, नतन्याह, जबद्याह, असाहेल, शमीरामोत, यहोनातान, अदोनिय्याह, तोबियाह अर तोबदोनिय्याह, नाम के लेवीय अर उनके गैल एलीशामा अर यहोराम नाम के याजक थे। 9 अत: म्ह उननै यहोवा के नियम-कायदे की किताब अपणे गैल लिये होए यहूदा म्ह शिक्षा दी, बल्के वे यहूदा के सारे नगरां म्ह प्रजा नै सिखान्दे होए घूमे। 10 यहूदा कै आस्सै-पास्सै के देशां के राज्य-राज्य म्ह यहोवा का इसा डर समा ग्या, के उननै यहोशापात तै युद्ध ना करया। 11 कुछ पलिश्ती यहोशापात के धोरै भेंट अर कर समझकै चाँदी ल्याये; अर अरब के माणस भी सात हजार सात सौ मिंढे अर सात हजार सात सौ बकरे ले आए।

यहोशापात की सैन्यशक्ति

12 यहोशापात घणाए बढ़दा गया अर उसनै यहूदा म्ह किले अर भण्डार के नगर त्यार करे। 13 अर यहूदा के नगरां म्ह उसका घणा काम होवै था, अर यरुशलेम म्ह उसके योद्धा यानिके शूरवीर रहवैं थे। 14 इनके पितरां के कुण्बे कै मुताबिक इनकी या गिणती थी, यानिके यहूदा के गोत्र के सहस्त्रपति तो ये थे, प्रधान अदनह जिसकै गैल तीन लाख शूरवीर थे, 15 अर उसकै बाद प्रधान यहोहानान, जिसकै गैल दो लाख अस्सी हजार माणस थे। 16 अर इसकै बाद जिक्री का बेट्टा अमस्याह, जिसनै अपणे आप ताहीं अपणी ए इच्छा तै यहोवा ताहीं अर्पण करया था, उसकै गैल दो लाख शूरवीर थे। 17 फेर बिन्‍यामीन गोत्र म्ह तै एल्यादा नाम के एक शूरवीर, जिसकै गैल ढाल राक्खण आळे अर धनुर्धारी दो लाख थे। 18 अर उसकै नीच्‍चै यहोजाबाद, जिसकै गैल युद्ध के हथियार बाँधे होए एक लाख अस्सी हजार माणस थे। 19 ये वे सैं, जो राजा की सेवा म्ह लौलीन थे। ये उनतै न्यारे थे जिन ताहीं राजा नै सारे यहूदा परदेस के गढ़आळे नगरां म्ह ठहरा दिया।