1 यारोबाम के राज्य के अठारहवें साल म्ह अबिय्याह* यहूदा पै राज करण लाग्या। 2 वो तीन साल ताहीं यरुशलेम म्ह राज करदा रह्या, अर उसकी माँ का नाम मीकायाह था; जो गिबा नगर के ऊरीएल की बेट्टी थी।

फेर अबिय्याह अर यारोबाम कै बीच म्ह लड़ाई होई। 3 अबिय्याह नै तो बड़े योद्धाओं का दल, यानिके च्यार लाख छाँटे होए माणस लेकै लड़ण खात्तर पाँति बँधाई, अर यारोबाम नै आठ लाख छाँटे होए माणस जो बड़े शूरवीर थे, लेकै उसकै खिलाफ पाँति बँधाई। 4 फेर अबिय्याह समारैम नाम के पहाड़ पै, जो एप्रैम के पहाड़ी देश म्ह सै, खड्या होकै कहण लाग्या, "हे यारोबाम, हे सारे इस्राएलियों, मेरी सुणो। 5 के थमनै न्ही जाणणा चाहिए, के इस्राएल के परमेसवर यहोवा नै नूण आळे करार बाँधकै दाऊद ताहीं अर उसके वंश ताहीं इस्राएल का राज सदा खात्तर दे दिया सै*। 6 फेर भी नबात का बेट्टा यारोबाम जो दाऊद के बेट्टे सुलैमान का कर्मचारी था, वो अपणे स्वामी के खिलाफ उठ्या सै। 7 उसके धोरै हळके अर ओच्छे माणस कठ्ठे होगे सैं अर जिब सुलैमान का बेट्टा रहबाम छोरा अर अल्हड़ मन* का था अर उनका सामना ना कर सकै था, फेर वे उसकै खिलाफ सामर्थी होगे। 8 इब थम सोचो सो के हम यहोवा के राज का सामना करांगे, जो दाऊद की सन्तान के हाथ म्ह सै; क्यूँके थम सारे मिलकै बड़ा समाज बणगे सो अर तेरे धोरै वे सोन्‍ने के बाछड़े भी सैं जिन ताहीं यारोबाम नै थारे देवता होण खात्तर बणवाया। 9 के थमनै यहोवा के याजकां ताहीं, यानिके हारुन की सन्तान अर लेवियाँ ताहीं लिकाड़कै देश-देश के माणसां कै बराबर याजक नियुक्त न्ही कर लिए? जो कोए एक बाछड़ा अर सात मिंढे अपणा संस्कार कराण नै ले आन्दा, वो उनका याजक हो जावै सै जो ईश्वर न्ही सै*। 10 पर हम माणसां का परमेसवर यहोवा सै अर हमनै उस ताहीं न्ही नकारा, अर म्हारे धोरै यहोवा की सेवा टहल करण आळे याजक, हारुन की सन्तान अर अपणे-अपणे काम म्ह लाग्गे होए लेवीय सैं। 11 वे रोज सबेरै अर शाम नै यहोवा खात्तर होमबलि अर सुगन्ध-द्रव्य का धूप जळावैं सैं, अर शुद्ध मेज पै भेंट की रोट्टी सजावै अर सोन्‍ने की दीवट अर उसके दीवे साँझ-साँझ नै जळावैं सैं; हम तो अपणे परमेसवर यहोवा के हुकमां नै मान्दे रहे सां, पर थमनै उस ताहीं त्याग दिया सै। 12 देक्खो, म्हारे गैल म्हारा प्रधान परमेसवर सै, अर उसके याजक थारे खिलाफ साँस बाँधकै फूँकण नै तुरहियाँ लिये होए भी म्हारे गैल सैं। हे इस्राएलियों अपणे पूर्वजां के परमेसवर यहोवा तै मत लड़ो, क्यूँके थम सफल ना होओगे।"

13 पर यारोबाम नै घातकां ताहीं उनकै पाच्छै भेज दिया, वे तो यहूदा कै स्याम्ही थे, अर घातक उनकै पाच्छै थे। 14 जिब यहूदियाँ नै पाच्छै मुँह फेरया, तो देख्या के म्हारे आग्गै अर पाच्छै दोन्‍नु ओड़ तै लड़ाई होण आळी सै; फेर उननै यहोवा की दुहाई दी, अर याजक तुरहियाँ नै फूँकण लाग्गे। 15 फेर यहूदी माणसां नै जयजयकार करया, अर जिब यहूदी माणसां नै जयजयकार करया, फेर परमेसवर नै अबिय्याह अर यहूदा कै स्याम्ही, यारोबाम अर सारे इस्राएलियाँ ताहीं मारया। 16 फेर इस्राएली यहूदा कै स्याम्ही तै भाज्जे, अर परमेसवर नै उन ताहीं उनके हाथ म्ह कर दिया। 17 अबिय्याह अर उसकी प्रजा नै उन ताहीं बड़ी मार तै मारया, उरै ताहीं के इस्राएल म्ह तै पाँच लाख छाँटे होए माणस मारे गए। 18 उस बखत तो इस्राएली दबगे, अर यहूदा की सेना इस कारण हावी होई के उननै अपणे पितरां के परमेसवर यहोवा पै भरोस्सा राख्या था। 19 फेर अबिय्याह नै यारोबाम का पिच्छा करकै उसतै बेतेल, यशाना अर एप्रोन नगरां अर उनके गाम्मां ताहीं ले लिया। 20 अबिय्याह के जीवन भर यारोबाम फेर सामर्थी ना होया; अर यहोवा नै उस ताहीं इसा मारया* के वो मर ग्या। 21 पर अबिय्याह और भी सामर्थी होग्या अर चौदाह जनान्‍नी ब्याह ली जिनतै बाईस बेट्टे अर सोलह बेट्टी पैदा होई। 22 अबिय्याह के काम अर उसका चाल चलण, अर उसके वचन, इद्दो नबी की कथा म्ह लिखे सैं।