2 इतिहास 24

योआश का राज्य

1 जिब योआश राजा होया, फेर वो सात साल का था, अर यरुशलेम म्ह चाळीस साल ताहीं राज करदा रह्या। उसकी माँ का नाम सिब्या था, जो बेर्शेबा शहर की थी। 2 जिब ताहीं यहोयादा याजक जिन्दा रह्या, जिब ताहीं योआश वो काम करदा रह्या जो यहोवा की नजर म्ह ठीक सै। 3 यहोयादा नै उसके दो ब्याह कराए अर उसतै बेट्टे-बेटियाँ पैदा होई।

मन्दर की मरम्मत

4 इसकै बाद योआश के मन म्ह यहोवा के भवन की मरम्मत करण की इच्छा होई। 5 फेर उसनै याजकां अर लेवियाँ ताहीं कठ्ठा करकै कह्या, "हर साल यहूदा के नगरां म्ह जा-जाकै सारे इस्राएलियाँ तै रपिये लिया करो जिसतै थारे परमेसवर के भवन की मरम्मत हो; देक्खो इस काम म्ह फुर्ती करो।" फेर भी लेवियाँ नै किमे फुर्ती ना करी। 6 फेर राजा नै यहोयादा महायाजक ताहीं बुलवाकै पूच्छया, "के कारण सै के तन्‍नै लेवियाँ ताहीं मजबूत हुकम ना दिया के वे यहूदा अर यरुशलेम तै उस चन्दे के रपिये ले आवैं जिसका नियम यहोवा के दास मूसा अर इस्राएल की मण्डळी नै साक्षीपत्र के तम्बू कै बारै म्ह चलाया था।" 7 उस दुष्ट जनान्‍नी अतल्याह के बेट्यां नै तो परमेसवर के भवन ताहीं तोड़ दिया था, अर यहोवा के भवन की सारी पवित्र करी होई चीज बाल देवत्यां खात्तर इस्तमाल करी थी।

8 राजा नै एक सन्दूक बणाण का हुकम दिया अर वो यहोवा के भवन कै फाटक कै धोरै बाहर धर दिया गया। 9 फेर यहूदा अर यरुशलेम म्ह यो प्रचार करया गया के जिस चन्दे का नियम परमेसवर के दास मूसा नै जंगळ म्ह इस्राएल म्ह चलाया था, उसके रपिये यहोवा के निमित्त ले आओ। 10 तो सारे हाकिम अर प्रजा के सारे माणस आनन्दित हो रपिये ल्याकै जिब तक चन्दा पूरा ना होया जिब ताहीं सन्दूक म्ह गेरदे गए। 11 जिब-जिब वो सन्दूक लेवियाँ कै हाथ तै राजा के प्रधानां कै धोरै पोहचाया जान्दा अर यो जाण पड़ै था के उस म्ह रपिये घणे सैं, जद-जद राजा के प्रधान अर महायाजक के अधिकारी आकै सन्दूक नै खाल्‍ली करदे अर फेर उसनै उसकी जगहां पै धर देवैं थे। उननै रोज इसाए करया अर घणे रपिये कठ्ठे करे। 12 फेर राजा अर यहोयादा नै वो रपिये यहोवा के भवन म्ह काम करण आळयां ताहीं दे दिए, अर उननै राजमिस्त्रियाँ अर बढ़ईयां ताहीं यहोवा के भवन के सुधारण खात्तर, लोहारां अर ठठेरयां ताहीं यहोवा के भवन की मरम्मत करण खात्तर मजदूरी पै राख्या। 13 कारीगर काम करदे गए अर काम पूरा होन्दा गया, अर उननै परमेसवर का भवन जिसा का तीसा बणाकै मजबूत कर दिया। 14 जिब उननै वो काम पूरा कर लिया, फेर वे बाकी रपिये राजा अर यहोयादा कै धोरै लेगे, अर उनतै यहोवा के भवन खात्तर बरतन बणाए गए, यानिके सेवा टहल करण अर होमबलि चढ़ाण के बरतन अर धूपदान बाकी सोन्‍ने-चाँदी के बरतन। जिब ताहीं यहोयादा जिन्दा रह्या, जिब ताहीं यहोवा के भवन म्ह होमबलि रोज चढ़ाए जावैं थे।

यहोयादा की मौत अर योआश का परमेसवर की और तै मुड़णा

15 पर यहोयादा बूढ़ा होग्या अर लम्बी उम्र का होकै मर ग्या। जिब वो मरया जिब एक सौ तीस साल का था। 16 अर दाऊदपुर म्ह राजयां कै बीच म्ह उसतै माट्टी दी*24:16 राजयां कै बीच म्ह उसतै माट्टी दी यो अव्दैत आदर एक सीमा ताहीं यहोयादा के धार्मिक चरित्र के कारण था। गई, क्यूँके उसनै इस्राएल म्ह अर परमेसवर के अर उसके भवन कै बारै म्ह भला करया था।

17 यहोयादा के मरण कै बाद यहूदा के हाकिमां नै राजा योआश कै धोरै जाकै उस ताहीं दण्डवत करया, अर राजा नै उनकी मान्‍नी। 18 फेर यहूदा के माणस अपणे पितरां के परमेसवर यहोवा का भवन छोड़कै अशेरां अर मूरतां की उपासना करण लाग्गे। आखर उनके इस्से दोषी होण कै कारण परमेसवर का गुस्सा यहूदा अर यरुशलेम पै भड़क्या। 19 फेर भी उसनै उनकै धोरै नबी भेज्जे के उननै यहोवा कै धोरै मोड़ ल्यावै; अर इननै उन ताहीं चिता दिया, पर उननै कान ना लगाया।

20 फेर परमेसवर का आत्मा यहोयादा याजक के बेट्टे जकर्याह म्ह समा ग्या, अर वो ऊँच्‍ची जगहां पै खड्या होकै माणसां तै कहण लाग्या,*24:20 वो ऊँच्‍ची जगहां पै खड्या होकै माणसां तै कहण लाग्या, जकर्याह, जो प्रधान पुरोहित था ऊँच्‍ची जगहां पर शायद भीतरी आँगण की सीढ़ियाँ पै जो बाहरी आँगण से ऊँच्‍ची थी, खड्या होया। माणस बाहरी आँगण म्ह थे। "परमेसवर न्यू कहवै सै, के थम यहोवा के हुकमां नै क्यूँ टाळो सो? इसा करकै थारा भला न्ही हो सकदा। देक्खो, थमनै तो यहोवा ताहीं त्याग दिया सै, इस कारण उसनै भी थारे ताहीं त्याग दिया।" 21 फेर माणसां नै उसकै खिलाफ द्रोह की बात करकै, राजा के हुकम तै यहोवा के भवन के आँगण म्ह जकर्याह पै पथराव करया। 22 इस तरियां राजा योआश नै वो प्यार भूलकै जो यहोयादा नै उसतै करया था, उसके बेट्टे ताहीं मरवा दिया। मरदे बखत उसनै कह्या, "यहोवा इसपै नजर करकै इसका लेखा ले।"

अरामियां का आक्रमण

23 नये साल कै लागदे अरामियां की सेना नै उसपै चढ़ाई करी, अर यहूदा अर यरुशलेम आकै प्रजा म्ह तै सारे हाकिमां ताहीं नाश करया अर उनका सारा धन लूट कै दमिश्क*24:23 दमिश्क दमिश्क सीरिया की राजधानी थी जित्त सीरिया राजा रह्या करदे के राजा कै धोरै भेज्या। 24 अरामियां की सेना थोड़े ए सैनिकां कै गैल तो आई, पर यहोवा नै एक भोत बड़ी सेना उनकै हाथ कर दी, क्यूँके उननै अपणे पितरां के परमेसवर ताहीं त्याग दिया था। इस तरियां राजा योआश नै भी उन ताहीं दण्ड दिया।*24:24 योआश नै भी उन ताहीं दण्ड दिया। उसकी सेना की पराजय, राजकुमारां का वध अर वे यरुशलेम म्ह घुस आए। (2 राजा 12:18)

योआश की हत्या

25 जिब वे उसनै घणाए घायल हालत म्ह छोड़गे, फेर उसके कर्मचारियाँ नै यहोयादा याजक के बेट्टे के खून कै कारण उसतै द्रोह की बात करकै, उस ताहीं उसके बिछोणे पैए इसा मारया, के वो मर ग्या; अर उननै उस ताहीं दाऊदपुर म्ह माट्टी दी, पर राजयां के कब्रिस्तान म्ह न्ही। 26 जिननै उसतै राजद्रोह की योजना करी, वे ये थे, यानिके अम्मोनिन शिमात का बेट्टा जाबाद अर शिम्रित, मोआबिन का बेट्टा यहोजाबाद। 27 योआश के बेट्यां कै बारै म्ह अर उसकै खिलाफ, जो बड़ी सजा की नबूवत होई, उसके अर परमेसवर के भवन के बणण के बारै म्ह ये सारी बात राजयां के वृत्तान्त की किताब म्ह लिक्खी सैं। फेर उसका बेट्टा अमस्याह उसकी जगहां पै राजा होया।