1 जिब राजा हिजकिय्याह यहूदा म्ह राज करण लाग्या जिब वो पच्‍चीस साल का था, अर उणतीस साल ताहीं यरुशलेम म्ह राज करदा रह्या। अर उसकी माँ का नाम अबिय्याह था, जो जकर्याह की बेट्टी थी। 2 जिस तरियां उसके मूलपुरुष दाऊद नै करया था यानिके जो यहोवा की नजर म्ह ठीक था उस्से तरियां उसनै भी करया।

3 अपणे राज के पैहले साल के पैहले महिन्‍ने म्ह उसनै यहोवा के भवन के द्वार खुलवा दिए, अर उनकी मरम्मत भी कराई। 4 फेर उसनै याजकां अर लेवियाँ ताहीं ल्याकै मन्दर के पूर्व के चौक म्ह कठ्ठा करया। 5 अर उनतै कहण लाग्या, "हे लेवियो, मेरी सुणो! इब अपणे-अपणे नै पवित्र करो*, अर अपणे पूर्वजां के परमेसवर यहोवा के भवन नै पवित्र करो, अर पवित्र जगहां म्ह तै मैल लिकाड़ो। 6 देक्खो म्हारे पुरखां नै बिश्वासघात करकै वो काम करया था, जो म्हारे परमेसवर यहोवा की नजर म्ह बुरा सै अर उसनै छोड़कै यहोवा के निवास तै मुँह फेरकै उस ताहीं पीठ दिखाई थी। 7 फेर उननै मंदर के ओसारे के द्वार बन्द करे, अर दीव्यां ताहीं बुझा दिया था; अर पवित्र जगहां म्ह इस्राएल के परमेसवर खात्तर ना तो धूप जळाया अर ना होमबलि चढ़ाया था। 8 ज्यांतै यहोवा का छो यहूदा अर यरुशलेम पै भड़क्या सै, अर उसनै इसा करया, के वे मारे-मारे फिरे अर हैरान होण अर ताड़ी बजाण का कारण हो जावैं, जिस तरियां के थम अपणी आँखां तै देख रहे सो। 9 देक्खो, इस कारण म्हारे बाप तलवार तै मारे गए, अर म्हारे बेट्टे-बेटियाँ अर जनानियाँ बँधुआई म्ह चली गई सैं। 10 इब मेरे मन नै यो फैसला करया सै के इस्राएल के परमेसवर यहोवा तै करार बाँध्धू, ज्यांतै कै उसका भड़क्या होया छो म्हारे पै तै दूर हो ज्या। 11 हे मेरे बेट्टयों, ढिलाई ना करो; देक्खो, यहोवा नै अपणे स्याम्ही खड़े रहण, अर अपणी सेवा पाणी करण, अर अपणे सेवादार अर धूप जळाण आळे का काम करण खात्तर थारे ताहीं चुण लिया सै।"

12 फेर लेवीय उठ खड़े होए: यानिके कहातियाँ म्ह तै अमासै का बेट्टा महत, अर अजर्याह का बेट्टा योएल, अर मरारियाँ म्ह तै अब्दी का बेट्टा कीश, अर यहल्‍लेलेल का बेट्टा अजर्याह, अर गेर्शोनियाँ म्ह तै जिम्मा का बेट्टा योआह, अर योआह का बेट्टा एदेन। 13 अर एलीसापान की सन्तान म्ह तै शिम्री, अर यूएल अर आसाप की सन्तान म्ह तै जकर्याह अर मत्तन्याह। 14 अर हेमान की सन्तान म्ह तै यहूएल अर शिमी, अर यदूतून की सन्तान म्ह तै शमायाह अर उज्जीएल। 15 इननै अपणे लेवी भाईयाँ ताहीं कठ्ठा करया अर अपणे-आपनै पवित्र करकै राजा के उस हुकम कै मुताबिक जो उसनै यहोवा तै वचन पाकै दिया था, यहोवा का भवन शुद्ध करण खात्तर भित्तर गए। 16 फेर याजक यहोवा के भवन के भीत्तरी भाग नै शुद्ध करण खात्तर उस म्ह जाकै यहोवा के मन्दर म्ह जितनी अशुद्ध चीज मिली उन सारियां ताहीं लिकाड़कै यहोवा के भवन के आँगण म्ह लेगे, अर लेवियाँ नै उन ताहीं ठाकै बाहर किद्रोन के नाळे म्ह पोंहचा दिया। 17 पैहले महिन्‍ने के पैहले दिन म्ह उननै पवित्र करण का काम शरु करया, अर उसे महिन्‍ने के आठवें दिन म्ह वे यहोवा के मंदर के ओसारे ताहीं आगे। इस तरियां उननै यहोवा के भवन ताहीं आठ दिन म्ह पवित्र करया, अर पैहले महिन्‍ने के सोलहवें दिन म्ह उननै उस काम ताहीं पूरा करया*। 18 फेर उननै राजा हिजकिय्याह कै धोरै भित्तर जाकै कह्या, "हम यहोवा के पूरे भवन नै अर बरतनां समेत होमबलि की वेदी, अर भेंट की रोट्टी की मेज नै भी शुद्ध कर चुके। 19 जितने बरतन राजा आहाज नै अपणे राज म्ह बिश्वासघात करकै फेंक दिए थे, उन ताहीं भी हमनै ठीक करकै पवित्र करया सै; अर वे यहोवा की वेदी कै स्याम्ही धरे होए सैं।"

20 फेर राजा हिजकिय्याह सबेरै उठकै नगर के हाकिमां नै कठ्ठा करकै, यहोवा के भवन म्ह गया। 21 फेर वे राज्य अर पवित्र जगहां अर यहूदा कै बारै म्ह सात बाछड़े, सात मिंढे, सात भेड़ के बच्‍चे होमबलि कै खात्तर, अर पापबलि कै खात्तर सात बकरे ले आए, अर उसनै हारुन की सन्तान के लेवियाँ ताहीं हुकम दिया के इन सारया नै यहोवा की वेदी पै चढ़ावैं।* 22 फेर उननै बाछड़े बलि करे, अर याजकां नै उनका खून लेकै वेदी पै छिड़क दिया; फेर उननै मिंढे बलि करे, अर उनका खून भी वेदी पै छिड़क दिया, अर भेड़ के बच्‍चे बलि करे, अर उनका भी खून वेदी पै छिड़क दिया। 23 फेर वे पापबलि के बकरयां नै राजा अर मण्डळी कै धोरै ले आए अर उनपै अपणे-अपणे हाथ धरे। 24 फेर याजकां नै उन ताहीं बलि करकै, उनका खून वेदी पै छिड़क कै पापबलि करया, जिसतै सारे इस्राएल खात्तर प्रायश्चित करया जावै। क्यूँके राजा हिजकिय्याह नै सारे इस्राएल खात्तर होमबलि अर पापबलि करे जाण का हुकम दिया था।

25 फेर उसनै दाऊद अर राजा के दर्शी गाद, अर नातान नबी के हुकम कै मुताबिक जो यहोवा की और तै उसके नबियाँ के जरिये आई थी, झाँझ, सारंगियाँ अर वीणा लिए होए लेवियाँ ताहीं यहोवा के भवन म्ह खड्या करया। 26 फेर लेवीय दाऊद के चलाए बाज्जे लिए होए, अर याजक तुरही लिए होए मन्दर के आस्सै-पास्सै खड़े होए। 27 फेर हिजकिय्याह नै वेदी पै होमबलि चढ़ाण का हुकम दिया, अर जिब होमबलि चढ़ण लाग्गी, फेर यहोवा का गीत शरु होया, अर तुरही अर इस्राएल के राजा दाऊद के बाज्जे बाज्जण लाग्गे;

28 अर मण्डळी के सारे माणस दण्डवत करदे अर गाणआळे गान्दे अर तुरही फूँकण आळे फूँकदे रहे; यो सारा जिब ताहीं होन्दा रह्या, जिब ताहीं होमबलि चढ़ ना चुकी। 29 जिब बलि चढ़ चुकी, फेर राजा अर जितने उसकै गैल ओड़ै थे, उन सारया नै सिर झुकाकै दण्डवत करया। 30 राजा हिजकिय्याह अर हाकिमां नै लेवियाँ ताहीं हुकम दिया, के दाऊद अर आसाप दर्शी के भजन गाकै यहोवा की स्तुति करैं। आखर उननै आनन्द कै गैल स्तुति करी अर सिर झुकाकै दण्डवत करया।

31 फेर हिजकिय्याह कहण लाग्या, "इब थमनै यहोवा के निमित्त अपणा अर्पण करया सै*; ज्यांतै धोरै आकै यहोवा के भवन म्ह मेलबलि अर धन्यवाद-बलि पोहोचाओ।" फेर मण्डळी के माणसां नै मेलबलि अर धन्यवाद-बलि पोंहचा दिए, अर जितने अपणी इच्छा तै देणा चावै थे उननै भी होमबलि पोहचाये*। 32 जो होमबलि पशु मण्डळी के माणस ले आए, उनकी गिणती या थी; सत्तर बळध, एक सौ मिंढे, अर दो सौ भेड़ के बच्‍चे; ये सारे यहोवा कै स्याम्ही होमबलि कै काम म्ह आए। 33 पवित्र करे होए पशु, छः सौ बळध अर तीन हजार भेड़-बकरी थी। 34 पर याजक इतणे थोड़े थे, के वे सारे होमबलि पशुआं की खाल ना तार सके, फेर उनके भाई लेवीय उस बखत ताहीं उनकी मदद करदे रहे जिब ताहीं वो काम पूरा ना होग्या; अर याजकां नै अपणे आप ताहीं पवित्र ना करया; क्यूँके लेवीय अपणे-आपनै पवित्र करण खात्तर पवित्र याजकां तै भोत सीध्धे मन के थे। 35 फेर होमबलि पशु भोत थे, अर मेलबलि-पशुआं की चर्बी भी घणी थी, अर एक-एक होमबलि कै गैल अर्घ भी देणा पड़या। आखर यहोवा के भवन म्ह की उपासना ठीक करी गई। 36 फेर राजा हिजकिय्याह अर यहूदा के सारे माणस उस काम के कारण आनन्दित होए, जो यहोवा नै अपणी प्रजा कै खात्तर त्यार करया था; क्यूँके वो काम तावळी होग्या था।