1 इब सुलैमान नै यहोवा के नाम का एक भवन अर अपणा राजभवन बणाण का विचार करया। 2 ज्यांतै सुलैमान नै सत्तर हजार बो‍झ्झा ढोणआळे अर अस्सी हजार पहाड़ तै पत्थर काटण आळे अर पेड़ काटण आळे, अर इन पै तीन हजार छः सौ मुखिए गिणती करकै ठहराए। 3 फेर सुलैमान नै सोर के राजा हीराम कै धोरै कुह्वा भेज्या, "जिसा तन्‍नै मेरे पिता दाऊद तै बरताव करया, यानिके उसके रहण का भवन बणाण खात्तर देवदार भेज्जे थे, उस्से तरियां ए इब मेरे तै भी बरताव कर। 4 देख, मै अपणे परमेसवर यहोवा के नाम का एक भवन बणाऊँ सूं, के उसनै उसकै खात्तर पवित्र करुँ अर उसके स्याम्ही खुशबुदार धूप जळाऊँ, अर रोज भेंट की रोट्टी उस म्ह धरी जावै; अर रोज सबेरै अर शाम नै, अर विश्राम अर नये चाँद के दिनां म्ह अर म्हारे परमेसवर यहोवा के सारे त्यौहारां* म्ह होमबलि चढ़ाया जावै। इस्राएल खात्तर इसीए सदा की विधि सै। 5 जो भवन मै बणाण पै सूं, वो महान होवैगा; क्यूँके म्हारा परमेसवर सारे देवत्यां म्ह महान सै। 6 पर किसे म्ह इतणी शक्ति सै, के उसकै खात्तर भवन बणावै, वो तो सुर्ग म्ह बल्के सबतै ऊँच्‍चे सुर्ग म्ह भी न्ही समान्दा? मै के सूं के उसके स्याम्ही धूप जळाण नै छोड़ और किस विचार तै उसका भवन बणाऊँ? 7 इस करकै इब तू मेरे धोरै एक इसा माणस भेजदे, जो सोन्‍ने, चाँदी, पीतळ, लोहे अर बैंगनी, लाल अर नीले कपड़े की कारीगरी म्ह निपुण हो अर नक्‍काशी भी जाणदा हो, के वो मेरे पिता दाऊद के ठहराए होए निपुण माणसां के गैल होकै जो मेरे धोरै यहूदा अर यरुशलेम म्ह रहवैं सैं, काम करै। 8 फेर लबानोन तै मेरे धोरै देवदार, सनोवर अर चन्दन की लाकड़ी भेजणा, क्यूँके मै जाणु सूं के तेरे दास लबानोन म्ह पेड़ काटणा जाणै सैं, अर तेरे दास्सां के गैल मेरे दास भी रहकै*, 9 मेरे खात्तर भोत सी लाकड़ी त्यार करैगें, क्यूँके जो भवन मै बणाणा चाऊँ सूं, वो बड़ा अर अचम्भे के लायक होवैगा। 10 तेरे दास जो लाकड़ी काटैगें, उननै मै बीस हजार कोर कुट्या होया गेहूँ, बीस हजार कोर जौ, बीस हजार बत दाखमधु अर बीस हजार बत तेल देऊँगा।"

11 फेर सोर के राजा हीराम नै चिट्ठी लिखकै सुलैमान कै धोरै भेज्जी: "यहोवा अपणी प्रजा तै प्यार करै सै, इस करकै उसनै तेरे ताहीं उनका राजा कर दिया।" 12 फेर हीराम नै यो भी लिख्या, "धन्य सै इस्राएल का परमेसवर यहोवा, जो अकास अर धरती का बणाण आळा सै, अर उसनै दाऊद राजा ताहीं एक बुद्धिमान, होशियार अर समझदार बेट्टा दिया सै, ताके वो यहोवा का एक भवन अर अपणा राजभवन भी बणावै। 13 इस करकै इब मै एक बुद्धिमान अर समझदार माणस नै, यानिके हूराम-अबी नै भेज्जू सूं, 14 जो एक दान-वंशी जनान्‍नी का बेट्टा सै, अर उसका पिता सोर* का था। वो सोन्‍ने, चाँदी, पीतळ, लोहे, पत्थर, लाकड़ी, बैंगनी अर नीले अर लाल अर सूक्ष्म सण के कपड़े का काम, अर सारी ढाळ की नक्‍काशी नै जाणै अर सारी ढाळ की कारीगरी बणा सकै सै: ज्यांतै तेरे होशियार माणसां के गैल, अर मेरे प्रभु तेरे पिता दाऊद के होशियार माणसां के गैल, उसनै भी काम मिलै। 15 मेरे प्रभु नै जो गेहूँ, जौ, तेल अर दाखमधु भेजण की चर्चा करी सै, उसनै अपणे दास्सां कै धोरै भिजवा दे। 16 अर जितनी लाकड़ी की तन्‍नै जरूरत हो उतणी लबानोन पै तै हम काटांगें, अर बेड़े बणवाकै समुन्दर कै रास्ता तै याफा म्ह पोहचावांगे, अर तू उसनै यरुशलेम म्ह ले जाणा।"

17 फेर सुलैमान नै इस्राएली देश के सारे परदेशियाँ* की गिणती ली, यो उस गिणती कै बाद होई जो उसके पिता दाऊद नै ली थी; अर वे एक लाख तरेपन हजार छः सौ माणस लिकड़े। 18 उन म्ह तै उसनै सत्तर हजार बोझ ढोणआळे, अस्सी हजार पहाड़ पै पत्थर काटण आळे अर पेड़ काटण आळे अर तीन हजार छः सौ उन माणसां तै काम कराण आळे मुखिया ठैहराये।