2 इतिहास 12

मिस्री राजा शीशक का यहूदा पै आक्रमण

1 पर जिब रहबाम का राज्य मजबूत होग्या, अर वो आप मजबूत होग्या, फेर उसनै अर उसके गैल सारे इस्राएल नै यहोवा के नियम-कायदे ताहीं त्याग दिया। 2 उननै जो यहोवा तै बिश्वासघात करया, इस कारण राजा रहबाम के राज्य के पाँचवें साल म्ह मिस्र के राजा शीशक नै, 3 बारहा सौ रथ अर साठ हजार सवार लिये होए यरुशलेम पै चढ़ाई करी, अर जो माणस उसकै गैल मिस्र तै आए, यानिके लूबी, सुक्‍किय्यी, कूशी, ये अनगिणत थे। 4 उसनै यहूदा के गढ़आळे नगरां ताहीं ले लिया, अर यरुशलेम म्ह आया। 5 फेर शमायाह नबी रहबाम अर यहूदा के हाकिमां कै धोरै जो शीशक के डर के मारे यरुशलेम म्ह कठ्ठे होए थे, आकै कहण लाग्या, "यहोवा न्यू कहवै सै, के थमनै मेरे ताहीं छोड़ दिया सै, ज्यांतै मन्‍नै थारे ताहीं छोड़कै शीशक के हाथ म्ह कर दिया सै।" 6 फेर इस्राएल के हाकिम अर राजा दीन होगे, अर कह्या, "यहोवा धर्मी सै*12:6 यहोवा धर्मी सै उननै जो दण्ड मिल्या उस म्ह उन ताहीं उचित न्याय देख्या।।" 7 जिब यहोवा नै देख्या के यहूदा के लोग दीन होए सैं, फेर यहोवा का यो वचन शमायाह कै धोरै पोहच्या "वे दीन हो गए सैं, मै उननै नाश न्ही करुँगा; मै उनका किमे बचाव करुँगा*12:7 बचाव करुँगा प्रायश्चित के कारण तात्कालिक विनाश का भय दूर हो गया था। , अर मेरी जलजलाहट शीशक के जरिये यरुशलेम पै ना भड़कैगी। 8 फेर भी वे उसके अधीन रहवैगें, ताके वे मेरी अर देश-देश के राज्याँ की भी सेवा म्ह अन्तर नै जाण लें।"

9 फेर मिस्र का राजा शीशक यरुशलेम पै चढ़ाई करकै यहोवा के भवन की अनमोल चिज्जां नै अर राजभवन की अनमोल चिज्जां नै ठा लेग्या। वो सारा किमे ठा लेग्या, अर सोन्‍ने की जो ढाल सुलैमान नै बणाई थी, उननै भी वो लेग्या। 10 फेर राजा रहबाम नै उनकै बदलै पीतळ की कई ढाल बणवाई अर उन ताहीं पहरुआं के प्रधानां के हाथ म्ह सौंप दिया, जो राजभवन के द्वार की रुखाळी करया करदे। 11 जिब-जिब राजा यहोवा के भवन म्ह जान्दा, तब-तब रुखाळे आकै उननै ठा ले चाल्दे, अर फेर पहरुआं की कोठड़ी म्ह बोहड़कै धर देन्दे। 12 जिब रहबाम दीन होया, फेर यहोवा का गुस्सा उसपै तै उतर ग्या, अर उसनै उसका पूरा नाश न्ही करया; अर यहूदा की हालत किमे आच्छी भी थी।

रहबाम का आखरी बखत

13 आखर राजा रहबाम यरुशलेम म्ह मजबूत होकै राज करदा रह्या। जिब रहबाम राज करण लाग्या, तब इकताळीस साल की उम्र का था, अर यरुशलेम म्ह यानिके उस नगर म्ह, जिस ताहीं यहोवा नै अपणा नाम बणाए राक्खण खात्तर इस्राएल के सारे गोत्र म्ह तै छाँट लिया था, सत्रह साल ताहीं राज करदा रह्या। उसकी माँ का नाम नामाह था, जो अम्‍मोनी जनान्‍नी थी। 14 रहबाम वो काम करया जो बुरा सै, यानिके उसनै अपणे मन ताहीं यहोवा की खोज म्ह ना लगाया। 15 शरु तै आखरी ताहीं रहबाम के काम शमायाह नबी अर इद्दो दर्शी की किताबां म्ह वंशावलियाँ की रीति पै लिक्खे सैं। रहबाम अर यारोबाम के बीच तो लड़ाई सदा होन्दी रही। 16 अर रहबाम मरकै अपणे पुरखां कै गैल जा मिल्या अर दाऊदपुर म्ह उस ताहीं माट्टी दी गई। अर उसका बेट्टा अबिय्याह उसकी जगहां पै राज करण लाग्या।