1 जिब आहाज राज करण लाग्या जिब वो बीस साल का था, अर सोळाह साल ताहीं यरुशलेम म्ह राज करदा रह्या। अर अपणे मूलपुरुष दाऊद के बराबर काम न्ही करया, जो यहोवा की नजर म्ह ठीक था, 2 पर वो इस्राएल के राजयां की जिसी चाल चाल्या, अर बाल देवत्यां की मूर्ति ढळवाकै बणाई; 3 अर हिन्‍नोम के बेट्टे की तराई म्ह धूप जळाया, अर उन जातियाँ के घिनोणे काम्मां कै मुताबिक जिन ताहीं यहोवा नै इस्राएलियाँ कै स्याम्ही देश म्ह तै लिकाड़ दिया था, अपणे बाळकां ताहीं आग म्ह होम कर दिया। 4 ऊँच्‍ची जगहां पै, अर पहाड़ियाँ पै, अर सारे हरे दरखतां कै तळै वो बलि चढ़ाया अर धूप जळाया करै था।

5 ज्यांतै उसके परमेसवर यहोवा नै राजा आहाज ताहीं अरामियां के राजा के हाथ कर दिया, अर वे उस ताहीं जीत कै, उसके भोत-से माणसां नै बन्दी बणाकै दमिश्क* म्ह लेगे। अर वो इस्राएल के राजा के बस म्ह कर दिया गया, जिसनै उस ताहीं बड़ी मार तै मारया। 6 रमल्याह के बेट्टे इस्राएल का राजा पेकह नै, यहूदा म्ह एके दिन म्ह एक लाख बीस हजार माणसां ताहीं जो सारे के सारे वीर थे, घात करया, क्यूँके उननै अपणे पितरां के परमेसवर यहोवा ताहीं त्याग दिया था।* 7 जिक्री नाम के एक एप्रैमी वीर नै मासेयाह नाम के एक राजपुत्र ताहीं, अर राजभवन के प्रधान अज्रीकाम ताहीं, अर एल्काना ताहीं, जो राजा का मंत्री था, मार गेरया।

8 इस्राएली अपणे भाईयाँ म्ह तै जनानियाँ, बेट्यां अर बेट्टियाँ ताहीं मिलाकै दो लाख माणसां नै बन्दी बणाकै, अर उनकी भोत लूट भी छीनकै सामरिया की और ले चाल्‍ले। 9 पर ओड़ै ओदेद नाम का यहोवा का एक नबी था; वो सामरिया म्ह आण आळी सेना तै मिलकै उनतै कहण लाग्या, "सुणो, थारे पितरां के परमेसवर यहोवा नै यहूदियाँ पै झुँझळा कै उन ताहीं थारे हाथ कर दिया सै, अर थमनै उनतै इसा छो करकै घात करया जिसकी चीख सुर्ग ताहीं पोहचगी सै*। 10 इब थमनै ठाण्या सै के यहूदियाँ अर यरुशलेमियाँ नै अपणे दास-दास्सी बणाकै दबाए राक्खो। के थम भी अपणे परमेसवर यहोवा कै उरै दोषी ना हो? 11 इस खात्तर इब मेरी सुणो अर इन बन्दियाँ नै जिन ताहीं थम अपणे भाईयाँ म्ह तै बन्दी बणाकै ले आए सो, बोहड़ा द्यो, यहोवा का गुस्सा तो थारे पै भड़क्या सै।" 12 फेर एप्रैमियां के कुछ खास आदमी यानिके योहानान का बेट्टा अजर्याह, मशिल्‍लेमोत का बेट्टा बेरेक्याह, शल्‍लूम का बेट्टा यहिजकिय्याह, अर हदलै का बेट्टा अमासा, लड़ाई तै आण आळयां का सामना करकै, उनतै कहण लाग्गे। 13 "थम इन बन्दियाँ नै उरै ना ल्याओ; क्यूँके थमनै वा बात ठाणी सै जिसके कारण हम यहोवा के उरै दोषी हो जावैंगे, अर उसतै म्हारा पाप और दोष बढ़ जावैगा, म्हारा दोष तो बड़ा सै अर इस्राएल पै भोत छो भड़क्या सै।" 14 फेर उन हथियारबन्दा नै बन्दियाँ अर लूट ताहीं हाकिमां अर सारी सभा कै स्याम्ही छोड़ दिया। 15 फेर जिन माणसां के नाम उप्पर लिखे सैं, उननै उठकै बन्दियाँ ताहीं ले लिया, अर लूट म्ह तै सारे नंगे माणसां ताहीं कपड़े, अर जूत्ती पिराई; अर खाणा खळाया, अर पाणी पिलाया, अर तेल मळ्या; अर फेर कमजोर माणसां ताहीं गध्यां पै चढ़ाकै, यरीहो तक जो खजूर का नगर कुह्वावै सै, उनके भाईयाँ कै धोरै पोंहचा दिया। फेर वे सामरिया म्ह बोहड़ आए।

16 कुछ बखत बाद राजा आहाज नै अश्शूर के राजयां कै धोरै दूत भेजकै मदद माँगी। 17 क्यूँके एदोमियां नै यहूदा म्ह आकै उस ताहीं मारया, अर बन्दियाँ नै लेगे थे। 18 पलिश्तियाँ नै नीच्‍चै के देश अर यहूदा के दक्षिण के नगरां पै चढ़ाई करकै, बेतशेमेश, अय्यालोन अर गदेरोत ताहीं, अर अपणे-अपणे गामां समेत सोको, तिम्नाह, अर गिमजो ताहीं ले लिया; अर उन म्ह रहण लाग्गे थे। 19 आखर यहोवा नै इस्राएल के राजा आहाज कै कारण यहूदा ताहीं दबा दिया, क्यूँके वो निरंकुश होकै चाल्या, अर यहोवा तै बड़ा बिश्वासघात करया।* 20 फेर अश्शूर का राजा तिग्लत्पिलेसेर उसकै खिलाफ आया, अर उस ताहीं कष्ट दिया; मजबूत न्ही करया। 21 आहाज नै तो यहोवा के भवन अर राजभवन अर हाकिमां के घरां म्ह तै धन लिकाड़कै अश्शूर के राजा ताहीं दिया, पर इसतै उसनै कुछ मदद न्ही होई।

22 क्ळेश के बखत राजा आहाज नै यहोवा तै और भी बिश्वासघात करया। 23 उसनै दमिश्क के देवत्यां खात्तर जिन्हनै उस ताहीं मारया था, बलि चढ़ाया; क्यूँके उसनै यो सोच्या, के अरामी राजयां के देवत्यां नै उनकी मदद करी, तो मै उनके खात्तर बलि चढ़ाऊँगा के वे मेरी मदद करैं। पर वे उसके अर सारे इस्राएल के पतन का कारण होए। 24 फेर आहाज नै परमेसवर के भवन के बरतन कठ्ठे करकै तुड़वा दिये, अर यहोवा के भवन के द्वारां ताहीं बन्द कर दिया; अर यरुशलेम के सारे कुण्यां म्ह देवत्यां कै खात्तर वेदी बणाई। 25 यहूदा के एक-एक नगर म्ह उसनै पराए देवत्यां ताहीं धूप जळाण खात्तर ऊँच्‍ची जगहां बणाई, अर अपणे पितरां के परमेसवर यहोवा तै रिस दिलाई। 26 उसके और काम्मां, अर शरु तै अन्त ताहीं उसका पूरा चाल चलण का बखान यहूदा अर इस्राएल के राजयां के इतिहास की किताब म्ह लिख्या सै। 27 अन्त म्ह आहाज मरकै अपणे पुरखां कै गैल जा मिल्या अर उस ताहीं यरुशलेम नगर म्ह माट्टी दी गई, पर वो इस्राएल के राजयां के कब्रिस्तान म्ह पोहचाया न्ही गया। अर उसका बेट्टा हिजकिय्याह उसकी जगहां पै राज करण लाग्या।