2 इतिहास 31

मूर्तिपूजा का हटाया जाणा

1 जिब यो सारा हो लिया, फेर जितने इस्राएली मौजूद थे, उन सारया नै यहूदा के नगरां म्ह जाकै, सारे यहूदा अर बिन्‍यामीन अर एप्रैम अर मनश्शे म्ह की लाठां ताहीं तोड़ दिया, अशेरा ताहीं काट गेरया, अर ऊँच्‍ची जगहां अर वेदियाँ ताहीं गिरा दिया; अर उननै उन सारया का अन्त कर दिया। फेर सारे इस्राएली अपणे-अपणे नगर म्ह बोहड़कै, अपणी-अपणी खुद की धरती म्ह पोहचे।

लेवियाँ कै खात्तर भेंट

2 राजा हिजकिय्याह नै याजकां के दलां ताहीं अर लेवियाँ ताहीं बल्के याजकां अर लेवियाँ दोन्‍नु ताहीं, हर दल के मुताबिक अर एक-एक माणस नै उसकी सेवकाई के मुताबिक ज्यांतै ठहरा दिया, के वे यहोवा की छावणी के द्वारां कै भित्तर होमबलि, मेलबलि, सेवा पाणी, धन्यवाद अर स्तुति करया करैं। 3 फेर उसनै अपणी सम्पत्ति म्ह तै*31:3 अपणी सम्पत्ति म्ह तै विधान म्ह बताये गये हुकमां के पाळण की उपेक्षा म्ह दशमांश देणा बन्द होग्या था। हिजकिय्याह नै इस ताहीं दोबारा शरु करया अर माणसां ताहीं प्रोत्साहित करया के जो कुछ देणा था उसनै द्यो। राजभाग ताहीं होमबलियाँ खात्तर ठहरा दिया; यानिके सबेरै अर साँझ की होमबलि अर आराम अर नये चाँद के दिनां अर नियत बखतां की होमबलि कै खात्तर जिसा के यहोवा के नियम-कायदे म्ह लिख्या सै। 4 उसनै यरुशलेम म्ह रहण आळयां ताहीं याजकां अर लेवियाँ नै उनका हिस्सा देण का हुकम दिया, ताके वे यहोवा के नियम-कायदे के काम मन लगाकै कर सकै। 5 यो हुकम सुणदे ए इस्राएली अन्‍न, नया दाखमधु, टटका तेल, मधु शरुआत की खेत्ती की सारी ढाळ की पैहली उपज बहुतायत तै देण, अर सारी चिज्जां का दशमांश घणी मात्रा म्ह ल्याण लाग्गे। 6 जो इस्राएली अर यहूदी, यहूदा के नगरां म्ह रहवै थे, वे भी बळधां अर भेड़-बकरियाँ का दशमांश, अर उन पवित्र चिज्जां का दशमांश, जो उनके परमेसवर यहोवा कै निमित्त पवित्र करी गई थी, ल्याकै ढेर-ढेर करकै धरण लाग्गे। 7 इस तरियां का ढेर लगाणा उननै तीसरे महिन्‍ने म्ह शरु करया अर सातवें महिन्‍ने म्ह पूरा करया। 8 जिब हिजकिय्याह अर हाकिमां नै आकै उन ढेरां ताहीं देख्या, फेर यहोवा नै अर उसकी प्रजा इस्राएल नै धन्य-धन्य कह्या। 9 फेर हिजकिय्याह नै याजकां अर लेवियाँ तै उन ढेरां कै बारै म्ह पूच्छया। 10 अजर्याह महायाजक नै जो सादोक के घरान्‍ने का था, उसतै कह्या, "जिब तै माणस यहोवा के भवन म्ह ठाई होई भेंटे ल्याण लाग्गे सैं, जिब तै हम पेट भर खाण नै पावां सां, बल्के घणाए बच्या भी रहवै सै; क्यूँके यहोवा नै अपणी प्रजा ताहीं आशीष दी सै*31:10 यहोवा नै अपणी प्रजा ताहीं आशीष दी सै परमेसवर नै फसल ताहीं असाधारण वृद्धि प्रधान करी सै जिसके कारण दशमांश अर पैहले फळ घणा आए।, अर जो बाकी रहग्या सै, उस्से का यो बड़ा ढेर सै।"

11 फेर हिजकिय्याह नै यहोवा के भवन म्ह कोठड़ी त्यार करण का हुकम दिया, अर वे त्यार करी गई। 12 फेर माणसां नै ठाई होई भेंट, दशमांश अर पवित्र करी होई चीज, सच्‍चाई तै पोहचाई अर उनके खास अधिकारी कोनन्याह नाम के एक लेवीय था दूसरा उसका भाई शिमी था; 13 अर कोनन्याह अर उसके भाई शिमी के नीच्‍चै, हिजकिय्याह राजा अर परमेसवर के भवन के प्रधान अजर्याह दोनुवां के हुकम तै यहीएल, अजज्याह, नहत, असाहेल, यरीमोत, योजाबाद, एलीएल, यिस्मक्याह, महत अर बनायाह अधिकारी थे। 14 परमेसवर खात्तर स्वेच्छाबलियां का हकदार यिम्ना लेवीय का बेट्टा कोरे था, जो पूर्व फाटक का द्वारपाल था, के वो यहोवा की ठाई होई भेंटां, अर परमपवित्र चिज्जें बाँट्या करै। 15 उसके हक म्ह एदेन, मिन्यामीन, येशुअ, शमायाह, अमर्याह अर शकन्याह याजकां के नगरां म्ह रहवै थे, के वे के बड़े, के छोट्टे, अपणे भाईयाँ नै उनके दलां कै मुताबिक सच्‍चाई तै दिया करैं, 16 अर उनके अलावा उन ताहीं भी दें, जो माणसां की पीढ़ी के मुताबिक गिणे जाकै तीन साल की उम्र के या उसतै घणी उम्र के थे, अर अपणे-अपणे दल कै मुताबिक अपणी-अपणी सेवा के काम खात्तर रोज के काम कै मुताबिक यहोवा के भवन म्ह जाया करै थे। 17 उन याजकां ताहीं भी दें, जिनकी पीढ़ी उनके पितरां के घरान्यां कै मुताबिक करी गई, अर उन लेवियाँ नै भी जो बीस साल की उम्र तै लेकै आग्गै तै अपणे-अपणे दल कै मुताबिक, अपणे-अपणे काम करै थे। 18 सारी सभा म्ह उनके बाल-बच्यां, जनानियाँ, बेट्यां अर बेट्टियाँ ताहीं भी दें, जिनकी पीढ़ी थी, क्यूँके वे सच्‍चाई तै अपणे-आपनै पवित्र करै थे। 19 फेर हारुन की सन्तान के याजकां नै भी जो अपणे-अपणे नगर की चराई आळे मैदान म्ह रहवै थे, देण खात्तर वे माणस नियुक्त करे गए थे जिनके नाम उप्पर लिखे होए थे के वे याजकां के सारे माणसां अर उन सारे लेवियाँ ताहीं भी उनका हिस्सा दिया करें जिनकी पीढ़ी थी।

20 सारे यहूदा म्ह भी हिजकिय्याह नै इसाए प्रबन्ध करया, अर जो कुछ उसके परमेसवर यहोवा की नजर म्ह भला अर ठीक अर सच्‍चाई का था, उसनै वो करै था। 21 जो-जो काम उसनै परमेसवर के भवन की उपासना अर नियम-कायदे अर हुकम कै बारै म्ह अपणे परमेसवर की खोज करया, वो उसनै अपणा सारा मन लगाकै करया अर उस म्ह कामयाब भी होया।