1 एकी दिने यहोवे अब्रामो खे बोलेया, "तूँ आपणा देश ओर आपणे रिश्तेदार ओर आपणे बाओ रे कराने खे छाडी की तेस प्रदेशो खे चली जा, जो मां ताखे दखाणा।*12:1 प्रेरित 7:3, इब्रानी 11:8 2 ओर मां तांते एक बड़ी जाति बनाणी ओर ताखे आशीष देणी ओर मां तेरा नाओं मशूर करना ताकि तूँ ओरी खे आशीषा री बजअ बणो। 3 कि जो ताखे आशीर्वाद देओ, तिना खे आऊँ आशीष देऊँ ओर जो ताखे स्राप देओ, तिना खे आऊँ स्राप देऊँ; ईंयाँ तरतिया पाँदले सारे करानेया तेरे जरीये आशीष पाणी।"*12:3 प्रेरित 3:25, गलाति 3:8

4 यहोवे रे एस वचनो रे मुताबिक अब्राम चलीगा ओर लूत बी तेस साथे चलेया। जेबे अब्राम हारान प्रदेशो ते निकल़ेया, तेस बखते से 75 साला रा था। 5 ईंयाँ अब्राम आपणी लाड़ी सारै ओर आपणे पतीजे लूत ओर जो तअन तिने कट्ठा कित्तेया था ओर जो लोक तिना खे हारानो रे मिले थे, तिना सबी खे लई की कनान प्रदेशो खे जाणे खे निकल़ेया ओर सेयो कनान प्रदेशो रे पऊँची गे।*12:5 प्रेरित 7:4 6 अब्राम तेस प्रदेशो रिये जांदे ऊए शकेमो रे पऊँचेया, जेती मोरे नाओं रा बड़ा डाल़ था। तेस बखते तेस प्रदेशो रे कनानी जातिया रे लोक रओ थे।

7 जेबे से शकेमो रे था तेबे यहोवे अब्रामो खे दर्शण देई की बोलेया, "ये देश मां तेरे वंशो खे देणा।" तो अब्रामे तेती यहोवे खे जिने तेसखे दर्शण दित्ते थे, एक बेदी बणाई।*12:7 गलाति 3:16 8 फेर तेथा ते आगे चली की से तेस पाह्ड़ो पाँदे आया, जो बेतेलो री पूर्वो री तरफा खे ए ओर आपणा तम्बू तेसा जगा रे खड़ा कित्तेया, जेतेरी पश्चिमा री तरफा खे तो बेतेल ओर पूर्वो री तरफा खे ऐ ए ओर तेती बी तिने यहोवे खे एक बेदी बणाई ओर यहोवे रे नाओं ते प्रार्थना कित्ती। 9 ओर अब्राम कनानो ते नेगेबो खे चलीगा।

10 ओर एड़ा ऊआ कि तेस प्रदेशो रे अकाल़ पड़ीगा, इजी खे अब्राम मिस्र प्रदेशो खे चलीगा ओर तेती एक परदेशी बणी की रया कऊँकि तेस प्रदेशो रे बऊत पारी अकाल़ पड़ीगा था। 11 तेबे एड़ा ऊआ कि मिस्र प्रदेशो रे नेड़े पऊँची की तिने आपणी लाड़ी सारै खे बोलेया, "सुण, माखे पता ए कि तूँ एक बऊत बांकी जवाणस ई। 12 ओर मिस्रिया ताखे देखी की बोलणा, ‘ये तेसरी लाड़ी ए’, तेबे तिना आऊँ तो काई देणा, पर तूँ जिऊँदी राखणी। 13 इजी खे तैं तिना खे ईंयाँ बोलणा, ‘आऊँ एसरी बईण ए’, जेते कि तेरिया खातर मां साथे सेयो खरा बर्ताव करो ओर तेरिया बजअ ते मेरे प्राण बी बची जाणे।" 14 जेबे अब्राम मिस्र प्रदेशो रे आया, तेबे मिस्रिए तेसरी लाड़ी देखी कि ये तो बऊत बांकी जवाणस ए। 15 ओर जेबे मिस्रो रे राजा फिरौनो रे हाकिमे से देखी तो तिने फिरौनो रे सामणे तेसा री तारीफ कित्ती। ईंयाँ से जवाणस सारै फिरौनो रे मईलो रे पऊँचाई ती। 16 ओर फिरौने तेसा री बजअ ते अब्रामो री पलाई कित्ती ओर तेसखे पेडा-बाकरिया, गाय-बल़द, दास-दासिया, गह्दे-गह्दिया ओर ऊँट मिले।

17 तेबे यहोवे फिरौन ओर तेसरे कराने पाँदे अब्रामो री लाड़ी सारै री बजअ ते बड़ी-बड़ी बिपदा पाईया। 18 तेबे फिरौने अब्रामो खे बुलाई की बोलेया, "तैं मां साथे ये क्या कित्तेया? तैं मांगे कऊँ नि बताया कि ये तेरी लाड़ी थी? 19 तैं कऊँ बोलेया कि ये तेरी बईण ए? मैं से आपणी ई लाड़ी बनाणे खे लई थी, पर एबे आपणी लाड़िया खे लई की एथा ते चली जा।" 20 ओर फिरौने आपणे माणूंआ खे तेसरे बारे दे आज्ञा दित्ती ओर तिने से ओर तेसरी लाड़ी सारी सम्पत्तिया समेत, जो तेसरा था, पेजी ते।