Gênesis 47

फिरौनो रे जरीये याकूबो रा स्वागत

1 तेबे यूसुफे फिरौनो गे पीतरे जाई की ये बताया, "मेरा बाओ ओर मेरे पाई ओर तिना रिया पेडा-बाकरिया, गाय-बल़द ओर जो कुछ तिना राए, सब कनान प्रदेशो ते आईगा रा ओर एबु तो सेयो गोशेन प्रदेशो रे ए।" 2 फेर तिने आपणे पाईया बीचा ते पाँज जणे चूणी की तिना री जाण-पछयाण फिरौनो ते कराई।

3 फिरौने यूसुफो रे पाईया ते पूछेया, "तुसे क्या काम करोए?" तिने फिरौनो खे बोलेया, "तेरे दास डांगर पाल़ने वाल़े ए ओर म्हारे बुजुर्ग बी डांगर ई पाल़ो थे।"

4 फेर तिने फिरौनो खे बोलेया, "आसे एते प्रदेशो रे परदेशिया जेड़े रणे खे आई रे; कऊँकि कनान प्रदेशो रे बऊत जादा अकाल़ ऊणे रिया बजअ ते तेरे दासा रिया पेडा-बाकरिया खे चारा नि रया; इजी री खातर आपणे दासा खे गोशेन प्रदेशो रे रणे री इजाजत दे।"

5 तेबे फिरौने यूसुफो खे बोलेया, "तेरा बाओ ओर तेरे पाई तांगे आईगे रे, 6 ओर मिस्र देश तां सामणे पड़ी रा; एस प्रदेशो रा जो सबी ते अच्छा इस्सा ए, तिदे आपणे बाओ ओर आपणे पाईया खे बसाई दे; मतलब सेयो गोशेन प्रदेशो रेई रए ओर जे ताखे पता ओ कि तिना बीचे मईणती मर्द ए, तो तिना खे मेरे डांगरा रा अधिकारी ठराई दे।"

7 तेबे यूसुफे आपणे बाओ खे पीतरे ल्याई की फिरौनो ते तेसरी जाण-पछयाण कराई ओर तेबे याकूबे फिरौनो खे आशीर्वाद दित्तेया।

8 तेबे फिरौने याकूबो ते पूछेया, "तूँ कितणे साला रा ऊईगा रा?"

9 याकूबे फिरौनो खे बोलेया, "आँऊ तो 130 साला रा परदेशी ऊई की जिन्दगी बिताई चुकेया रा; मेरी जिन्दगिया रे दिन थोड़े ओर दु:खो ते परे रे बी थे ओर मेरे बुजुर्ग परदेशी ऊई की जितणे दिन तक जिऊँदे रए, तितणे दिना रा आऊँ एबु नि ऊईरा।"

10 ओर याकूब फिरौनो खे आशीर्वाद देई की तेथा ते चलीगा। 11 तेबे यूसुफे आपणा बाओ ओर पाई बसाई ते ओर फिरौनो री आज्ञा रे मुताबिक मिस्र प्रदेशो रे अच्छे ते अच्छे इस्से रे, मतलब रामसेस नाओं री जगा रे, जमीन देई की तिना गे सम्बाल़ी ती। 12 ओर यूसुफ आपणे बाओ खे, ओर पाईया खे ओर बाओ रे सारे कराने रे एकी-एकी रे बाल-बच्चेया री गिणतिया रे मुताबिक, खाणे रिया चीजा देई-देई की तिना खे पाल़ने लगेया।

अकाल़ो रे बखते यूसुफो रा इन्तजाम

13 तेते सारे प्रदेशो रे एबे खाणे खे कुछ नि रया; कऊँकि अकाल़ बड़ा ई पारी था ओर अकाल़ो रिया बजअ ते मिस्र ओर कनान दुँईं देशा रे लोक नाश ऊईगे। 14 ओर जितणा पैसा मिस्र ओर कनान प्रदेशो रे था, सब यूसुफे तेस नज्जो रे बदले, जो तेती रणे वाल़े मोले लओ थे, कट्ठा करी की फिरौनो रे भवनो रे पऊँचाई ता। 15 जेबे मिस्र ओर कनान प्रदेशो रे लोका रा पैसा खत्म ऊईगा, तेबे सब मिस्री यूसुफो गे आई-आई की बोलणे लगे, "आसा खे खाणे खे रोटी दे, क्या आसे पैसा ना रणे ते तेरे रंदे ऊए मरी जाईए?"

16 यूसुफे बोलेया, "जे पैसे निए, तो आपणे डांगर देई देओ ओर मां तिना रे बदले तुसा खे खाणे खे देई देणा।" 17 तेबे सेयो आपणे डांगर यूसुफो गे ली आए ओर यूसुफ तिना खे कोड़ेया, पेडा-बाकरिया, गाय-बल़द ओर गह्देया रे बदले खाणे खे देणे लगेया तेते सालो रे से सबी जातिया रे डांगरा रे बदले खाणे रिया चीजा देई की तिना खे पाल़ने लगेया।

18 से साल तो ईंयाँ ई कट्ठीगा; तेबे आगले साल तिने तेसखे आई की बोलेया, "आसे आपणे यहोवे ते ये गल्ल छपाई नि सकदे कि म्हारा पैसा खत्म ऊईगा रा ओर म्हारे सारे डांगर म्हारे यहोवे गे आई चूकी रे; इजी खे एबे म्हारे यहोवे रे सामणे म्हारे शरीर ओर जमीना खे छाडी की ओर कुछ नि रया। 19 आसे तेरे ऊँदे ऊए कऊँ मरिये, ओर आसा री जमीन कऊँ ऊजड़ पड़ो? आसा खे ओर म्हारी जमीना खे खाणे रिया चीजा रे बदले मोले लो, कि आसे आपणी जमीना समेत फिरौनो रे दास ऊई जाईए ओर आसा खे बीज दे कि आसे मरूँ नि, बल्कि जिऊँदे रईये ओर जमीन ऊजड़ नि रओ।"

20 तेबे यूसुफे मिस्रो री सारी जमीन फिरौनो खे मोले लई ली; कऊँकि तेस पारी अकाल़ पड़ने ते मिस्रिया खे आपणे-आपणे डोरू बेचणे पड़े ओर ईंयाँ सारी जमीन फिरौनो री ऊईगी। 21 ओर यूसुफे मिस्रो रे लोक एकी कूणे ते लई की दूजे कूणे तक राजे रे गुलाम बणाईते। से यूसुफे शईरो रे ल्याई की बसाई ते। 22 ओर तिने पुरोईता री जमीन मोले नि लई; कऊँकि पुरोईता खे फिरौनो रिया तरफा ते हर रोज खाणे रा बंदोबस्त था ओर हर रोज जो रोटी फिरौन तिना खे खाणे खे देओ था सेई सेयो खाओ थे; इजी बजअ ते तिना खे आपणी जमीन बेचणी नि पड़ी।

23 तेबे यूसुफे प्रजा रे लोका खे बोलेया, "सुणो, मैं आजके दिने तुसे ओर तुसा री जमीन फिरौनो खे मोले लई ली री; देखो, तुसा खे एती बीज ए, एस जमीना रे बीजो। 24 ओर जो कुछ पज्जो, तिजी रा पाँजुआ इस्सा फिरौनो खे देणा, बाकि चार इस्से तुसा रे रणे कि से तुसे आपणे डोरूआ रे बाओ ओर आपणे-आपणे बाल-बच्चेया ओर कअरो वाल़ेया समेत खाया करो।"

25 तिने लोके यूसुफो खे बोलेया, "तैं आसे बचाई लये रे; म्हारे यहोवे री दया-दृष्टि आसा पाँदे बणी री रओ ओर आसे फिरौनो रे दास ऊई की रऊँगे।" 26 ईंयाँ यूसुफे मिस्रो री जमीना रे बारे दे ये नियम बणाया, जो आजो तक चलदा आई रा कि पाँजुआ इस्सा फिरौनो खे मिलेया करो; सिर्फ पुरोईता री जमीन फिरौनो री नि ऊई।

इस्राएलो रा गोशेन प्रदेशो रे बसणा

27 ईंयाँ इस्राएली मिस्रो रे गोशेन प्रदेशो रे रणे लगे; ओर तेथो री जमीन तिना रे वशो रे थी ओर सेयो फल़़े-फूले ओर बऊत जादा बढ़ीगे। 28 मिस्र प्रदेशो रे याकूब सतारा साला तक जिऊँदा रया। ईंयाँ याकूबो री कुल उम्र 147 साला री ऊई।

29 जेबे इस्राएलो रे मरने रा बखत नेड़े आईगा, तेबे तिने आपणे पाऊ यूसुफो खे बुलाई की बोलेया, "जे तेरी दया मां पाँदे ओ, तो आपणा आथ मेरी खुट्टिया निट्ठे राखी की कसम खा कि तूँ मां साथे दया ओर सच्चाईया रा ये काम करेगा कि माखे मिस्रो रे माट्टी नि देणी। 30 पर जेबे आँऊ आपणे मरे रे बुजुर्गा साथे मिली जाणा, तेबे तूँ माखे मिस्रो ते चकी की तिना रेई कब्रिस्ताना रे राखेगा।" तेबे यूसुफे बोलेया, "मां तेरे वचनो रे मुताबिक करना।" 31 फेर तिने बोलेया, "मांते वादा कर।" तेबे तिने तेसते वादा कित्तेया। तेबे इस्राएले आपणी सोठी पकड़ी की तिजी रा साअरा लया ओर चूकी की परमेशरो री आराधना कित्ती।*47:31 इब्रानी 11:21