1 याके रे पाऊ आगूरो रे असरदार वचन।

तिने माणूंए ईतीएल ओर उक्कालो खे ये बोलेया

2 पक्का ई आऊँ डांगरो जेड़ा ए, बल्कि माणूं बोलणे जोगा पनि ए;

ओर माणूंआ री समज मांदे नि ए।

3 ना तो माँदे बुद्धि ए ओर ना ई पवित्र परमेशरो रा ज्ञान माखे मिली रा।

4 कुण जा माणूं स्वर्गो रे चढ़ी की फेर उतरी की आया?

किने माणूंए अवा आपणे मुठुए रे बंद करी राखी?

किने माणूंए महासागर आपणे टाल्लेया रे बानी राखेया?

तरतिया रे बन्ने किने माणूंए ठराई राखे? तेसरा नाओं क्या ए?

ओर तेसरे पाऊए रा नाओं क्या ए? जे तूँ जाणेया तो माखे बी बताणा!*

5 परमेशरो रा एक-एक वचन परखेया दा ए;

से तिना रा बचाणे वाल़ा ठईरी रा, जो तेसरी शरणा रे आई रे।

6 तेसरे वचनो रे कुछ नि बढ़ाणा,

जे तूँ एड़ा करेगा तो तेस ताखे सजा देणी ओर तूँ चूठा ठईरणा।*

7 ओ परमेशर, मैं तांते दो वरदान मांगी राखे,

इजी री खातर मेरे मरने ते पईले तिना माखे देणे ते नि मुकर।

8 पईला वरदान ये आ कि बेकार ओर चूठिया गल्ला मांते दूर रओ; दूजा वरदान ये आ कि माखे ना तो गरीब कर ओर ना ई अमीर बणा;

हर रोजो री रोटी माखे खुल़ाया कर।*

9 एड़ा नि ओ कि जेबे मेरा पेट परी जाओ, तेबे आऊँ मुकरी की बोलूँ कि यहोवा कुण ए?

या आपणा पाअग रचाई की चोरी करुँ,

ओर आपणे परमेशरो रे नाओं री बेज्जती करुँ।

10 केसी रे दासो री तेसरे मालको ते चूगली नि करनी,

एड़ा नि ओ कि से ताखे स्राप देओ ओर तूँ दोषी ठईरे।

11 एड़े लोक ए जो आपणे माया-बाओ खे स्राप देओए

ओर आपणी माया खे बुरा-पला बोलोए।

12 सेयो एड़े लोक ए जो आपणे आपू खे शुद्ध समजोए,

तेबे बी तिना रे मनो रा पाप तोई नि राखेया।

13 कुछ लोक बऊत कमण्डी ओए,

सेयो आपू खे तो बऊत खरे पर दूजेया खे बऊत बेकार समजोए।

14 एड़े लोक बी ए, जिना रे दाँद तलवारा जेड़े ओर दाढ़ा छुरिया जेड़िया ए,

ताकि तिना साथे सेयो शरीफ लोका खे तरतिया पाँदा ते ओर गरीब लोका खे माणूंआ बीचा ते रचाई देओ।

15 जोका खे सदा खून चुसणे खे चाईयो, ठीक तिंयाँ ई, लाल़ची लोक हमेशा बोलदे रओए, माखे ओर देओ,

तिंयाँ ई चार चीजा ए, जो रज्जदिया नि; तिना खे हमेशा ओर चाईयो।

16 सेओ चार चीजा ईआ अधलोक ओर बाँज जवाणसा री कोख,

जमीन जो पाणी पी-पी की नि रज्जदी,

ओर आग जो कदी नि बोलदी, "बस।"

17 जेते आखी साथे कोई आपणे बाओ खे अनादरो रिया नजरा ते देखो,

ओर बेज्जतिया साथे आपणी माया रा कईणा नि मानो,

से आख काअटिया रे कावा नोची-नोची की निकयाल़नी ओर उकाबा रे बच्चेया खाई देणी।

18 तीन गल्ला माखे बऊत कठण ए,

बल्कि चार ए, जो मेरी समजा ते पोरे ए:

19 सेओ यो ईआ सर्गो रे उकाब पंछिये री बाट,

सापो रा चट्टानी पाँदे लुरदे ऊए चलणा, समुद्रो रे जाह्जो रा तरना,

ओर बेटिया साथे मर्दो री चाल।

20 व्याभिचारणिया री चाल बी तेड़ी ईए;

से दूजे मर्दो साथे अनर्थ काम करी कि बोलोई,

"मैं कोई गल़त काम नि कित्तेया।"

21 संसारो दे चार चीजा ईआ,

जिना खे कोई बी सईन नि करी सकदा

22 सेओ यो ईआ केसी दासो रा राजा बणना, मूर्खो रा पेट फरना,

23 गल़त काम करने वाल़िया जवाणसा रा ब्या ऊणा,

ओर दासिया रा आपणी मालकणिया री बारस ऊणा।

24 तरतिया पाँदे चार छोटे जन्तु ए,

जो बऊत अक्लमंद ए:

25 मकोड़िया कमजोर तो अए,

पर सेयो तूपा पाँदे आपणे खाणे रिया चीजा कट्ठिया करोईया;

26 शापान कमजोर जाति ए,

तेबे बी तिना रिया गुफा पाह्ड़ो पाँदे ओईया;

27 टिड्डिया रा राजा नि ऊँदा,

तेबे बी सेयो चूण्ड बणाई-बणाई की चलोईया;

28 छिपकलिया* खे आथो साथे तो पकड़ोए,

तेबे बी राजे रे मईला रे रओईया।

29 चार बिना डरे ऊई की चलणे वाल़े जन्तु ए,

जिना री चाल कमण्डो ते परी री ए

30 शेर जो सबी डांगरा बीचे तागतबर ए,

ओर केसी बी जानवरो ते नि डरदा;

31 चलदा मूर्गा ओर बाकरा,

ओर आपणी सेना समेत राजा।

32 जे तैं आपणी तारीफ करने री मूर्खता कित्ती,

या कोई बुरी साजिश सोची राखी ओ, तो आपणा मूँ बन्द कर ओर बचार कर।

33 कऊँकि जिंयाँ दईंए रे छोल़ने ते नऊणीं ओर नाको खे मरोड़ने ते खून निकल़ोआ,

तिंयाँ ई गुस्सा पड़कणे ते चगड़ा पैदा ओआ।