1 Boo ndem wat naazɛtuula tɔ gwoo: dhiiti moma naabɔt gwyes é nyel dáa kaad, ngɔn nabɛ ɛ́ si mɛko mɛ, nyɛ nadi ɛ́ nɛ kɔtɔ bɛghɛŋ na ekwyikwyen kam nɛ bɛbá kɔ lo. 2 Nyɛ nadi ɛ́ nɛ ɛbum. Tin, ɛbɛl ɛ ɛbya nadi esa náá, nyɛ tsim ɛlyelɛpe.

3 Tin, wɔ gwaa dhiiti ndem sis baazɛtuula tɔ gwoo. Ye nabɛ ɛ́ boo dhalaghɔŋ*12.3 dhalaghɔŋ é ghɛŋ na mwa, dhalaghɔŋ nabɛ ɛ́ boo tit di esa bot ɛkɛɛd é mis ɛ. na tɔɔbelaa dáa du. Nyɛ nadi ɛ́ nɛ elo etɛn nɛ ebá, nɛ melak kam. Tin, kɔ elo etɛn nɛ ebá binek, ye nadi ɛ́ nɛ ekɔtɔ bɛghɛŋ etɛn nɛ ebá. 4 Deenek, ɛkɛɛz ɛ lɛ nadi ewaabal ɛdhuu ɛ ekwyikwyen wat tɔ mɛdhuu mɛlɛl nadi tɔ gwoo ɔ, wɔ gwaa, ye mwas bɛ kɔ bɔs. Dhalaghɔŋ tak natyaŋ ɛ́ sok bhwoob moma nadi ekwyɛl ɛbya ɔ, étɛp nyɛ needɛ mɔn tak, é ghɛŋ nyɛ aabyel ɛ.

5 Tin, moma tak naazɛbya mɔn mɔɔ motom. Mɔn tak ɛ waadjɛɛd bot ɛ membyak djas nɛ sek ghwooz. Mɔn tak naazɛbyet tɔ́ pɛ daa Zɛɛb, pɛ bóó mɛkoozi mɛ di ɛ. 6 Yɛ kabɛ moma ɔɔ, nyɛ naazɛkaab tɔ́, pɛ kyee dik bɛsyɛ di ààbɛ nɛ mɛdii ɛ, pɛ pak Zɛɛb nazekoobal nyɛ di ɛ, étɛp nyɛ needjɛaa edee mɛlu mil nɛ bɛdhet-ɛbá nɛ mɛkam-mɛtɛn nɛ kam wat (1 260).

7 Bhii tak, tuub naazɛduuel tɔ gwoo. Kukuma efofop Mesɛl nɛ efofop bɛ naaduu nɛ dhalaghɔŋ. Tin, dhalaghɔŋ naabaangamela pɛ yɛ kyee nɛ efofop bɛ. 8 Tin, ye nabɛ ɛ́, bɛ naakwak dhalaghɔŋ bɛ nɛ efofop bɛ. Bɛ nabɛ ɛ́ ààkabɛ nɛ di ɛdi tɔ gwoo. 9 Tin, boo dhalaghɔŋ naazyeegelaa, mwasaa pɛ si. Yɛ ɛ́ nyɛy ɛ di nyɔ na mwa. Nyɛy ɛ di edjóoaa Satan nɛghu dim mot mɛkɔŋ, mot di esa náá bot ɛ bɔs wo ze ɔ. Bɛ naazemwas nyɛ bɛ nɛ efofop bɛ kɔ ɛko ɛ bɔs.

10 Bhii tak, mɛ eezɛgwak gwood wat etsim ɛlyelɛpe tɔ gwoo, eke náá: «Nenak, ye moo ɛ́ ɛwala ɛ Zɛɛb di etsik bot ɛ! Nenak, Zɛɛb’enaka eelyaal mɛbwala mɛ, nyɛ eesa náá, ɛyoŋ ɛ lɛ di. Nenak, mɛkoozi mɛ ɛ́ tɔ mɛmbɔ ɛ Mɛsia. Etɛɛ náá, nyɛ naazedis mot di epit bɔn-nyɛɛg bina mwos nɛ pum pɛ daa Zɛɛb ɔ, mwas nyɛ pɛ si. 11 Bɔn-nyɛɛg bina eekwak nyɛ dum nɛ ghiya ɛ Mɔn bhata nɛ mɛkpa mɛ bɛ di egoola ɛ. Bɛ nabɛ ɛ́ ààkwyɛɛg mɛnyel mɔɔ, bɛ naamyaal ɛgel mɛnyel mɔɔ. 12 Étɛp tak ɛ di náá, dika tɔ mɛmyaala, wɔy gwoo nɛ biyɔ bot ɛ di tɔ gwoo ɔ! Yɛ kabɛ biyɔ, bɔs nɛ boo dii mɛsɔn ɔɔ, haaa kpaa-ghoŋ nɛ nen! Dim mot mɛkɔŋ moo ɛ́ kɔ len, nɛ ɛbuk dhaa tyɛ, etɛɛ náá, nyɛ nɛ gu náá, mɛlu mɛ kɔ ɛko ɛ bɔs kalik ɛ́ batsa!»

13 Dáa dhalaghɔŋ nabee náá, nyɛ naazyeegelaa, mwasaa kɔ ɛko ɛ bɔs ɛ, wɔ gwaa nyɛ zɛdu moma nabya mɔn mɔɔ motom ɔ. 14 Tin, moma naazɛdjɛaa eboo mɛbhap mɛmbá yii bhyel. Ye nabɛ ɛ́ étɛp nyɛ neepilal, kɛkum é di bɛ nazekoobal nyɛ yɛ ɛ pɛ kyee dik bɛsyɛ di ààbɛ nɛ mɛdii ɛ, é di nyɛ aadjɛaa edee membu mɛlɛl nɛ pes ààkunaa nɛ nyɔ ɔ. 15 Wɔ gwaa, nyɔ tak zɛgó dhoo mɛdii nɛ mɛdii ɛbuɛpe, dáa boo dii bhii koŋ moma yenɔk, étɛp moma neewo tɔ dii tak. 16 Tin, wɔ gwaa, bɔs zokazyɛ zɛtsik moma. Bɔs eezɛbɛɛ nuub, min bɛtɛ nɛ mɛdii mɛ dhalaghɔŋ nagó tɔ nuub’ɛ ɛ djas. 17 Tin, dhalaghɔŋ naazɛkpaa ɛbuk nɛ moma, wɔ gwaa, nyɛ zɛtɔ́ kɛlumla dɛɛb nɛ bɛdhiiti bɔn moma di elooba nɛ mɛtiŋ ɛ Zɛɛb, nɛ ɛdi ɛ́ sosoob nɛ etsɛɛtsɛ e bhaadal ɛ Yezu ɔ.

18 É di’enek, dhalaghɔŋ nazɛtɔ́ kɛtyaa kɔ bɛsyɛ é ngwoob boo dii mɛsɔn.