Apocalipse 6

Mɔn bhata eekɔ mɛtuŋa etɛn nɛ wat

1 Bhii tak, mɛ eezɛbee Mɔn bhata ékɔ ɛtuŋa mɛkɛn tɔ mɛtuŋa etɛn nɛ ebá bɛ nabɛk luk kɔ tak ɛ. Mɛ eezɛgwak djema ngɔt tɔ edjema ená di nɛ tsik ɔ, ebam ɛlyelɛpe dáa ghɛl ɛko náá: «Dha!» 2 Mɛ eezɛbee dhiiti yaaga na puu. Mot nadi kɔ tak ɔ, nyɛ nadi ɛ́ nɛ bhan é mbɔ, bɛ naadjɛ nyɛ kɔtɔ bɛghɛŋ. Tin, nyɛ eezɛtɔ́ dáa ghɛŋ mot, étɛp ɛbaakɛkwak kwaka sis.

3 É ghɛŋ Mɔn bhata nakɔ ɛtuŋa yii bhɔɔba nabɛkaa luk kɔ tak ɛ, mɛ eezɛgwak djema bhɔɔba pak edjema ená di nɛ tsik ɔ, eke náá: «Dha!» 4 Tin, dhiiti yaaga eezɛwyis, nyɛ nadi ɛ́ tɔɔbelaa dáa du. Mot nadi kɔ tak ɔ, nyɛ naadjɛaa eghɛŋ ɛsaab ɛ egwyem ee nadi kɔ ɛko ɛ bɔs ɛ, étɛp bot neegónel pak’ɔɔ. É di’enek, boo pɛl naadjɛaa nyɛ.

5 É ghɛŋ Mɔn bhata nakɔ ɛtuŋa yii elɛl nabɛkaa luk kɔ tak ɛ, mɛ eezɛgwak djema yii elɛl pak edjema di nɛ tsik ɔ eezɛke: «Dha!» Bhii tak, mɛ eezɛbee dhiiti yaaga na dhɔɔ ezyɛ. Mot nadi kɔ tak ɔ, nabɛ ɛ́ nɛ sa bɛ di etsel esonok étɛp ɛgu mɛdil mɛ tak ɛ é mbɔ. 6 Bhii tak, mɛ naagwak tyee dhiiti gwood egék pak edjema ená di nɛ tsik ɔ. Gwood tak nadi eke ɛ́: «Kilo wat yii embɛɛ mɛbhek ɛ́ nɛ efute e dhenye wat. Tin, ekilo elɛl ebhum bɛ di edjóo ɔɔghɛ ɛ, yɛ ɛ́ nɛ efute e dhenye wat. É di’enek, sa wɔ ààpul mul nɛ mɛnyok mɛ vin.»

7 É ghɛŋ Mɔn bhata nakɔ ɛtuŋa yii ená nabɛkaa luk kɔ tak ɛ, mɛ eezɛgwak djema yii ená di nɛ tsik ɔ, eke náá: «Dha!» 8 Bhii tak, mɛ eezɛbee dhiiti yaaga na dhɔɔ ɛkɛɛ eka e kɔkɔ zesɔs ɛ. Mot nadi kɔ yaaga tak ɔ, din ɛ lɛ nabɛ ɛ́ Ɛsyee, deenek, dɛl ɛ edim e bot ɛ nazegwyɛ ɔ nadi edu nyɛ pɛ bhis. Tin, ghwyil ɛgó ɛ bot naadjɛaa bɛ kɔ ba mɔɔ kyee bɔs wat tɔ mɛtsek mɛná, étɛp bɛ neegó bot nɛ pɛl, nɛ pwom edee, nɛ egum, zɛnɔɔ bɛtit ɛ bɛ na nyan-nyan di kɔ ɛko ɛ bɔs ɛ.

9 É ghɛŋ Mɔn bhata nakɔ ɛtuŋa yii etɛn nabɛkaa luk kɔ tak ɛ, mɛ eezɛbee si mesa-ebuwa, esisim e bot ɛ nagóaa é buwa, etɛɛ náá, bɛ nadi ɛ́ sosoob tɔ Mɛkpa ɛ Zɛɛb nɛ ɛbaadi etyaasɛs e Zɛɛb ɔ. 10 Bɛ nadi etsim ɛlyelɛpe: «Ghɛŋ mot edɛɛ, mot etsɛɛtsɛ, wɔ aaboopɛ́ɛ bot ɛ bɔs’ak den, étɛp ɛwa bɛ é feŋ etɛɛ náá, bɛ naagó bis?» 11 É di’enek, bɛ naadjɛ mot nɛ mot pak’ɔɔ lɔbɔ na puu. Wɔ gwaa, nyɛ zɛke nɛ nɔɔ náá, bɛ pookogwaal ba mɔɔ ɛwala batsa, kɛkum dwoo bɛ aabil mɛtaŋ mɛ bɔn-nyɛɛg nɛ bot ɛ bɛ nɛ bɛnɔɔ nadi esa mɛsa mɛ Zɛɛb ɔ, bot ɛ di náá, bɛ aagóaa dáa bɔɔ ɔ.

12 Bhii tak, mɛ eezɛbee Mɔn bhata zɛkɔ ɛtuŋa etɛn nɛ wat nabɛkaa luk kɔ tak ɛ. Tin, wɔ gwaa bɔs zɛdheegel ɛlyelɛpe. É di’enek, gwyes moo ɛ́ suuut dáa kaad mot di nɛ pil ɛ. Tin, ngɔn moo ɛ́ tɔɔbelaa dáa ghiya. 13 Wɔ gwaa, ekwyikwyen di pɛ tɔ gwoo ɔ, zɛkwyit pɛ kɔ bɔs ɛkɛɛ ebhum e le fiigh dinaa ààwoozal di ekwyit é bɔs nɛ ghuu ɛ. 14 Tin, gwoo naazɛwol nyel dáa bɛ dyeebawol bum ɛ. Mɛtsok djas nɛ eghola djas naadisaa é edi nadidi ɔ. 15 Bɛmɛkoozi mɛ bɔs, eboo ekukuma, ekukuma e esodja, bɛkum ɛ bot, bot ɛ di nɛ mɛbwala ɔ, nɛ ekwom e bot zɛnɔɔ bot ɛ di ààbɛ ekwom ɔ, bɔɔ djas naakɛsɔwa tɔ eboo eghu mɛkok pak mɛtsok nɛ tɔ ebat e mɛkok. 16 Tin, bɛ nadi eke nɛ mɛtsok nɛ ebat e mɛkok náá: «Bilaka kɔ les, syelka bis, étɛp bis needi ɛtsetaɛpe nɛ mot di pɛ kɔ bóó mɛkoozi ɔ, bis needi ɛtsetaɛpe nɛ ɛbuk ɛ Mɔn bhata. 17 Etɛɛ náá, boo ɛlu ɛ ɛbuk ɛ lɔɔ eezekum, tin ɛzɛ aakopyet?»