1 Fofop yii etɛn eelɔɔ yɛ tɔŋ. Mɛ eezɛbee kwyikwyen wat edus pɛ ɛko, kwyit é bɔs. Kwyikwyen tak eedjɛaa sap boo guk na dim-dim di ààbɛ nɛ ɛsik ɛ. 2 Kwyikwyen tak eezɛdii boo guk tak, wɔ gwaa, eguluk etim tɔ tak. Eguluk tak nɔŋel ɛ́ nɛ eguluk e boo du na bɔk-bɔk. Wɔ gwaa, gwyes nɛ pup zɛgwyiid nɛ eguluk binek. 3 Etsemaaka naazɛwyis tɔ eguluk binek, wɔ gwaa, bɛ zɛdjaadela kɔ bɔs djas. Bɛ naadjɛaa mɛbwala mɛ di enɔŋel nɛ yii ebaalɔl ɛ. 4 Deenek, bɛ naalu bɛ náá, bɛ nàsaab eka nɛ ele, ààsaab-saabak edhiiti e mɛbhek. Tin, bɛ goka nɛ ɛzosa ɛbiyo ɛ́ nɛ bot ɛ di ààbɛ nɛ geka Zɛɛb kɔ ebhata-bhwoob bɔɔ ɔ. 5 Yɛ ààpadjɛaa bɛ ze náá, bɛ gó bot góak, bɛ zotiig bɛ ɛ́ tɔ bɛngɔn ɛtɛn. Tin, mezuk mɛ etsemaaka binɔk aasa nɛ bot ɛ bɔs ɛ, yɛ aakpaa dáa mɛkpaa mɛ ɛbaalɔl di ekwaal mot ɛ. 6 É mɛlu menek, bot ɛ́ waasaa ɛsyee, ɛsyee aanàkwaazyɛ. Bɛ waakwyɛl náá, bɛ gwyɛ, tin, ɛsyee ɛ́ waakaab bɛ.
7 Etsemaaka binɔk nadi ɛ́ dáa eyaaga ee zekomsaaa étɛp ɛkɛlumla dɛɛb ɛ. Elo bɔɔ nadi ɛ́ nɛ ekɔtɔ bɛghɛŋ nasaaa nɛ lɔɔd ɛ, mɛbhwoob mɔɔ nadi ɛ́ dáa yii bot. 8 Bhoo elo bɔɔ nadi ɛ́ dáa yii boa, mɛdjɛ mɔɔ nakadi ɛ́ dáa mɛdjɛ mɛ eboo bɛghee. 9 Ebet bɔɔ nadi ɛ́ dáa ghun ghwooz. Ghuula mɛbhap mɔɔ nadi ɛ́ dáa ghuula embem e eyaaga di kɛlumla dɛɛb ɛ. 10 Etsemaaka binɔk nabɛ ɛ́ nɛ mɛkɛɛz nɛ bɔɔ mɛgɔk é tak dáa ebaalɔl. Bɛ bela mɛbwala mɛ ɛzuk ɛ bot tɔ bɛngɔn ɛtɛn ɛ́ nɛ mɛkɛɛz menek. 11 Mɛkoozi mɔɔ ɛ́ fofop nadjɛaa boo guk na dim-dim ɔ. Tɔ lii Ebhele, bɛ djóo nyɛ ɛ́ Abadɔŋ, tɔ lii Ghɛlɛk bɛ djóo nyɛ ɛ́ «Apolyɔŋ», ye kwyɛl ɛlɛɛ ɛ́ «mot di epul ɔ».
12 Mezuk mɛ mɛkɛn eezɛdhaa. Bhii tak, yɛ ɛ́ nɛ edhiiti mezuk mɛmbá di ebaazyɛ ɛ.
13 Bhii tak, fofop yii etɛn nɛ wat elɔɔ yɛ tɔŋ. Mɛ eezɛgwak gwood wat edus pɛ tɔ etuma ená yii mesa-ebuwa nasael nɛ lɔɔd, yii di sok bhwoob Zɛɛb ɛ. 14 Tin, gwood’enek eezɛke nɛ fofop yii etɛn nɛ wat nadi emɛt tɔŋ ɔ náá: «Tiia efofop ená di kɔla é ngwoob boo soob na djato-djato di edjóoaa Efaalat ɛ.» 15 É di’enek, bɛ eezɛbet efofop ená nadi bɛ moo babeega étɛp ɛwala ɛlenek, étɛp dwoo ɛlenek, étɛp ngɔn’enek, étɛp mbu yenek, étɛp bɛ neekɛgó ɛdhuu ɛ bot wat tɔ mɛdhuu mɛlɛl nadi kɔ ɛko ɛ bɔs ɔ. 16 Bɛ naalɛɛ mɛ mɛtaŋ mɛ esodja bɔɔ di elumla dɛɛb kɔ eyaaga ɛ, mɛ nagwak ɛ́ náá, bɛ nabɛ ɛ́ emiliyɔŋ bɛdhet-ɛbá. 17 Beeka dáa mɛ nabee eyaaga nɛ esodja bɔɔ kɔ tak tɔ dhyam ɛ: Bɛ nabɔt ɛ́ eghun e na tɔɔbelaa dáa du, dhɔɔ dáa ɛkok ɛ mɛtaŋ di edjóoaa safiid ɛ, djemlaa dáa dhiiti mbi mɛsii mɛ na goo-goo9.17 dhiiti mbi mɛsii mɛ na goo-goo mɛsii mɛ tak djóoaa ɛ́ sufɛlɛ. di edjóoaa sufɛlɛ. Elo eyaaga tak nadi ɛ́ dáa elo eboo bɛghee. Enuub bɔɔ wyisal ɛ́ du nɛ eguluk dɔɔ nɛ mɛsii mɛ na goo-goo. 18 Du, eguluk, nɛ mɛsii mɛ na goo-goo, di ewyis tɔ enuub eyaaga ɛ, yɛ ɛ́ eboo egum elɛl nagó ɛdhuu wat tɔ mɛdhuu mɛlɛl mɛ bot ɛ bɔs ɛ. 19 Etɛɛ náá, mɛbwala mɛ eyaaga ɛ́ tɔ enuub bɔɔ, nɛ tɔ mɛkɛɛz mɔɔ. Mɛkɛɛz mɔɔ ɛ́ dáa bɛnyɔ. Mɛkɛɛz mɔɔ tak ɛ nɛ elo étɛp ɛzuk ɛ bot.
20 Tin, bot ɛ nadi ààgwyɛ nɛ mezuk menek ɔ, bɛ nabɛ ɛ́ ààswoola mɛfulu mɔɔ. Bɛ nadi eduduwal embee esisim, bɛzɛɛb ɛ bɛnaghisɛ, yii bɔɔ bɛmɛt nalul nɛ lɔɔd, nɛ gwooz di elulaa epata, nɛ gwooz di edjóoaa blɔɔz ɛ, zɛnɔɔ mɛkok, nɛ yii bɛ nakpak nɛ ele ɛ. Yɛ ɛ́ esa ee di náá, ye tok nɛ ghwyil ɛbee, ààgwak, ààkɛ ɛ. 21 Bɛ nabɛ ɛ́ ààkat ɛgó ɛ́ bot, ɛsa bɛmɛsimba, ɛsa mɛzɔ nɛ ɛdjii.
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)