Atos 16

Pɔl bɛ nɛ Silas tɔ ndjaa membok pɛ ghaada Filip

16 Dhiiti dwoo, dáa bis nadi etɔ́ pɛ sum di mendjaala mɛ tak ɛ, wɔ gwaa, dhiiti kwom moma zokazyɛ zɛboma nɛ nes. Pɛ tɔ lɛ, ye nabɛ ɛ́ nɛ mbee sisim nadi esa náá, nyɛ gheenenaa bot eghaa etɛp ee di eezyɛ pɛ sok ɛ. Nyɛ nadi ebela bɛtɛ nɛ epata étɛp bɛkum bɛ, tɔ ɛnaŋ ɛ́ eghaa bɛ nyɛ nadi enaŋ ɛ. 17 Tin, nyɛ eezɛni edu bis nɛ Pɔl, nyɛy etsim náá: «Bot bak ɛ́ bot ɛ mɛsa ɛ Zɛɛb Mɛkaake! Bɛ ɛpelyo bin ze di edjɛ tsik ɛ!» 18 Nyɛ naasesa deenek mɛlu ɛbuɛpe. Bhii tak, ye nabɛ ɛ́ Pɔl naazɛbiyo, wɔ gwaa, nyɛ zɛliig mis, nyɛy nɛ mbee sisim náá: «Nɛ din ɛ Yezu Klisto mɛ lɛɛ wɔ ɛ́, wyisa tɔ lɛ!» Tin, é di tak wat sisim eezɛwyis. 19 Dáa bɛkum bɛ nabee náá, bɛ tok nɛ ghwyil ɛbaabela epata, é ze’ɛ, bɛ boozɛmɛt Pɔl bɛ nɛ Silas, tɔ́ nɛ nɔɔ kɔ ɛbɛsɛɛ ɛ bot djas, sok bhwoob ekukuma e ghaada tak. 20 Bɛ eezɛtɔ́ nɛ nɔɔ pɛ daa bɛtetɛp ɛ nadi bot ɛ Lɔm ɔ, bɔɔ nɛ nɔɔ náá: «Bot bak ɛpekus ɛzɛm kɔ ghaada yena. Bɛ ɛ́ bot ɛ mbyak eYuda, 21 bɛ ɛpelyo bot mɛzel mɛ di náá, menabɛl bot ɛ Lɔm tokeka nɛ ghwyil ɛdu nɛ ɛsa yɛ ɛ.»

22 Tin, dɔɔ nɛ mɛdhuu mɛ bot zokazɛbyen bɛ. Bɛtetɛp ɛ́ boozɛke náá, bɛ sɔ Pɔl nɛ Silas ekaad é nyel, bɛ eezɛlwom náá, bɛ nyuu bɛ nɛ eghwyɛs. 23 Bhii bɛ nasilal ɛnyuu bɛ nɛ eghwyɛs esok nɛ esok ɛ, bɛ boozɛkɔɔl bɛ tɔ membok, bɛ eezɛlɛɛ nɛ mbaalel ndjaa membok mɛ tak náá, nyɛ baal bɛ ɛnyɔɛpe. 24 Dáa mbaalel tak nagwak dáa bɛtetɛp nalii ɛ, mbaalel ndjaa membok ɛ́ bookɛwa bɛ tɔ dhiiti dhɛŋ pɛ ɛsik tɔ membok, bhii tak, bɛ eezɛwa bɛ mɛko tɔ embwak.

25 Ye moo etiila kuku pum, Pɔl bɛ nɛ Silas nadi edjaala nɛ ɛduwal Zɛɛb nɛ mɛdjeeb, tin, bɛdhiiti bot ɛ membok nadi egwak bɛ. 26 É di’enek wat, wɔ gwaa, bɔs zɛdheegel ɛlyelɛpe, ghus-zumal membok zokakuu. Mɛbɛ mɛ ndjaa membok djas zokabɛŋel, é di tak wat, eghwooz e bot ɛ membok nakɔlaa nɛ yɛ ɛ́ zokatiiel. 27 Mbaalel ndjaa membok eezɛdjem, dáa nyɛ nabee náá, ɛbɛ ɛ ndjaa membok nadi ɛ́ mbek ɛ, nyɛ boowaal pɛl’ɛ étɛp nyɛ neegó nyel. Nyɛ nasa deenek ɛ́ etɛɛ náá, tɔ egeka bɛ, nyɛ nadi eke ɛ́ náá, bot ɛ membok eezekaab. 28 Tin, Pɔl eezɛtsim nɛ ghwyil’ɛ djas náá: «Nàzuk nyel’ɔ, bisɔ djas ɛ́ wak!» 29 Tin, mbaalel ndjaa membok eezɛwaab náá, bɛ tuub twol. Bhii tak, nyɛ eezɛwyis kaab, ni tɔ dhɛŋ tak, nyɛy egbakba nɛ bwoo, nyɛ eezɛduma si mɛko ɛ Pɔl nɛ Silas. 30 Tin, nyɛ eezɛwyisal bɛ. Bhii tak, nyɛ eezɛdji bɛ náá: «Ekukuma bam, mɛ goka nɛ sa dáa étɛp mɛ neebela tsik?» 31 Bɛ eezɛbɔɔza náá: «Duma koŋ nɛ Ghɛŋ Yezu, tin, wɔ waabela tsik, wɔy nɛ bot ɛ mɛbyel mɔ.» 32 É di’enek, bɛ ɛ́ boozɛgoola nyɛy nɛ bot ɛ ndjaŋ’ɛ mɛkpa ɛ Ghɛŋ. 33 É ɛwala ɛ tak wat, mbaalel ndjaa membok eezɛtɔ́ nɛ nɔɔ é pum kɛgwyii bɛ, nɛ ɛgwom ɛ́ bɛ mɛpyoŋ. É di tak wat, nyɛ eezɛduwa Zɛɛb bɛ nɛ bot ɛ ndjaŋ’ɛ djas. 34 Nyɛ eezɛbyet nɛ Pɔl bɛ nɛ Silas pɛ ndjaŋ’ɛ. Bhii tak, nyɛ eezɛdjɛ bɛ edee e dek. Mot tak nɛ bot ɛ mɛbyel mɛ djas nadi ɛ́ tɔ mɛmyaala etɛɛ náá, bɛ naadum koŋ nɛ Zɛɛb.

35 Dáa mɛlem nakalem ɛ, bɛtetɛp ɛ nadi bot ɛ Lɔm ɔ eezɛlwom bot, étɛp ɛkɛlɛɛ nɛ mbaalel ndjaa membok náá: «Beta bot binɔk.» 36 Mbaalel ndjaa membok eezɛlɛɛ Pɔl náá: «Bɛtetɛp eedhis bhaadal náá, bi wyiselaa. Deenek bi ɛ́ nɛ ghwyil ɛkawyis, da bi ɛ́ tɔ́ tɔ egwyem.» 37 Pɔl eezɛbɔɔza nɛ bot ɛ nalwomaa ɔ náá: «Bɛ eelwom náá, bis nyuŋaa nɛ eghwyɛs é mis mɛ bot djas, dhi bis di bot ɛ ghaada kyee dik Lɔm. Bhii tak, bɛ eekɔɔl bis é membok. Bisɔ ààpɛ́ɛaa dáa ye di egoka nɛ ɛsael ɛ. Deenek, sa bɛ di ekwyɛl ɛsa nenak ɛ́ yɛ ɛ́ ɛwyisal ɛ bis tyee syaab é? Ààbɛ deenek! Ye goka ɛ́ bɛ zɛwyisal bis bɔɔ bɛmet.»

38 Bot binɔk eezɛsik kɛlɛɛ etɛp binek pɛ daa bɛtetɛp ɛ nadi bot ɛ Lɔm ɔ. Dáa bɛ nagwak náá, bɛ ɛ́ bot ɛ dɛl Lɔm ɛ, ye nabɛ ɛ́, bwoo naasa bɛ. 39 Tin, bɛ ɛ́ boozɛwaab ɛpelak pɛ daa lɔɔ, bhii tak, bɛ eezɛwyisal bɛ é membok, bɛ eezɛdjaala nɛ nɔɔ náá, bɛ dus kɔ ghaada. 40 Dáa Pɔl bɛ nɛ Silas nawyis é membok ɛ, bɛ eezɛtɔ́ pɛ daa Lydi. Bhii bɛ naazɛboma nɛ bɔn-nyɛɛg bɔɔ, nɛ ɛdjɛ bɛ mɛghaaz nɛ ghwyil tɔ ɛdu ɛ Zɛɛb, bhii tak, bɛ eezɛnɔɔ mɛnyel tɔ́.