1 Dáa Apolɔs nadi pɛ Koolɛt ɛ, Pɔl nadi edhaa pɛ mɛl mɛ mɛtsok, pɛ kyee dik Azi. Bhii tak, nyɛ eezɛkum pɛ ghaada Efɛɛz. Nyɛ eezɛbela ba bim bɛdjekel tin, 2 nyɛ eezɛdji bɛ náá: «Ye nabɛ ɛ́, bi naabela Sisim na Dɛɛ, é sok bi nadum koŋ nɛ Zɛɛb ɛ?» Bɛ eezɛbɔɔza nɛ nɛ náá: «Bis dinaa ààpakogwak-gwakak bot elii dum nɛ Sisim na Dɛɛ.» 3 Tin, Pɔl eezɛdji bɛ náá: «Bi duwa Zɛɛb yak kwaambi ɛduwa?» Bɛ eezɛbɔɔza náá: «Ɛduwa Zɛɛb ɛ Zaŋ.» 4 Pɔl eezɛke nɛ nɔɔ náá: «Zaŋ naduu Zɛɛb ɛ́ bot ɛ namyaal ɛswoola mɛfulu ɔ. Nyɛ nadi eke nɛ bot ɛ mbyak Yisalaɛl náá, bɛ dum koŋ nɛ mot di ezyɛ bhii nyɛy ɔ, mot tak nabɛ ɛ́ Yezu.» 5 Bhii bɛ nazegwak etɛp binek djas ɛ, bɛ eezɛduwa Zɛɛb nɛ din ɛ Ghɛŋ Yezu. 6 Bhii tak, Pɔl eezɛkɛl bɛ mɛmbɔ, tin, bɛ eezɛbela Sisim na Dɛɛ. Bɛ moo tin elii tɔ elii membyak mɛ sis, nɛ ɛgoola bɛ mɛbhaadal mɛ Zɛɛb djɛ bɛ ɛ. 7 Bot ɛ tak nabɛ ɛ́, bot kam nɛ bɛbá.

8 É bɛngɔn ɛlɛl, Pɔl nadi etɔ́ pɛ ndjaa mendjaala mɛ eYuda, tin, nyɛ naalii nɛ ɛbwaalel djas. Nyɛ nalelii nɛ nɔɔ ɛ́, dum nɛ Ɛyoŋ ɛ Zɛɛb, nyɛ nadi esaa náá, bot ɛ nadi egwak nyɛ ɔ, myaal nyɛ. 9 Deenek, bɛdhiiti bɛtɛ nɛ bot naadyeebasa maa-ɛlɔ, bɔɔ byen ɛmyaal, bɛ moo tin esa avusu dum nɛ mɛze ɛ Ghɛŋ é mis mɛ mɛdhuu mɛ bot. Deenek, Pɔl eezɛdus tin lik bɛ. Nyɛ eezɛtɔ́ bɛ nɛ bɛdjekel bɛ, tin, nyɛ nadi elyo bɛ mɛlu djas tɔ ndjaa mɛlyo mɛ dhiiti mot din ɛ lɛ ɛ́ Tilanus. 10 Deenek, ye naabɔya membu membá, ye naasa náá, bot ɛ mbyak eYuda nɛ bot ɛ mbyak eGhɛlɛk nadi pɛ kyee dik Azi djas ɔ, gwak mɛkpa ɛ Ghɛŋ.

11 Zɛɛb nadi esa eboo endem mɛbwala é ze ɛ Pɔl. 12 Yɛ ɛ́ étɛp tak ɛ bot nadi etɔ́ pɛ daa bot ɛ mɛbɛ́ nɛ epes ekaad, nɛ ekaad ee nakee nyel ɛ Pɔl ɛ. Deenek, bɛ nadi ebela tsik, embee esisim nadi ewyis tɔ lɔɔ ɔ. 13 Bɛdhiiti eYuda ee nadi ekɛ mɛl ɛ mɛl étɛp ɛkɛsɔ embee esisim tɔ bot ɛ mɛbɛ́ ɔ, naagek ɛsa yɛ nɛ din ɛ Ghɛŋ Yezu. Deenek, bɛ nakeke nɛ embee esisim ɛ́ náá: «Mɛ lɛɛ bin ɛ́ náá, bi wyis nɛ din ɛ Yezu, Pɔl di egoola mɛkpa mɛ ɔ.» 14 Yɛ ɛ́ deenek ɛ́ bɔn ɛtɛn nɛ bɛbá ɛ boo ghaa-Zɛɛb mbyak eYuda nadi edjóoaa Seeva ɔ, nadi esesa. 15 Tin, dhiiti dwoo, wɔ gwaa, mbee sisim zɛbɔɔza nɛ nɔɔ náá: «Mɛ nɛ gu Yezu, mɛ nɛ baagu pe Pɔl. Yɛ kabɛ biyɔ ɔɔ, biyɔ ɛ́ bɛzɛ?» 16 É di’enek, wɔ gwaa, mot nadi nɛ mbee sisim ɔ, zɛghaaga bɛ é mɛnyel, dáa nyɛ nadi nɛ ghwyil dhaa bɛ ɛ, wɔ gwaa nyɛ zɛduma bɛ é mɛnyel nɛ mɛbin nɛ ebhooba djas. Bɛ nadus tɔ ndjaŋ’ɛ tin ɛ́, nɛ ekaab bhen toto, nɛ mɛpyoŋ é mɛnyel kpeeeŋ. 17 Bot ɛ dɛl Efɛɛz, bot ɛ mbyak eYuda nɛ bot ɛ di ààbɛ bot ɛ mbyak eYuda ɔ, zokagwak tɛp tak, wɔ gwaa, boo bwoo zɛmɛt bɛ. Tin, bɛ naazɛbela boo duu dum nɛ din ɛ Ghɛŋ Yezu. 18 Bɛtɛ nɛ bot tɔ sama bot ɛ namyaal Zɛɛb ɔ nadi ezyɛ é mis mɛ bot djas zɛvaa embee esesɛɛ bɛ nadi esa ɛ. 19 Bɛtɛ nɛ bot tɔ sama bot ɛ nadi esa etɛp ee mɛvyɛkɛlɛ mɛ mɛsimba ɔ, zokazyɛ nɛ bɛmɛkana mɔɔ, zɛdik yɛ é mis mɛ bot djas. Dáa bɛ nalaa mɛtaŋ mɛ bɛmɛkana mɛ tak ɛ, ye naasa tyee bɛmil mɛkam-mɛtɛn mɛtaŋ mɛ eghwooz ee di esaaa epata*19.19 bɛmil mɛkam-mɛtɛn mɛtaŋ mɛ eghwooz ee di esaaa epata ye nabɛ ɛ́ mɛtaŋ mɛ efute ee mot di egoka nɛ ɛbela bhis mɛsa membu kam nɛ etɛn ɛ. nɛ yɛ ɛ. 20 Yɛ ɛ́ deenek nɛ ghwyil ɛ Ghɛŋ ɛ, Mbɛɛ Bhaadal nadi egoolel, nɛ mɛbwala.

21 Bhis etɛp binek, Pɔl eezɛmyaal ɛtsaal kyee dik Masedwan nɛ Ghɛlɛs étɛp ɛtɔ́ pɛ Yeluzalɛm. Nyɛy náá: «Bhii mɛ aakum ɛ, ye goka ɛ́ mɛ dhaa kɛbee dɛl ɛ Lɔm.» 22 Tin, nyɛ eezɛkyeed bot ɛbá nadi ekwye-kwyee nyɛ ɔ pɛ Masedwan, ye nabɛ ɛ́ Timote bɛ nɛ Eelasetɛ. Tin, nyɛ naazɛlik ba mɛlu pɛ kyee dik Azi. 23 É ghɛŋ tak, ye nabɛ ɛ́, boo ɛghuub naazɛni kɔ ghaada Efɛɛz dum nɛ bot ɛ nadi edu mɛze ɛ Ghɛŋ ɔ. 24 Wɔ gwaa, dhiiti mot ɛswom, din ɛ lɛ nabɛ ɛ́ Dhemetulus, nyɛ nadi ɛ́ lulel mɛsum. Nyɛ nadi elul esonok nɛ mbi eghwooz djas ee di esaaa epata nɛ yɛ ɛ, yii mɔɔ ndjaa-zɛɛb moma Aaletemis. Dhemetulus nadi esa mɛsa menek, nɛ ɛdjɛ bɛswom ɛ bot bɛtɛ nɛ epata. 25 Nyɛ ɛ́ boozɛsɛɛg bot ɛ tak, nɛ bot ɛ mɛsa mɔɔ nadi enɔŋel nɛ mɛsa mɛ tak ɛ, nyɛ eezɛke nɛ nɔɔ náá: «Bɛwɛn, bi nɛ gu náá, yɛ ɛ́ mɛsa mak ɛ di edjɛka mena ekum. 26 Deenek, bi ɛpegwak nɛghu bi ɛpebee sa di esael ɛ: Pɔl tak lɛɛ bot ɛ́ náá, bɛzɛɛb ɛ bot di kpak nɛ mɛmbɔ ɛ, tok bɛtɛtɛ ɛ bɛzɛɛb. Nyɛ eebatasa náá, bot ɛbuɛpe di wak kɔ Efɛɛz ɔ, dɔɔ nɛ bot ɛ mɛl mɛ di pɛ kyee dik Azi djas ɔ, myaal etɛp e tak. 27 Etɛp binek ɛ́ sa náá, mɛsa mena gwyɛ, deenek, é di tak, bot ɛ́ waabhina ndjaa Aaletemis zɛɛb moma. Tin, bot ɛ́ waadis duu ɛ Aaletemis boo zɛɛb. Bela náá, zɛɛb’ak yii moma ɛpeduwalaa kɔ kyee dik Azi djas nɛ kɔ ɛko ɛ bɔs djas.» 28 Dáa bɔt nagwak deenek ɛ́, bɛ boozɛkpaa elyem ɛbuɛpe, bɛ moo tin etsim náá: «Aaletemis yii bot ɛ Efɛɛz nɛ bɔk!» 29 Tin, ɛzɛm eezɛni kɔ ghaada djas. Wɔ gwaa, bɛ zɛmɛt Ghayus bɛ nɛ Aalistaalak bot ɛbá ɛ dɛl ɛ Masedwan, bot ɛ nadi egyee bɛ nɛ Pɔl é mɛdjoŋ ɔ. Tin, zukamwaa nɛ mot’enɔk eezɛtɔ́ nɛ nɔɔ kaab pɛ ɛbwak ɛ boo zɛɛga. 30 É di’enek, Pɔl nadi ekwyɛl ɛni, nyɛ neekɛlyaal nyel pɛ zukamwaa nɛ mot nasɛɛga ɛ. Tin, bɛdjekel eezɛlu nyɛ. 31 Bɛdhiiti ekukuma e kyee dik Azi, bot ɛ nadi bɛsɔ bɛ ɔ, zokakyeed nyɛ menduk mɛ tak wat náá, nyɛ nàtɔ́ pɛ ɛbwak ɛ boo zɛɛga tak. 32 É di’enek tɔ mɛdhuu mɛ bot binɔk, ye nabɛ ɛ́ nɛ boo zyaala. Bɛdhiiti nadi etsim sa sis, bak bɛdhiiti sa sis, bak bɛdhiiti bot pak’ɔɔ nabɛ ɛ́ ààdi egu mɛsɔ mɛ tɛp bɛ nasɛɛga kɔ ɛsu ɛ tak ɛ. 33 Wɔ gwaa, bɛdhiiti eYuda tɔ mɛdhuu mɛ bot binɔk zokazɛbesal dhiiti mot pɛ sok, din ɛ lɛ nabɛ ɛ́ Alɛkzandɛlɛ. Tin, bɛ eezɛbaŋa nyɛ lo tɛp, é di’enek Alɛkzandɛlɛ eezɛben mbɔ étɛp nyɛ neelii, nyɛ neelɛɛ lo mɛsɔ. 34 Tin, dáa bot nagwyák náá, nyɛ nadi ɛ́ mot mbyak eYuda ɛ, bɔɔ djas ɛ́ boozɛbo boo tsim wat, ye naabɔya tyee mɛwala mɛmbá bɔɔ etsim náá: «Bɔk-bɔk ɛ di Aaletemis zɛɛb bot ɛ dɛl Efɛɛz!»

35 Tin, dhiiti kukuma ngɔt ghaada eezɛsil bɛ elyem, nyɛy náá: «Bot ɛ dɛl Efɛɛz, bot djas nɛ gu náá, ghaada Efɛɛz ɛ́ di ebaal ndjaa Aaletemis boo zɛɛb moma, dɔɔ nɛ sa nakpakaa nɛ ɛkok yii di nɔŋel nɛ ɛbhwoob ɛ lɛ, nadus tɔ gwoo ɛ. 36 Ye tok nɛ mot aaswonal yɛ. Deenek, bi goka ɛ́ nɛ ɛsil ɛ elyem, nàsaka etɛp dáa bot ɛ di ààdi nɛ esiiza ɛ. 37 Bi zyɛ wak ɛ́ nɛ bot ɛ wat di náá, bɛ ààpadjii esa ee di tɔ mendjaa mɛ zɛɛb ɛ, baabela náá, bɛ ààpalee zɛɛb’ena yii moma. 38 Yɛ bɛ náá, Dhemetulus, bɛ nɛ sama bɛswom ɛ bot ɛ́ nɛ tɛp bɛ di egoka nɛ ɛpit mot kɔ ɛsu ɛ tak ɔɔ, yɛ ɛ́ nɛ mendjaa mɛ etɛp di epɛ́ɛaa ɛ nɛ bɛtetɛp ɛ tak. Yɛ ɛ́ penek ɛ bɛ di egoka nɛ ɛkɛpit. 39 Tin, yɛ bɛ náá, bi dinaa nɛ dhiiti tɛp bi di baakwyɛl ɛlii ɔɔ, mena aaliika yɛ ɛ, pɛ zɛɛga mendjaala, pɛ ye di egoka nɛ ɛliiaa etɛp ee di dum nɛ etsi bina ɛ. 40 Etɛɛ náá, mena ɛ́ nɛ ghwyil ɛdjóoaaka bot ɛ di ekus ɛghuub ɔ, dum nɛ sa sael mos ɛ. Bela náá, mena tokeka nɛ mɛgham mɛ mena aadjɛka é mbi yak zɛɛga. Bɛ kodji ɛsuk ɛ tɛp tak ɔɔ, ye tok nɛ mot aabaŋa bot ɛnyɔɛpe lo mɛsɔ mɛ tɛp tak na sɛŋ tɔ mɛlɔ.» 41 Bhii nyɛ nalii deenek ɛ́, wɔ gwaa, nyɛ zɛswaal zukamwaa nɛ mot nadi tin ɔ.