NZABUKUSU YI YOANE 19

Kinati ki mpunda ha yulu mpunda yimpembe

11 Mboki nayena mazulu mazibuka na mpunda yimosi yimpembe yiyenika. Yondowo wuba wuzakala ha yulu andi, nkumbu andi Kwikama na Kedika, kwe fundisanga na kwe nwananga mvita mu lunungu. 12 Meso mandi maa bonso tiya tuna pyala milaka, ha yulu mutu andi, mpu zizingi zi kintinu ziba hoho. Yandi wuba na nkumbu yisonama yilembolo zaba muntu tala ti ka yandi bende kaka ko. 13 Wulwata kiyunga kibavwengi mu menga, mpe nkumbu andi «Mambu ma Nzambi.» 14 Mpumbu yi zimbulu-mbulu yi mazulu, yedi kwe mulandi mu yulu zimpunda zimpembe, yiba yilwata milele mintalu mi lino mimpembe na mivedila. 15 Mu munwa andi muduuka mbele yimeeno yiyila yi kaasembila zinsi. Yandi waaba munkengi awu na muhangu wukisengo ha kooko, yandi waakamuna mbutu zi vinu mu kikamununu ki nganzi zi Nzambi, Mfumu yi lulendo lumvimba. 16 Ha yulu kiyunga kyandi na ha yulu bunda dyandi, nkumbu yimosi yisonama ti: «Ntinu yi zintinu na Mfumu yi zimfumu».

17 Nayena mbazi yitelama ha ntangu. Yilooka mu ndinga yingolo na yita ku zinuni zimvimba, zedi kwe pidumuki ha kati-kati di yulu ti: «Yizeeno na yonzameeno mu dyambu di ndambisa yiyinene yi Nzambi! 18 Mwanki ludya misunya mi zintinu, mi zimfumu zi zimbulu-mbulu, mi bantu baa na lulendo, mi zimpunda na binati byawu, misunya mi bantu bamvimba baa na kimpwanza na mindongo, mpe bantu bamfunu na ba bakwe tyakanga.»

19 Nayena kibulu, zintinu zii ha luse lu butoto na mpumbu yi zimbulu-mbulu zawu, yiyonzama mu nwanisa yondowo zakadi ha yulu mpunda na mpumbu andi yi zimbulu-mbulu. 20 Babwila kibulu ha kimosi na mumbikudi wuluvunu, yondowo wuhidika ha ntadisi andi, bimangu bimuhaana hwahwa mu zimbisa yobobo batambula kidimbu ki kibulu, mpe bedi sambilanga kiteki kyandi. Babatuba bamoyo yababole mu dyanga di tiya tu sufele. 21 Bantu basaala, babahonda mu mbele yiyila yedi duukanga mu munwa wu yondowo wuba wuzakala ha yulu mpunda, mpe zinuni zimvimba ziyukuta misunya myawu.