1 Bakala dimosi nkumbu andi Lazalo, wuba na kimbevo. Mwisi-Betani kaba, bwala bu Maliya na Malata, bibusi byandi. 2 Maliya ni mukento bewowo wu mwangumuna mananasi ha yulu bitambi bi Mfumu na wukusuna byo mu milengi myandi. Mpangi andi wu nkumbu Lazalo, wuba na kimbevo. 3 Bibusi bya bibyole, batambika ntumi ku Yesu ti: «Mfumu, yondowo wukwe tyanga, wubela kadi.» 4 Yesu bu kayuwa musamu bewowo, ni kata ti: «Kimbevo bekiki kyaamunata ku lufwa ko. Kansi kyaaba kidimbu kyaahaana nkembo ku Nzambi, mwanki mu kimbevo bekyokyo nkembo yi Mwana Nzambi yiyenika.»

5 Yesu wedi tyanga Malata na mpangi andi yi mukento, mpe na Lazalo. 6 Mpeleko wuyuwa ti Lazalo wuba wubeela, kansi wuzakala dyaka bilumbu byole ha kibuka ki kabeela, 7 mboki, wuta ku milongoki myandi ti: «Tuvutukeno ku kizunga ki Yuda.» 8 Milongoki mi muvutudila ti: «Mulongisi, mwa bilumbu bebibi kwandi, Bayudayo basosidi mu kuhonda mu matadi. Bwabu tiidi mu vutuka koko e?» 9 Yesu wubateela ti: «Nga kuu na bilokola kumi na byole bi kukya mu kilumbu ko e? Tala ti muntu wuna dyata mu kya, kalendi ta kuba ko, mu dyambu ti wuna yena kya ku nza beyiyi. 10 Kansi, tala ti muntu wuna dyata mu mpimpa, waata kuba mu dyambu ti kya kuu mu yandi ko.» 11 Bu kamana zonza bobo, wubwesa ta ti: «Nkayi eto Lazalo bwidi tolo, kansi nenzi mu muvumbula.» 12 Milongoki mivutula ti: «Mfumu, tala ti tolo kwa kabwidi, waanyaka.» 13 Yesu wuzonzila lufwa lu Lazalo, kansi milongoki mi banzila ti ni tolo kwandi tumpamba kana zonzila. 14 Yesu ni katumbu bahubudila wo ti: «Lazalo fwidi.