1 Ku manima ma misamu bemyomyo, Mfumu wusoola makumi nsambwadi na myole mihiika mi milongoki na wubafidisa bole-bole batekila mu kadi mbanza na mu bibuka bikafweti kwenda yandi bende. 2 Wubateela ti: «Kisalu kye yonzika mimbutu kikinene kidi, kansi bisadi bikeke bidi. Buna lombeeno ku Mfumu yi ngyonzokolo kafidisa bisadi mu kwiza yonzika mimbutu. 3 Yendeeno! Nina lufidisa bonso baala ba mameme ha kati di zingo. 4 Lunatandi mbongo ko, ka nkutu ko, ka nsampatu ko. Luhyokisandi ntangu mu kwe heeki mbote mu nzila ko. 5 Yonso-yonso nzo yi lwaakota, teeno ebu: "Kiyenge kiba mu nzo beyiyi." 6 Tala ti muntu wu kiyenge wu momo, kiyenge kyeno kyaaba nandi, tala ti kani, mbo kyaluvutukila. 7 Beno mu nzo beyoyo, dyeno na nweno bimvimba bi baaluhaana, mu dyambu ti kisadi fweni baka mufutu andi. Lwendandi lambaladi nzo ka nzo ko. 8 Mu yonso mbanza yi lwaakota na baalutambula, dyeno byonso bi baluhaana, 9 nyakiseeno zimbevo zimomo na bateeleno ti: "Kimfumu ki Nzambi kyeka lukufi neeno". 10 Kansi mu yonso mbanza yi lwaakota na balembolo lutambula, yendeeno mu nzila zizinene na teeno ti: 11 "Kati fundu-fundu di mbanza eno dinamitini mu bitambi byeto, dya tuna kubula mu luvutudila dyo, kansi zabeeno ti Kimfumu ki Nzambi kyeka lukufi." 12 Nina luteela ti mu kilumbu kyaaba mfundusu, mbanza beyiyi yaatambula kitumbu kivudidi ngolo na ki mbanza Sodomo.

13 Kyadi ku yeno, bisi-Kolazine! kyadi ku yeno, bisi-Betesayida! Mu dyambu ti bimangu bihilama ku yeno ni bihilama ku Tile na ku Sidoni, nganunu ntama bamana viluka, balwata zinkutu na bazakala ha yulu bombe. 14 Ni hahoho, kilumbu kyaaba mfundusu, kitumbu ki lwaabaka kyaavudila ngolo na ki zimbanza Tile na Sidoni. 15 Ngeye Kapenawumi, wuna banza ti baakuzangula natee ku yulu e? Kani, baakukulula natee ku nsi yi bafwa!» 16 Yesu wuteela dyaka milongoki myandi ti: «Wonso waaluyuwila, nyuwidi, wonso waalubisa, mbisidi mpe bisidi yondowo wu mfidisi.»

17 Milongoki makumi nsambwadi na myole mivutuka mu kyese na mita ti: «Mfumu, nkatika mpeve zimbi mpe zi tu tumimini mu nkumbu aku.» 18 Wubateela ti: «Meno nyeningi Satana sotokiningi tuka ku yulu bonso mpedamu.» 19 Yuweno: Meno naluheeni lulendo mu dyata zinyoka na zinkutu-nkutu, na mu dyata lulendo lumvimba lu mutantu. Kedika, kunaani kima kilendi lusa bubi. 20 Luyangalalandi mu dyambu ti mpeve zimbi zilutumimini, kansi yangalaleeno mu dyambu ti nkumbu zeno zi zisonama ku yulu.

21 Mu ntangu beyoyo, Mpeve Yilongo yi fulusa Yesu mu kyese na wuta ti: «Na ku kembidi ngeye Tata, Mfumu yi yulu na butoto, mu dyambu ti zabikisi ku mwa baala bafyoti misamu bemyomyo mi wusweka ku bandwenga na ku banga madyela. Ninga Tata, mu dyambu ti ngeye bwabobo wu tiidi bubela.

22 Tata ani wumpeka bimvimba. Kunani muntu zebi Mwana, tala ti ka Tata ko, mpe kunaani muntu zebi Tata tala ti ka Mwana ko, na ku yobobo Mwana katiidi mu muzabikisa.»

23 Mboki Yesu wubaluka kubela milongoki, wubateela yawu hiika ti: «Kyese ku meso mana yena mi luna yena! 24 Kedika nina luteela, mimbikudi mimingi na zintinu batya mu yena mi luna yena, kansi bayena ko, na batya mu yuwa mi luna yuwa, kansi bayuwa myo ko.»

25 Mulongisi wumosi wu Misiku wuteelama mu tonta Yesu, wuta ti: «Mulongisi, nki fweti sa mu baka luzingu lu mimvu ka mimvu e?» 26 Yandi wumuteela ti: «Bwedi basonika mu Misiku e? Nki tengi e?» 27 Mu muvutudila mvutu, wuta ti: «"Zola Mfumu Nzambi aku mu mutima aku wumvimba na mu mwela aku wumvimba na mu ngolo zaku zimvimba na mu madyela maku mamvimba", mboki "zola mfinangani aku bonso ngebende".» 28 Mboki wumuteela ti: «Mvutu yimbote heeni, sadila bobo na mbo wuzinga.» 29 Kansi, yandi mu kilonka ti kyuvu kyandi kisungama kidi, wuta ku Yesu ti: «Nani wudi mfinangani ani e?» 30 Mu vutula mvutu, Yesu wuta ti: «Bakala dimosi dituuka ku Yelusalemi mu kulumuka ku Yeliko. Wubwilu ku bimpumbulu, ba mubonga bimvimba biba nandi, ba mu tuta nkuba, basala musisa wutabuka ngambu, ni bayenda kwawu. 31 Kuba na Nganga-Nzambi yimosi yedi kulumukina mu nzila beyoyo. Wumuyena, kansi hyokidi kwandi mu lutengo. 32 Bumosi mpe, mu-Leviti wumosi wuyiza tula ha kibuka bekyokyo. Wumuyena, kansi hyokidi kwandi mu lutengo. 33 Kansi mwisi-Samaliya wumosi wuba mu nzyetolo wutula ha kabela. Bu kamuyena, wumufwila kyadi. 34 Wufinama, wubulumuna mafuta na vinu mu zimputa, kengi zo bitende. Ku manima, wumunanguna , wumutuula ha yulu kibulu kyandi, wumunata ku nzo yi banzenza na wumusadisa. 35 Bukya namene, wuduukisa mbongo zole zi bisengo. Wuhaana zo ku mfumu yi nzo yi banzenza na wumuteela ti: "Musadisa, ntentoko yi mbongo zi watotola, mbo na kufuta yo meno bende bu naavutuka."»

36 Mu ngeye, nani mu ya batatu fwanakani muba mfinangani yi muntu bewowo wubwilu ku bimpumbulu e? 37 Wuta ti: «Yondowo wumufwila kyadi.» Yesu wumuteela ti: «Yenda, ngeye mpe, sadila bumosi.»

38 Mu ntangu yi kedi kwe yenzi, wukota ha bwala bumosi, mukento wumosi wumubwana, nkumbu andi Malata. 39 Wuba na mpangi yimosi, nkumbu andi Maliya. Maliya wuba wuzakala ha ndambu yi malu ma Mfumu na wedi yuwa malongi mandi. 40 Malata wuba ntelantela mu bisalu, ni kayenda ta ti: «Mfumu, wuna yena mpasi ko ti mpangi ani kambikila meno kaka bisalu e? Muteela kiza kambakisa.» 41 Mu muhaana mvutu, Mfumu wumuteela ti: «Malata, Malata, wuna kikwamisa na weka ntelantela mu misamu mimingi. 42 Kima kimosi kaka kii mfunu. Maliya sodidi kikunku kivudi kimbote, balendi kye muzyona ko.»