1 Mu kilumbu ki saba, Yesu wuhyokila mu mfuba zibele. Milongoki myandi myedi kwe hedi mbutu zibele, bedi kwe zokoni zo mu moko mawu, ni bedi kwe dye zo. 2 Mwa kabu di Bafalisi bata ti: «Bila nki luna hiidikila misamu mi bakanikina kilumbu ki saba e?» 3 Yesu wubavutudila ti: «Lutanga ko misamu mihidika Davidi bu kaba na nsatu, yandi mpe na bantu baba nandi kintwadi e? 4 Wukota mu nzo-Nzambi, wubonga mampa ma minkayulu, wudya mo na wuhaana mo ku bantu baba nandi kintwadi, mpeleko zinganga-Nzambi kwandi ba na luve lwe dya mo.» 5 Yesu wubateela dyaka ti: «Mwana Muntu wudi Mfumu yi saba.»

6 Kilumbu kihiika ki saba, Yesu wukota mu nzo yi lusambulu yi Bayudayo mu longa. Muba na bakala dimosi diba na kooko ku mimbakala kusyoka. 7 Milongisi mi Misiku na Bafalisi bedi mulanganga, mu tala kana waanyakisa mu kilumbu ki saba, mwanki ba baka kibila kiba mufundila. 8 Kansi, Yesu wuzaba mabanza mawu na wuteela ku bakala diba na kooko kusyoka ti: «Yiza telama, ha kati di bundu.» Wuyiza telama ha kati dyawu. 9 Mboki Yesu wubafuula ti: «Ntiidi mu zaba nki bifwanakani mu hidika mu kilumbu ki saba e? Musamu wumbote hoti musamu wumbi e? Kuvuukisa muntu hoti kumuhombisa e?» 10 Bu kasungimina bamvimba, wuta ku bakala ti: «Lambula kooko kwaku.» Ni kalambula ko, mboki kooko kwandi ku beloka. 11 Mankesi ma bahyoka kitezo, bayuwasana yawu na yawu mu zaba nki balenda mu sa.

12 Mu bilumbu bebyobyo, Yesu wutomboka ku yulu mulandu. Wusambila Nzambi mpimpa yimvimba. 13 Bwisi bu bukya, wutumisa milongoki myandi na wusoola kumi na bole, ba kaahaana nkumbu yi zintumwa: 14 Simoni, wukahaana nkumbu yi Petelo na Andele mpangi andi, Zaki, Yoane, Filipi, Batelemi, 15 Matayi, Toma, Zaki mwana wu Alefe, Simoni mu-Zeloti, 16 Yuda mwana wu Zaki na Yuda Isikalyoti waamuyekola.

17 Wukulumuka nawu na wuyenda telama ha nsuku, haba mpumbu yiyinene yi milongoki myandi na mpumbu yi bantu yifuma ku kizunga kimvimba ki Yuda, ku Yelusalemi na kizunga ki mubu kidi belabela na mbanza yi Tile na yi Sidoni. 18 Bayiza mu muyuwa na mu nyakusu bimbevo byawu. Bantu bedi kwamusu ku mpeve zimbi, banyaka. 19 Bantu bamvimba bedi sosa mu musimba, mu dyambu ti lulendo lwedi duuka mu yandi, lwedi nyakisa bamvimba.

20 Yesu bu katala milongoki myandi, wuta ti:

«Kyese ku yeno bawelo, mu dyambu ti kimfumu ki Nzambi kyeno kidi!

21 Kyese ku yeno luna nsatu bubedidi, mu dyambu ti mbo luyukuta! Kyese ku yeno luna dila, mu dyambu ti mbo luseha.

22 Kyese ku yeno bu baa lubela, bu baa lukuma, bu baa lutuka na bu baa vweza nkumbu eno, mu dyambu di Mwana Muntu! 23 Yangalaleeno mu kilumbu bekyokyo na duzumukeeno mu kyese, mu dyambu ti musendo eno waaba wuwunene ku yulu. Bwabobo mpe matata mawu bedi zominanga mimbikudi.

24 Kansi, kyadi ku yeno bamvwama,

mu dyambu ti lubeki bwabu mbombolo eno!

25 Kyadi ku yeno bwabu lumeni yukuta,

mu dyambu ti mbo luyena nsatu!

Kyadi ku yeno luna seha bwabu,

mu dyambu ti lwaakota mu kifwidi na lwaadila!

26 Kyadi ku yeno bu baa lusiika ku bantu bamvimba, mu dyambu ti ni bwabobo mpe matata mawu bedi sanga ku mimbikudi mi luvunu!

27 Kansi, nina luteela yeno luna nyuwa na luteedidi ti: zoleeno mitantu myeno, hidikeeno misamu mimbote ku bana lubela, 28 sakumuneeno bana lusinga, sambidileeno bana luyenisa mpasi. 29 Tala ti muntu wukubendi mbata ha bundi dimosi, mutambila mpe dihiika, tala ti muntu wukubongidi kiyunga kyaku, bika kabonga mpe kinkutu kyaku. 30 Haana ku yondowo wu kulombidi kima, tala ti muntu bongidi kima kyaku, mubwongodila kyo. 31 Myo mi lutiidi ti bantu bahiika ba luhiidikila, yeno mpe bahidikileeno myo. 32 Ti lutiidi kwandi bakwe lutyanga, nkye ndandu lwaabaka e? Minsumuki mpe mikwe tyanga babatiidi. 33 Tala ti lukwe hidikanga misamu mimbote ku bakwe luhiidikilanga myo, nkye ndandu lwaabaka e? Baminsumuki mpe bobo kwandi bakwe saanga. 34 Tala ti ludefisi ku balenda luvutudila, nkye ndandu kwandi lwaabakila hoho e? Minsumuki mpe ba kwe defisanga ku baminsumuki, mwanki batambula kumanima mufutu wo kwa. 35 Kansi zoleeno mitantu myeno, hidikeeno misamu mimbote na defiseeno wulembolo ntentoko. Buna musendo eno waaba wuwunene, mboki balutumisina baala ba Nzambi yi zangama, mu dyambu ti Yandi wumbote kadi ku bantu bakwe lembolo mu vutudilanga matondo na ba na mutima wumbi. 36 Beno bantu ba nkenda bonso Tata eno.

37 Lufundisandi ko na lwaafundusu ko, luhaanandi nzengolo ko na lwaabaka nzengolo ko, lemvokileeno na mbo lulemvokolo. 38 Kabuleeno na mbo baalukabudila: mbo bafulusa mu posi di kinkutu kyeno ndambu yimbote, yi batoma ningisa, koma, mboki dyatoma fuluka na kusampa, mu dyambu ti kitezo ki lukwe tezilanga, kyakyokyo mpe baalutezila.»

39 Wubateela dyaka kingana eki: «Mpofo lenda nata munandi mpofo e? Nganunu ya babole ba bwa mu bulu ko e? 40 Mulongoki kalendi hyoka mfumu andi ko, kansi mulongoki wutomini longoka, mbo kaaba bonso mfumu andi. 41 Mu dyambu di nki wuna yenina kititi kii mu diisu di mpangi aku, kansi wuna yena kibuku kibaya kii mu diisu dyaku ko e? 42 Bwedi lenda teela ku mpangi aku ti: "Bika na katula kititi kii mu diisu dyaku", ngeye wuna lembana mu yena kibuku kibaya kii mu diisu dyaku e? Ngeye muntu wu diisu ku nsye lukaya wudi! Katula ntete kibuku kibaya kii mu diisu dyaku, mboki mbo wuyena bwedi lenda katudila kititi kii mu diisu di mpangi aku.

43 Kunani muti wumbote wukwe butanga mbutu zimbi, na muti wumbi wukwe butanga mbutu zimbote. 44 Mu dyambu ti kadi muti wukwe zabulungu mu mbutu zandi. Bakwe helanga mbutu zi fike mu muti wu nsende ko mpe bakwe helanga mbutu zi muti wu vinu mu minkanga ko. 45 Muntu wumbote, kwe duukisanga misamu mimbote mu dyambu ti mutima andi wumbote wudi, kansi muntu wumbi kwe duukisanga misamu mimbi mu dyambu ti mutima andi wumbi wudi. Mu dyambu ti makwe duukanga ha munwa, mamomo mafulukidi mu mutima andi.

46 Mu dyambu di nki lukwe ntumisinanga ti "Mfumu! Mfumu!", Na lusadilanga eno ko ma nakwe luteelanga? 47 Biika na lulonka kifwani ki muntu wuna kwiza ku meno, kwe yuwanga malongi mani na kwe sadilanga mo. 48 Yandi fwanakani ku bakala dimosi, wu tunga nzo, wutoma haka butoto, mboki wutunga lufulu ha yulu matadi. mbukila yi yiza, nkuka yibwa mu nzo beyoyo, kansi kabwisa yoko, mu dyambu ti yiba yitungu bumbote. 49 Kansi muntu wukwe yuwanga na kwe lembolo sadilanga mo, fwanakani bonso muntu tungidi nzo ha yulu butoto, wulembolo haka lufulu. Nkuka yibwidi mu nzo, na nzo yibwidi mpe yitumbu bwonzomoka.»