1 Yesu wufuluka mu Mpeve Yilongo, wusisa nzadi yi Yolodani na wuyenda ku nsi yinkatu mu lutwadusu lu Mpeve. 2 Nkadyampemba wumutonta koko mu bilumbu makumaya (40). Mu bilumbu bebyobyo, Yesu kadya kima ko. Ku manima, wuyena nsatu. 3 Hahoho, Nkadyampemba ka muteela ti: «Tala ti ngeye Mwana Nzambi wudi, tuma ku tadi bedidi di kituka dimpa.» 4 Yesu wumuvutudila ti: «Basonika: Luzingu lu muntu luu kaka mu dimpa ko.»

5 Nkadyampemba wumunata ha yulu mulandu na wumulonkisa bimfumu bimvimba bi nza mu nkumbu mosi, 6 na wumuteela ti: Nina kuhaana lulendo na bimvwama bimvimba bi kimfumu bekiki: mu dyambu ti meno bahaana byo, mpe ndendi byeheeka ku wonso muntu wu ntiidi. 7 Tala ti wumfukimini, bimvimba byaaba byaku. 8 Yesu wumuvutudila ti: «Wusonama: Mfumu Nzambi aku kaka fweti fukimina, mpe Yandi kaka fweti sadila.»

9 Nkadyampemba wubwesa munata dyaka ku Yelusalemi, wumutuula ha nsongi yi nzo-Nzambi na wumuteela ti: «Tala ti Mwana Nzambi wudi, wukituba ku nsi, 10 mu dyambu ti basonika: "Nzambi waahaana mu dyambu dyaku ntumunu ku zimbazi zandi zi kukeba", 11 mpe dyaka: "Baakuyaka mu moko mawu, mwanki kuulu kwaku kulembolo koyama ha tadi."» 12 Yesu wumuvutudila ti: «Basonika: "Wulendi tonta Mfumu Nzambi aku ko."» 13 Nkadyampemba bu kamanisa mu tonta Yesu, wusa musisa natee mu hwahwa dihiika.

14 Yesu wuvutuka ku Ngalili wuba wufuluka na lulendo lu Mpeve Yilongo. Kikumu kyandi kimwangana mu kizunga kimvimba. 15 Wedi kwe longingi mu zinzo zi lusambulu zi Bayudayo mpe bantu bamvimba bedi mu musiika.

16 Yesu wuyenda ku mbanza Nazaleti ku kakudila. Kilumbu ki saba, wukota mu nzo yi lusambulu yi Bayudayo bonso bu ba kifu kyandi. Wutelama mu tanga Masonama 17 Bamuhaana buuku di mumbikudi Yesaya. Wuzingumuna dyo na wutanga mambu ma ba basonika ebu:

18 «Mpeve yi Mfumu yi mu meno,

mu dyambu ti wunsoodidi mu mwangisa musamu wumbote ku bamputu.

Wuntambikidi mu zabikisa nkululu ku bantu baa mu kinkole,

mu zibula meso ku bampofo,

na mu haana kimpwanza ku bantu baa mu mfyetokoso,

19 mu samuna mumvu wumbote wu Mfumu, wu kaa lonka bumbote bwandi.»

20 Ku manima, wuzinga buuku, wuvutula dyo ku kisadi, mboki wuzakala. Bamvimba baba mu kati di nzo yi lusambulu yi Bayudayo bamusungimina. 21 Hahoho katona mu bateela ti: «Bubedidi, Masonama ma luyudi, menzi detila.» 22 Bamvimba bamusiika, bayituku mu mpova zimbote zedi totoka mu munwa andi na bata ti: Wuwu kaa mwana Yosefi ko? 23 Yesu wubateela ti: «Kampe lwaanteela kingana eki: "Ngwe kibuki, buka nitu aku ngebende." Mpe mbo lunteela dyaka ti: "mimvimba mi tuyudi, mi wusidi ku Kapenawumi, hidika myo mpe mu nsi aku."» 24 Wubwesa bateela dyaka ti: «Kedika nina luteela: mumbikudi katambulungu bumbote mu nsi andi ko. 25 Kedika nina luteela: mu ntangu yiba mumbikudi Eliya, mu mimvu mitatu na ngonda sambanu mvula zinooka dyaka ko, malema mangolo mabwa mu nsi yimvimba. Mafoola mamingi maba ku Isaeli, 26 kansi, bafidisa Eliya ku mafoola bemomo ko. Ku foola dimosi kwandi diba ku mbanza Salepita, ku nsi yi Sidoni. 27 Mu ntangu yi mumbikudi Elize, bantu babingi babeela bwazi ku Isaeli, kaa wumosi mu yawu wunyaka ko, kansi Naamani kwandi mwisi Siliya wunyaka.»

28 Bantu bamvimba baba mu nzo yi lusambulu yi Bayudayo, bafuluka mu mankesi bu bayuwa misamu bemyomyo. 29 Batelama, bamukuma ha mbanza mpe bamunata natee ha yulu mulandu wutungulu mbanza awu mwanki bamununguna ku benga. 30 Kansi Yesu wuhyokila ha kati dyawu, mboki wuyenda kwandi.

31 Yesu wukulumuka ku mbanza yi Kapenawumi, mbanza yi kizunga ki Ngalili, wedi longanga bantu kilumbu ki saba. 32 Bantu bayituku mu ndongosolo andi mu dyambu ti wedi longilanga mu lulendo. 33 Mu nzo yi lusambulu yi Bayudayo, muba na bakala dimosi diba na mpeve yimbi. Wulooka mu ngolo ti: 34 «Ha! Yesu mwisi-Nazaleti, nkye dyambu ngeye na yeto e? Wizidi mu kwiza tufukisa e? Nzebi ngeye nani wudi: Wulongo, Nzambi wu katambikidi!» 35 Yesu wumubamina na wumuteela ti: «Kanga munwa aku, duuka mu nitu yi bakala bedyodyo!» Mpeve yimbi yilosa ha nsi bakala bedyodyo ha kati di bundu di bantu na yiduuka mu yandi, ka musa bubi ko. 36 Bantu bamvimba batoma yituku na bafulasana yawu na yawu ti: «Nkye mutindu mpova zi e? Wuna tuma mpeve zimbi mu ngolo na mu lulendo na zina duuka!» 37 Buna kikuumu ki Yesu kimwangana ku ndambu ka ndambu mu kizunga bekyokyo.

38 Bu kaduuka mu nzo yi lusambulu yi Bayudayo, wuyenda ku nzo yi Simoni. Buko bu Simoni wuba na yuku-yuku dingolo na balomba ku Yesu ka munyakisa. 39 Yesu wuyinama ha ba mbevo, wubamina yuku-yuku, mboki yuku-yuku diduuka. Buko wutumbu telama na wutona mu bakubikila meza.

40 Ntangu bu yidyama, bamvimba baba na zimbevo ziba na mayeela ma mumpila mumpila, babanata ku Yesu. Wutentika moko ku kadi mbevo na wu banyakisa. 41 Mpeve zimbi ziduuka mu bantu babingi ni zedi kwe looki ti: «Ngeye Mwana Nzambi wudi.» Kansi wubabamina na kedi bahaana luve lwe zonzila ko, mu dyambu ti bazaba ti Yandi ni Klisto.

42 Bwisi bu bukya, wuduuka na wuyenda ha kibuka ki yandi hiika. Mpumbu zi bantu zedi kwe musosi na ziyenda natee ha kaba. Batya mu mudika mu kwenda mwanki kalembolo basisa. 43 Kansi wubateela ti: «Mfweti kwenda mwangisa mpe musamu wumbote wu Kimfumu ki Nzambi ku mbanza zihiika, dyambu dyadyodyo Nzambi ka mfidisidi.» 44 Wedi kwe longingi ku Yuda mu zinzo zi lusambulu zi Bayudayo.