1 Yesu wutumisa milongoki kumi na myole na wubahaana lulendo na luve mu kuma mpeve zimbi zimvimba na mu nyakisa bimbevo. 2 Wubafidisa mu mwangisa Musamu wu Kimfumu ki Nzambi na mu nyakisa zimbevo. 3 Wubateela ti: «Ka lunatandi kima mu nzyetolo eno ko, ka muti ko, ka nkuta ko, ka mbongo ko, mpe lunatandi binkutu byole ko. 4 Yonso nzo yi baalutambula, beno momo natee kilumbu ki lwaakwenda. 5 Konso ku baalembolo lutambula, bu luna duuka mu mbanza beyoyo, kubuleeno fundu-fundu di bitambi byeno bonso kimbangi mu mavanga mawu mambi.» 6 Bu bayenda, bedi kwe hyokidingi mu mabwala mamvimba mu kwe mwangisi Musamu Wumbote, na mumvimba bedi kwe nyakisingi zimbevo.

7 Elode ntinu yi Ngalili wuyuwa misamu mimvimba myedi hyoka, madyela ni mamuhwa. Mu dyambu ti bantu bahiika bedi kwe tengi ti: «Yoane wufulukidi mu bafwa.» 8 Bahiika ti: «Eliya yenikini.» Bahiika dyaka ti: «Mumbikudi wumosi wuntama wufulukidi mu bafwa.» 9 Ni hahoho, Elode kateela ti: «Yoane! Meno natuma ti ba mutabula mutu. Bwabu yondowo nani, wu nina yuwila nsangu zi bobo e?» Ni kedi sosa mu muyena.

10 Bantumwa bu bavutuka, bayadila Yesu mimvimba mi bahidika. Mboki Yesu wubanata, wuyenda nawu ha kibuka kilembolo ba bantu, ku ndambusu yi mbanza yi Betesayida. 11 Mpumbu zi bantu bu zi bakula ni zi mulanda. Wubatambula na wubazonzila misamu mitadidi Kimfumu ki Nzambi. Wunyakisa yobobo baba na nsatu yi lunyakusu. 12 Bwisi bu butoona mu yila, zintumwa kumi na zole ziyiza muteela ti: «Vutula mpumbu zi bantu mwanki benda basosa ku balenda bwila tolo na baka bye dya mu mabwala na mwa zinzo zi mimvungi, mu dyambu ti huma ha tudi ha na kima ko.» 13 Kansi wubateela ti: «Bahaaneeno yeno bende bindya!» Bamuvutudila ti: «Mampa matanu na mbizi zole kwandi zi neto, kadi buna ti twenda yeto bende tu sumbila bantu bamvimba be baba bindya.» 14 Baba mafunda matanu ma babakala. Yesu wuteela ku milongoki myandi ti: «Bazakiseno mu makabu makumatanu matanu.» 15 Ni basadila bo. Babazakisa bamvimba. 16 Wubonga mampa ma matanu na mbizi zole, wusendola meso ku yulu ni kasakumuna byo. Bu kamana bye bukuna ni kahaana byo ku milongoki myandi mwanki bakabula ku mpumbu yi bantu. 17 Bamvimba badya na bayukuta. Ku manima, baludisa mikuta kumi na myole mu bibuku bisadila.

18 Kilumbu kimosi, Yesu wedi sambila ha kibuka kilembolo ba bantu, milongoki mpe miba nandi kintwadi. Buna wubafuula ti: «Mu nzonzolo zi bantu, meno nani nidi e?» 19 Bamuvutudila ti: «Bantu bana ta ti Yoane Mbotiki wudi, bahiika ti Eliya, bahiika dyaka ti wumosi mu mimbikudi mintama wufulukidi mu bafwa.» 20 Na wubateela ti: «Bwabu yeno bwedi lunata, meno nani nidi e?» Petelo wumuvutudila ti: «Ngeye ni Mesiya ma Nzambi.»

21 Yesu wutoma badika mulembolo we ta ku kani muntu ko. 22 Wubwesa ta ti: «Bufweni ti Mwana Muntu ka yena mpasi zizingi. Bambuta na zimfumu zi zinganga-Nzambi na milongisi mi Misiku baamunyafuna. Mbo bamuhonda na mu kilumbu kibitatu, waafuluka mu bafwa.»

23 Ku manima wuta mpe ku bamvimba ti: «Tala ti muntu tiidi mu ndanda, kakizimbakana yandi bende, kananguna kulunsi dyandi kadi kilumbu na kandanda. 24 Mu dyambu ti wonso muntu waasosa mu vukisa luzingu lwandi, lwaakahombisa. Kansi wonso muntu waahombisa luzingu lwandi mu dyambu dyani, lwaakavuukisa. 25 Nkye ndandu kwandi ku muntu beki bimvwama bi nza yimvimba, tala ti zimbisi luzingu lwandi hoti hombisi lo yandi bende e? 26 Kedika, wonso muntu waayena nsoni mu meno na mu mambu mani, buna Mwana Muntu mpe mbo kamuyenina nsoni mu ntangu yi kaavutuka mu nkembo andi, mu mukembo wu Tata andi na wu zimbazi zi longo. 27 Wukedika nina luteela, mwa ndambu bantu mu yobobo ba haha, baakifwila ko tala ti bayeni kimfumu ki Nzambi ko.»

28 Yesu bu kamana zonza, bilumbu nana bihyoka kumanima, wuyenda ha kimosi na Petelo na Yoane na Zaki ha yulu mulandu mu sambila. 29 Mu ntangu yi kedi sambila, kini kyandi kikituka na binkutu byandi biyiza ba na vekoveko. 30 Bu bayitukulu kwawu, ni babakala bole bedi mokana nandi: Eliya na Mose, 31 bayenika mu nkembo, bedi zonzilanga nkwendolo andi bwedi yaahyokila ku Yelusalemi. 32 Petelo na banandi babwa tolo tu mpondi. Kansi bu bavumbuka, bayena nkembo andi na babakala bole batelama nandi. 33 Mu ntangu yi bahambana nandi, Petelo wuteela Yesu ti: «Mulongisi, bumbote mu zakala haha. Tutungeeno zinzo zitatu zi bikapu, yimosi yi yaku, yimosi yi Mose na yimosi yi Eliya.» Kedi zaba misamu mikedi ta ko. 34 Bu kedi zonza bobo, tuti diyiza na di bafuka. Bayena bunkuta bubwingi mu ntangu yi bedi kota ku nsye tuti. 35 Mpe ndinga yimosi yi yuwakana ku nsye tuti: «Yandi ewu ni mwana ani wu nasodidi. Muyuwileeno!» 36 Ndinga beyoyo bu yiyuwakana, buna Yesu weka yandi hiika. Milongoki miba na swii. Mu ntangu beyoyo, milongoki ba ta misamu bemyomyo mi bayena ku kani muntu ko.

37 Kilumbu kilanda, bu bakulumuka mulandu, mpumbu yiyinene yi bantu yiyiza mu bwana. 38 Ha kati di mpumbu, bakala dimosi ditumbula ndinga na dita ti: «Mulongisi, ndevokila, na kulombidi wunyakisa mwana ani mu dyambu ti mwana wawuwu kwandi wunani! 39 Mpeve yimbi yikwe mulwatanga na yikwe musanga ti kenda lookani, mpe yikwe muningisanga mu ngolo, yikwe mutotolanga mafulu mu munwa na mu mpasi yikwe mukatukilanga buna yimeni muhongisa. 40 Ndombidi ku milongoki myaku bakuma yo, kansi balembani kwawu.» 41 Yesu wuta ti: «Ha! Yi mbandu yi lembolo ba na kiminu mpe yi vila, ntangu kwa naaba neeno mpe naaluvibidila e? Twala mwana aku eha.» 42 Mwana bu wuba bela-bela na Yesu, nkadyampemba wumulosa ha nsi na wumuningisa mu ngolo. Kansi Yesu wubamina mpeve yimbi mpe wunyakisa mwana na wu muvutula ku tata andi. 43 Bamvimba bayituku mu mpila lulendo lu Nzambi.

Bamvimba bedi yitukungu mu myo mi kedi sanga, wuteela milongoki myandi ti: 44 «Yuweeno misamu emi: Mwana Muntu waayekolo mu moko ma bantu.» 45 Kansi, bazaba musamu bewowo ko, mu dyambu ti wuba wuswekama mwanki balembolo bakula mbangudulu, na bedi yena bunkuta mu mufuula mu musamu bewowo.

46 Bayumana yawu na yawu mu zaba nani ha kati dyawu hyokidi bunene. 47 Yesu wuzaba mayindu ma mitima myawu, wubonga mwa mwana wumosi na wumutuula ha ntendo andi 48 na wuta ti: «Wonso muntu waatambula mwana bewuwu mu nkumbu ani wuntambudi meno bende, mpe wonso wuntambudi, tambudi yondowo wumfidisi. Mu dyambu ti yondowo hyokidi bukeke ha kati dyeno, ni yandowo vudidi bunene.»

49 Mu vutula mvutu, Yoane wuta ti: «Mulongisi, tuyeni muntu wumosi wuna kuma mpeve zimbi mu nkumbu aku, ni tusosidi mu mukanikina mu dyambu ti kana kwe kulandi kintwadi neto ko.» 50 Yesu wumuvutudila ti: «Lumukanikinandi ko, kedika, wonso muntu lembolo ba mutantu eno, ni mukundi eno.»

51 Bilumbu bye tomboka ku yulu bu bifwana, wubonga nzengolo mu kwenda kaka ku Yelusalemi, 52 ni kafidisa bitwami ku mutwala andi. Bayenda na bakota ha bwala bumosi bu bisi-Samaliya mwanki bakubika nyizulu andi. 53 Kansi, bisi bwala bebobo bamutambula ko mu dyambu ti wedi kwenda ku Yelusalemi. 54 Bu bayena bobo, Milongoki myandi Zaki na Yoane bamuteela ti: «Mfumu, tiidi ti tulomba tiya tu kulumuka ku yulu na twiza tu bayoka na yengi-yengi e?»

55 Wubabalukila na wubabamina. 56 Mboki bahyokila ku bwala buhiika.

57 Mu ntangu yibaba mu nzila, muntu wumosi wumuteela ti: «Nina kulanda konso-konso ku waakwendisa.» 58 Yesu wumuteela ti: «Mibaku mi na miduka, nuni zi yulu zi na mazanza, kansi Mwana Muntu ka na kibuka kye humina ko.»

59 Wuteela ku wuhiika ti: «Ndanda.» Yondowo ni kamuvutudila ti: «Mfumu, mpeka luve nateka kwenda ziika tata ani.» 60 Wumuteela ti: «Bika bafwa bazikasana yawu na yawu*, kansi ngeye yenda wusamuna Kimfumu ki Nzambi.»

61 Wuhiika wumuteela ti: «Naakulanda Mfumu, kansi mpeka luve na teka kwenda haana mbote yi mansukina ku kanda dyani.» 62 Yesu wumuteela ti: «Wonso muntu simbidi nsengo ha kooko na bwesi tadisa ku manima, kafwanakani mu kimfumu ki Nzambi ko.»