1 Yesu bu kazungisa meso, wuyena mvwama zedi tuulanga minkayulu mu kima ki minkayulu. 2 Wuyena mpe foola dimosi di muwelo dituula momo mbongo yi kisengo zole. 3 Ni hahoho kateela ti: «Kedika nalutedidi, foola bedidi di muwelo divudidi haana mu bamvimba. 4 Mu dyambu ti bamvimba bahaana mbongo zilembolo ba nawu mfunu, kansi mu bumputu bwandi heeni zimvimba zibedi nandi nsatu mu diila.»

5 Mwa kabu di bantu dyedi zonzilanga kitoko ki Nzo-Nzambi mu matadi mandi na bima bihaanu ku Nzambi mu tomisa yo. Kansi Yesu wubateela ti: 6 «Mu bilumbu bina kwiza, kwaabwesa sala kaa tadi dimosi ha yulu tadi nandi ko mu bibi bi luna yena. Bimvimba byaamana mwangana.»

7 Bamufuula ti: «Mulongisi, nkye kilumbu kwandi misamu bemimi myaahilama e? Nkye kidimbu kyaalonka ti bwabu mitudidi e?» 8 Yesu wuvutula ti: «Kebeeno kweno! Luhunukandi ko! Mu dyambu ti bantu babingi baakwiza mu nkumbu ani, baaluteela ti: "Meno ni Mesiya" mpe "Ntangu yifweni." Kansi lubalandandi ko. 9 Bu lwaayuwa ti bana zonzila zimvita na bikindu, luyenandi bunkuta ko, mimvimba bemyomyo myaateekidila. Kansi yaa tumbu ba nsukunu yi nza ko.» 10 Mboki wubwesa ta dyaka ti: «Bantu ba nsi yimosi banwanisa bantu ba nsi yihiika, bantu bantinu yimosi baanwanisa bantu bantinu yihiika. 11 Butoto bwaazakama, malema na mayela maa ba mu bizunga bibingi. Misamu minsisi myaabwa, mboki ku yulu kwaayenika bidimbu bingitukulu. 12 Kansi teekila misamu bemyomyo mituula, baalukanga, baaluyenisa mpasi, baaluyekula mwanki balufundisa mu zinzo zi lusambulu zi Bayudayo, na baalukotisa mu boloko. Mboki baalufundisa ha ntadisi yi zintinu na zimfumu zi luyalu mu dyambu di nkumbu ani. 13 Dyaaba hwahwa ku yeno mu nteela kimbangi. 14 Zabeeno ti luna dyambu di lwaateka kubika ko mu nwanina nitu zeno. 15 Mu dyambu ti mebende na luhaana mpova zi lwaazonza na ndwenga, mwanki mitantu myeno milembolo lubindisa mpaka na lubangisa. 16 Bibuti byeno, zimpangi zeno, bisi-kanda dyeno na zinkayi zeno baaluyekola. Babingi ha kati dyeno baahonda. 17 Bantu bamvimba baalubela mu dyambu di nkumbu ani. 18 Kansi, kaa mulengi wumosi wu mutu eno waakatuka ko. 19 Tatamaneeno: bwabobo lwaavuukisila luzingu lweno.

20 Bu lwaayena ti mbanza Yelusalemi yizungululu ku binwani, zabeeno ti ntangu andi ye mu mwangisa yeka lukufi. 21 Ni hahoho, yobobo baaba ku Yuda bafweti tinina ku milandu, yobobo baba ku kati di Yelusalemi bafweti duuka, mboki yobobo baba ku mfuba balendi kota dyaka ku mbanza ko. 22 Mu dyambu ti byaaba bilumbu bi lufundusu, byaasa ti mimvimba mi mu Masonama ma Longo milunga. 23 Mu bilumbu bebyobyo, nkye mpila kyadi ku bakento baaba na mazimi na baanwika baala mabene! Mu dyambu ti mpasi zingitukulu zaabwa mu nza mpe nganzi zi Nzambi zaasemba mukangu bewowo. 24 Baabahonda mu sabala, baabanata zinkole mu nsi zimvimba zi banzenza, ba mwangisa beni Yelusalemi natee ntangu awu bu yaahwa.

25 Bidimbu byaayenika ku ntangu, ngonda na mbwetete. Mpe ha butoto, zinsi zaaba ku nsye mpasi zingitukulu, zaazaba ko nki balendi sa mu dyambu di lusuku lu mubu na bipo bi mamba. 26 Bantu baafwa mu bunkuta bu baabanza misamu myaahyoka ha luse lu butoto, mu dyambu ti lulendo lu mayulu lwaaningana. 27 Hahoho, lwaayenina Mwana muntu wuna kwiza mu matuti mu lulendo lu ngolo na mu nkembo yiyinene. 28 Misamu bemyomyo bu myaatona mu hilama, telameeno na nanguneeno mitu eno, mu dyambu ti nkudulu eno yeka lukufi.»

29 Ku manima, Yesu wubateedidi kingana eki: «Sungimineeno muti wu fike na miti mimvimba mihiika: 30 bu lwaayena ti makaya mawu matonini mu sasa, luzebi ti ntombo yeka lukufi. 31 Bumosi mpe bu lwaayena ti misamu bemyomyo milungidi, zabeeno ti Kimfumu ki Nzambi kyeka lukufi. 32 Kedika nina luteela, mbandu beyiyi yilendi zimbala ko tala ti mimvimba mi lungidi ko. 33 Yulu na butoto byaahyoka, kansi mambu mani maahyoka ko.

34 Kebeeno kweno! Mitima myeno mibandi ku nsye kinanga ki minkembo, ki kindufu na manyongo ma luzingu ko, nganunu kilumbu ki lufundusu kyaalukwizila na byu, 35 bonso mpwasa, kyaakwiza ku bantu bamvimba ba mu nza. 36 Lubwandi tolo ko, kansi ntangu ka ntangu sambilangeeno, mwanki luvuuka mu misamu mimvimba myaalutudila na luba batelama ha ntadisi yi Mwana muntu.»

37 Mu mwini, Yesu wedi longanga mu nzo-Nzambi, kansi mu nkokila wedi kwendanga ha yulu mulandu wu Olive mu hyokisila mpimpa. 38 Namene, mukangu wumvimba wedi kwizanga ku yandi mu nzo-Nzambi mu muyuwa.