1 Kabu dimvimba di bakuluntu di Bayudayo batelama na banata Yesu ha ntadisi yi Pilatu. 2 Bu bedi mufunda bata ti: «Tubweni muntu bewuwu buna wuna sindikila mukangu eto munangumuka, mulembolo mfuta mpaku yi Kayisali, mboki wukiteedi yandi bende ti, yandi ni Klisto, ntinu.» 3 Pilatu wumufuula ti: «Ngeye ni ntinu yi Bayudayo e?» Wumuvutudila ti: «Ngeye wuna we ta.» 4 Pilatu wuteela zimfumu zinganga-Nzambi na mukangu ti: «Mbeki kani kibila kye zengila muntu bewuwu lufwa ko.» 5 Kansi batatamana muta ti: «Mu ndongolo andi wuna sindikila mukangu mu nangumuka. Wutona ku kizunga ki Ngalili na wuhyokidi mu kizunga kimvimba ki Yuda, bwabu weka ehaha.»

6 Pilatu bu kayuwa misamu bemyomyo, wubafuula ti: «Muntu bewuwu mwisi-Ngalili kadi e?» 7 Bu kayuwa ti mu kizunga kyedi yaalanga Elode kafuma, wumufila ku Elode, mu dyambu ti wuba mu bilumbu bebyobyo ku mbanza Yelusalemi. 8 Elode bu kayena Yesu wutoma yangalala. Mu kikuumu ki kedi yuwanga tuka ntama mu yandi, wuba nangunda muyena ka sa kimangu ha meso mandi. 9 Wumuziika byuhu bibingi, kansi Yesu kamuvutudila mvutu ko. 10 Zimfumu zinganga-Nzambi na milongisi mi Misiku baba hoho, bedi mufundanga mu ngolo zimvimba. 11 Elode mpe na zimbulu-mbulu zandi bamuvweza. Ku manima bu bamana mu seha, na mu mulwika kinkutu kintoko beni, bamuvutula ku Pilatu. 12 Mu ntama, Elode na Pilatu baba zimbeni, kansi mu kilumbu bekyokyo bayiza ba bakundi.

13 Pilatu wukutikisa zimfumu zinganga-Nzambi, mfumu zi Bayudayo na mukangu, 14 wubateela ti: «Luntwadidi muntu bewuwu na lunteedidi ti wuna sindikila mukangu mu nangumuka. Kansi meno bu namufudidi ha ntadisi eno, mbeki kibila kye muzengila lufwa ko mu misamu mi luna mufundila. 15 Elode mpe kamubeki kibila ko, mu dyambu ti wumuvutudi. Ni hahoho, ku na musamu wu kasiidi ko waasa ti bamuzengila lufwa. 16 Bu namana muzubisa bikoti, kumanima mbo namuyambula.» [17 Konso mukembo wu Pake, Pilatu wuba na kifu kye yambulanga nkole yimosi.] 18 Bamvimba mu kintwadi balokana ti: «Honda muntu bewuwu, na tuyambudila Balabase!» 19 Balabase bamutuula mu boloko mu dyambu di nkindu yibwa mu kati di mbanza mpe wuhonda muntu. 20 Pilatu bu kaba na mayindu me yambula Yesu, wubwesa zonza dyaka ku mukangu. 21 Kansi mukangu wumvimba wulookana: «Mukoma ha kulunsi! Mukoma ha kulunsi!» 22 Mu nkumbu yi tatu, Pilatu wubafuula dyaka ti: «Nkye musamu wumbi kasiidi e? Mbeki kibila kye muzengila lufwa ko. Bu namana muzubisa bikoti, kumanima mbo namuyambula.» 23 Kansi batatamana mu lookana mu ngolo, na balomba bamukoma ha kulunsi. Banunga mu dyambu di milooko myawu. 24 Pilatu ni kalungisa luzolo lwawu. 25 Wubayambudila muntu wu bedi lomba, wu batuula mu boloko mu dyambu di nkindu na kuhonda muntu, mpe wubayekodila Yesu, mwanki ba musa bonso bu batiidi.

26 Bu bedi kwe nati Yesu, babwana Simoni, muntu wu mbanza Sileni, wufuma ku mfuba. Bamukwikisa kulunsi, mwanki kenda dye nati ha manima ma Yesu. 27 Ha kati di kamba di bantu dyedi kwe mulandi muba na bakento bedi kwe didi na bedi kwe baabi ha ntulu mu dyambu dyandi. 28 Yesu wubaluka ku babeela na wubateela ti: «Ndumba zi Yelusalemi, ludilandi mu dyambu dyani ko, kansi dileeno mu yeno bende na baala beno! 29 Kadi bilumbu bina kwiza bantu mbo bata ti: "Kyese ku bakento ba bisita, balembolo teka buta na balembolo teka nwika baala mabene!" 30 Mbo bata ku milandu ti: "Tubwidileeno" na ku matenta ti: "Tufukeeno!" 31 Bamana sa bobo ku muti wumamba, bwedi baasa ku muti wuyuma e?»

32 Banata mpe bimpumbulu byole bi babakala, mu bahondila ha kimosi na Yesu. 33 Bu batula ha kifulu ki nkumbu «Kikonzongolo ki mutu», zimbulu-mbulu zikoma Yesu na bimpumbulu bya bibyole, wumosi ku lubakala na wuhiika ku lumoso. 34 [Buna Yesu wuta ti: «Tata, wubayambudila, kabazebi ma banahidika ko.»] Zimbulu-mbulu zita hwadi mu kabana binkutu byandi. 35 Mukangu wuba wutelama hoho na wedi talanga. Bamfumu ba Bayudayo bedi museha muta ti: «Wuvuukisa bahiika, bwabu ka kivuukisa yandi bende, tala ti yandi ni Klisto, Nzambi wukasoodidi!» 36 Mbulu-mbulu mpe zedi mu seha, na ziyiza ha ntadisi andi mu muhaana vinu dinsa, 37 ni zita ti: «Tala ti ngeye ni ntinu yi Bayudayo, wukivuukisa ngebende!» 38 Ha yulu kulunsi dyandi, basonika ti: «Yundu bewuwu ni ntinu yi Bayudayo.»

39 Wumosi mu bimpumbulu bi bakoma ha kulunsi wedi mulehola, ebu: «Kambi ngeye ni Klisto e? Wukivuukisa ngebende na yeto mpe!» 40 Kansi munandi wumusemba mu muteela ti: «Ngeye beki kitumbu kimosi nandi, wuna bunkuta bu Nzambi ko e?» 41 Mu yeto kitumbu bekiki kifwana kidi, mu dyambu ti yeto tubeki musendo wu mavanga meto, kadi yandi kasiidi kani musamu wumbi ko. 42 Na wuteela Yesu ti: «Yesu, mbambukila moyo bu waakota mu kimfumu kyaku.» 43 Yesu wumuvutudila ti: «Kedika nina kuteela: bubedidi, waaba nani mu paladiso*.»

44 Ntangu ambata bu yedi fwana, tombe kiyiza bwa mu nsi yimvimba natee mu kilokola kitatu kumanima ma ntangu ambata, 45 ntangu mpe yizimbala. Mulele wu bamanika ha nkotolo yi kihinga kilongo wukakuka ha kati-kati kutonina ku yulu natee ku nsi. 46 Yesu wulookana mu ngolo ti: «Tata, ha moko maku mvutudi mwela ani.» Bu kamana ta bobo, ni kafwa. 47 Mfumu yi zimbulu-mbulu nkama, bu kayena misamu bemyomyo mihilama, wukembila Nzambi na wuta ti: «Kedika, muntu bewuwu muntu wulunungu kabedi.» 48 Kamba di bantu dikutakana mu tala, bu bayena misamu myedi hyoka, bedi kwe baabi ha ntulu mu kyadi, bu bedi kwe vutuki. 49 Bakundi bandi bamvimba, na bakento bedi kwe mulandingi kutonina ku mbanza yi Ngalili, batelama kitatu mu tala myo myedi hyoka.

50 Bakala dimosi diba mu kabu di bakuluntu di Bayudayo, nkumbu andi Yosefi, wuba muntu wumbote mpe wulunungu(wusungama, wuludedomo), 51 katambula nzengolo yi bonga bahiika ko, wuba mwisi-Alimate mbanza yi Bayudayo, na wedi kingilanga nyizulu yi Kimfumu ki Nzambi. 52 Wuyenda yenikina Pilatu na wumulomba nitu yi Yesu. 53 Wuyenda kulumuna yo ha kulunsi, wuzinga yo mulele wu lino na wutuula yo mu ndyamu yitobolo mu mulandu wu matadi, yilembolo teka dyamusu mvumbi. 54 Kiba kilumbu kimitanu, mpe saba buna yesaka tona. 55 Bakento bedi kwe mulandingi tuka ku Ngalili, bayenda ku ndyamu na batala bwedi batudila nitu. 56 Mboki bavutuka mu kwe kubika mananasi na mafuta mamfuku yimbote. Bavunda mu kilumbu ki saba, bonso bubela Misiku myawu.