1 Kilumbu kimosi, Yesu wuba ha kumu di dyanga di Ngenezaleti, mpumbu yi bantu yiyiza fyetakana ha kaba mu yuwa mambu ma Nzambi. 2 Wuyena ha kumu di dyanga milungu myole mi bilobi, bitotoka mu sukula mpwasa zawu. 3 Wukota mu mulungu wumosi wuba wu Simoni, na wulomba baba mwa kitatu na kumu. Mboki wuzakala mu mulungu na wutona mu longa mpumbu yi bantu.

4 Bu kamanisa mu zonza, wuteela Simoni: «Yenda ha mamba maa sunda mboki loosa mpwasa mu loba.» 5 Simoni wumuvutudila ti: «Mulongisi, mpimpa yimvimba tu lobidi, tubeki kaani kima ko. Kansi mu luzolo lwaku, nina loosa zimpwasa.» 6 Bu balosa zo, babaka mbizi zizingi na zimpwasa zitona mu kaakuka. 7 Balabikisa banawu baba mu mulungu wuhiika biza ba babakisa. Bu bayiza, batebola milungu mya mimyole, na mitona mu dyama. 8 Bu kayena bobo, Simoni Petelo wufukama ha ntadisi yi Yesu na wumuteela ti: «Mfumu, ntatukila, mu dyambu ti meno nkwa masumu nidi!» 9 Bamvimba baba nandi kintwadi, bayena bunkuta mu dyambu di mbizi zizingi zi babaka. 10 Zaki na Yoane, baala ba Zebedayi baba kintwadi na Simoni bayena mpe bunkuta. Yesu wuteela Simoni ti: «Kuyenandi bunkuta ko, bwabu wuna ba kilobi ki bantu.» 11 Bavutula milungu ha kumu, mboki basala sisa bimvimba na bamulanda.

12 Yesu wuba mu kati di mbanza yimosi, wuyena bakala dimosi diba na bwazi. Bu kayena Yesu, wumufukimina luse ha nsi, na wulomba ebu: «Mfumu, tala ti tiidi, wulendi mvedisa.» 13 Yesu wulambula kooko, wumusimba na wuta ti: «Ntiidi, biika wuvedila.» Mboki bwazi butumbu manisa. 14 Yesu, wumukanikina muta wo ku muntu. Kansi, wumuteela kenda kayenika ku Nganga-nzambi mwanki wumuhaana munkayulu wu mvutululu yi matondo mu mvedosolo aku, bonso busonika Mose. Bwabobo bantu bamvimba baazabila ti nyeki. 15 Kikumu kyandi kivula mwangana dyaka na mpumbu zi bantu zedi kwiza kutakananga mu muyuwa na mu sosa lunyakusu lu bimbevo byawu. 16 Kansi, Yesu wedi basisanga, mu kwenda ku bibuka bilembolo ba bantu mu sambila.

17 Kilumbu kimosi, Yesu wedi longanga. Bafalisi na milongisi mi Misiku baba hoho, bafuma ku mabwala mamvimba ma Ngalili, ma Yuda, na ku Yelusalemi. Lulendo lu Mfumu luba mu Yesu, ni kedi kwe nyakisi zimbevo. 18 Babakala bedi kwe twadi mu kipoyi bakala dimosi diba na kimbevo ki mbolokoto*, basosa bwedi balendi mu kotisila na mu mutuula ha ntadisi yi Yesu. 19 Bu bedi lembolo zaba bwedi mu mukotisila mu dyambu di mpumbu yi bantu, bamaka ku yulu muludi na batobola wo. Ni bamukulumuna mu kipoyi ha mpwakisa beyoyo, ha kati di bantu, ha ntadisi yi Yesu. 20 Bu kayena kiminu kyawu, Yesu wuta ku mbevo ti: «Masumu maku ma lemvokolo.» 21 Milongisi mi Misiku na Bafalisi batona mu nyunguta: Yandi nani kadi, wuna safula* Nzambi? Nani wuhiika lenda lemvokila masumu tala ti ka Nzambi yandi bende ko e? 22 Yesu wuzaba mabanza mawu ni kabateela ti: «Bila nki luna banzila bobo e? 23 Nkye dyambu dilutidi nayakiyaki mu ta ti: "Masumu maku malemvokolo" hoti "Telama na yenda e?" 24 Mwanki luzaba ti: Mwana Muntu wuna lulendo lwe lemvokila masumu ha luse lu butoto» Buna wuteela muntu wuba na mbolokoto ti: «Telama, bonga kipoyi kyaku na vutuka ku nzo aku.» 25 Muntu bewowo ka tumbu telama, ha ntadisi yi bamvimba, wubonga kipoyi kyandi na wuvutuka ku nzo andi na wedi kwe kembidi Nzambi. 26 Bamvimba bayituku na bakembila Nzambi, bayena bunkuta, ni bata ti: «Kilumbu ki bubedidi, misamu mingitukulu tuyeni!»

27 Ku manima, Yesu wuduuka na wuyena mutoti mpaku wumosi, nkumbu andi Levi, wuzakala ha kibuka kyandi ki kisalu. Wumuteela ti: «Ndanda». 28 Levi ni ka sa bwongola bimvimba, wutelama na wumulanda. 29 Levi wumukubikila ndambisa yiyinene ku nzo andi, mitoti mimpaku mimingi na bantu bahiika baba nawu kintwadi ha meza. 30 Bafalisi na milongisi mi Misiku bavunguta na bateela milongoki mi Yesu ti: bila nki luna diila na nwiina ha kimosi na mitoti mimpaku na ba nkwa masumu e? 31 Yesu wubavutudila ti: «Ka bantu ba muhinya ko ba na nsatu yi mumbuki, kansi ni bambevo. 32 Nayizidi mu tumisa bantu balunungu ko, kansi minsumuki.»

33 Bafalisi bamuteela ti: «Ntangu zizingi, milongoki mi Yoane na mi Bafalisi, bakwe minanga nsoki bubwingi mpe bakwe sambilanga, kansi milongoki myaku, kisalu kyawu kudya na kunwa». 34 Yesu wubavutudila ti: «Bwedi lulenda dikila* bakundi ba kikwedi mu dya na mu nwa, mu ntangu yi baakidi nandi kintwadi e? 35 Kansi, mu bilumbu bina kwiza, baabonga kikwedi ha kati dyawu, mbo bamina nsoki mu bilumbu bebyobyo.»

36 Wubateela dyaka kingana eki: «Kunaani muntu lenda kakuna kitende mu kinkutu kimona mu londa kintama, mu dyambu ti kinkutu kimona kyaakyakuka. Mpe kitende kimona kilendi fwanakana na ki ntama ko. 37 Kunani mpe muntu wulenda tuula malamu mansonso mu mitumbu mintama, mu dyambu ti malamu mansonso malenda bula mitumbu, kumanima malamu mamwangana ha nsi mpe mitumbu mya hombila. 38 Kansi, bufweni mu tuula malamu mansonso mu mitumbu mimona. 39 Mpe kunaani muntu, bu kanwini malamu ma mfiku, kabwesa nwa dyaka mansonso, mu dyambu ti mbo kata ti: "Mfiku yivudidi luhu."»