1 Kilumbu kimosi, Mitoti mimpaku na minsumuki bayenda yawu bamvimba ha bela Yesu mu muyuwa. 2 Bafalisi na Milongisi mi Misiku bavunguta, ni bata ti: «Bakala bedidi wuna tambula minsumuki na wuna dya kintwadi nawu!» 3 Kansi Yesu wubateela kingana eki: 4 «Nkye muntu ha kati dyeno wudi na nkama yi mameme, mboki zimbisi dimosi, walembolo sa sisa mameme makumivwa na vwa ko ku nsi yinkatu, mu kwe sosi dimeme bedyodyo di zimbadi natee bu kayena dyo e? 5 Bu kayeni dyo, yangaladi, bongidi dyo na tudidi dyo ha yulu mahembo mandi, 6 mpe bu kavutukidi ku nzo andi, tumisi zinkayi zandi na bantu bakwe banga mu nzo zi bela-bela nandi na wubateedidi ti: "Yangalaleeno ha kimosi nani, mu dyambu ti dimeme dyani di bedi dizimbala dyanyeni!" 7 Ni hahoho mpe, nina luteela ti kyese kyaalutila ku yulu mu dyambu ti munsumuki wumosi wu viludi madyela, kansi ka mu makumi vwa na vwa ko ma bantu bambote balembolo ba na nsatu ye viluka.»

8 «Hoti, nkye mukento wu na mbongo kumi zi bisengo, mboki zimbisi kimosi, waalembolo namisa mwinda mu muswalu na waalembolo kombola nzo na sosa mu bunkete natee bu kaayena mbongo bezozo e? 9 Bu kayeni zo, tumisi zinkayi zandi na bantu bakwe banga mu nzo zi bela-bela nandi, waabateela ti: "Yangalaleeno ha kimosi nani, mu dyambu ti nyeni mbongo zi nazimbisi!" 10 Bwabobo mpe, nina luteela ti kyese kikingi kyaaba ku zimbazi zi Nzambi mu dyambu di munsumuki wumosi wu viludi madyela.»

11 Yesu wuta dyaka ti: «Bakala dimosi diba na baala bole ba babakala. 12 Kilezi wuteela tata andi ti: "Tata, mpana kikunku kyani kimvwilu". Buna tata wukaba mvwilu andi ku baala bandi ya babole. 13 Mwa bilumbu kwandi bihyoka, kilezi wutekisa mvwilu andi, mboki wuyenda ku nsi yiyila. Ku nsi beyoyo wufukisa mvwilu andi mu zinga mu bunsuza. 14 Bu kamana fukisa mvwilu andi yimvimba, malema ma ngolo ma kota mu nsi beyoyo, mpe ni katoona mu kondo bimvimba. 15 Buna wuyenda sonama mu kisalu ku bakala dimosi di nsi beyoyo, wumutuma mu kwe dikidingi zingulu. 16 Yandi wuba na nsatu mu dya bindya byedi dyanga zingulu, kansi kani muntu ka muhaana byo ko. 17 Ni hahoho katona mu yindula na wuta ku nsye mutima andi ti: "Bisadi bimvimba bi tata ani banabindya bibingi na bikwe saadilanga, kansi meno, kukuuku, nina fwa mu nsatu! 18 Nina vutuka ku tata ani mpe mbo namuteela ti: Tata, meno nahodidi masumu ha ntadisi yi Nzambi na ha ntadisi aku, 19 mfwanakani dyaka ko, ti ba ntumisina mwana aku. Mbongila bonso wumosi mu bisadi byaku." 20 Ni kavutuka ku tata andi.»

«Buna wakidi kitatu na nzo, tata andi wu muyenina kyadi kikingi: wunooka mu kwe mu bwana, wumuzingama mu nsingu na wu mufiba.»

21 «Buna mwana wumuteela ti: "Tata, meno nahodidi masumu ha ntadisi yi Nzambi mpe ha ntadisi aku, mfwanakani dyaka ko ti wu ntumisina mwana aku." 22 Kansi tata wuteela bisadi byandi ti: "Seeno muswalu mu mutwadila kinkutu kivudidi kitoma na mulwikeeno kyo, mpe mulwikeeno kimpambula mu mulembo na nsampatu mu malu. 23 Twaaleeno mwana ngombe wuvuluka, mpe hondeeno wo, tudyeeno na tuseeno mukembo. 24 Mu dyambu ti mwana ani bewuwu wubedi wufwa, kansi fulukidi, wubedi wuzimbala, kansi yenikini." Na batona mukembo.»

25 «Mu ntangu beyoyo, mwana wuntete wuba ku mfuba. Bu kavutuka na bu kaba bela-bela na nzo, wuyuwa lusuku lu mikunga na makinu. 26 Wutumisa wumosi mu bisadi byawu mu mufuula nkye musamu kwandi wu ku nzo. 27 Kisadi wumuteela ti: "Mpangi aku vutukidi, tata aku hondidi mwana ngombe wuvuluka, mu dyambu ti vutukidi wu muhinya." 28 Buna mwana wuntete wufwema na wubisa mu kota mu kati di nzo. Tata andi wuduuka mu mubomba. 29 Kansi wuvutula ku tata andi ti: "Mimvu mimingi na ku sadidi mpe nakolamani kani ntumunu aku yimosi ko, mpe wampeeni ka mwa mwana nkombo ko, mwanki na yangalala na zinkayi zani. 30 Kansi mwana aku ewu bu kavutukidi, yandi wumeni fukisa mwvilu aku yimvimba mu bansuza, wumuhondidi mwana ngombe wuvuluka!"» 31 Tata wumuteela ti: «Mwana ani, ngeye ntangu zimvimba kwe banga nani, mpe mvwilu ani yimvimba, yi yaku yidi. 32 Kansi bumbote budi mu sa mukembo na mu yangalala, mu dyambu ti kilezi kyaku eki beedi wufwa, kansi fulukidi, beedi wuzimbala, kansi yenekini!»