1 Yesu wubateela kingana kimosi mu balonka ti bafweti sambilanga ntangu ka ntangu, kondo kwe lebakana. 2 Teedi ti: «Kuba na mumfundisi wumosi mu kati di mbanza yimosi, kedi yenanga Nzambi bunkuta ko na kedi vuminanga bantu ko. 3 Mpe kuba mu kati di mbanza beyoyo foola dimosi dyedi kwizanga ku yandi mu muteela ti: "Nzengila musamu bewuwu na mutantu ani." 4 Ntangu zimvimba wedi bisanga kwandi. Ku manima, teedi ku nsye mutima andi ti: mpeleko na yenanga Nzambi bunkuta ko mpe na vuminanga bantu ko, 5 kansi, mu dyambu ti foola bedidi dina mana nkwamisanga, nfweti muzengila musamu andi mwanki kambiika mu mana nkwamisanga ntangu zimvimba.» 6 Mfumu wuta dyaka ti: «Dimbeeno mina ta mumfundisi wulembolo ba na lunungu! 7 Nzambi kalendi nungisa bantu bandi ba kasoola ko, bakwe mu yawudilanga mpimpa na mwini e? Nganunu waabakingisa e? 8 Meno nina luteela ti, waabanungisa mu nswalu. Kansi, mu ntangu Mwana Muntu yi kaavutuka, waakwiza bwana bana kiminu ha nza e?»

9 Yesu wuta kingana eki ku yobobo bakwe kiyenikisanga ti bantu balunungu badi na bakwe yinanga bahiika: 10 «Babakala bole bayenda ku nzo-Nzambi mu sambila, wumosi wuba mufalisi, wuhiika mutoti mpaku. 11 Mufalisi, kimantelama, wusambila ku nsye mutima andi ebu: "O Nzambi, na ku tondidi mu dyambu ti ni bonso bantu bahiika ko, baa mivi, bambi na zinsuza, bonso mutoti mpaku bewuwu. 12 Nakwe minanga nsoki bilumbu byole mu kisabala mpe nakwe futanga kibuku kyani kikumi-kumi mu bimvimba bi nakwe bakanga." 13 Mutoti mpaku, yandi wuba mwa kitatu, kedi lenda mu sendola meso ku yulu ko. Kansi wedi baaba ha ntulu andi ni kedi ta ti: "Nzambi ani, mfwila nkenda meno munsumuki nidi." 14 Kedika na luteedidi, mutoti mpaku wuvutuka ku nzo andi wuyambudulu, kansi ka mufalisi ko. Mu dyambu ti wonso waakizangula, baamukulula na wonso waakikulula, baamuzangula.»

15 Bantu banata baala bafyoti ku Yesu mwanki kabasakumuna. Milongoki bu bayena bobo, bababamina. 16 Kansi Yesu wutumisa baala bafyoti na wuta ti: «Bikeeno baala biza ku meno, lubakakidilandi ko mu dyambu ti kimfumu ki Nzambi kifwanakani ku yobobo ba bonso yawu. 17 Kedika na luteedidi, wonso muntu waabisa mu tambula kimfumu ki Nzambi bonso mwana wufyoti, kalendi mwe kota ko.»

18 Mfumu yimosi yifuula Yesu ti: «Mulongisi wumbote, nki namfweti sa mu tambula luzingu lu mimvu ka mimvu e?» 19 Yesu wumuteela ti: «Bila nki wuna ntumisina muntu wumbote e? Kunani muntu wudi wumbote, tala ti ka Nzambi kaka ko. 20 Misiku myazebi: "kusadilandi kinsuza ko, kuhondandi ko, kuyibandi ko, kutandi kimbangi ki luvunu ko, zitisa tata aku na ngudi aku."» 21 Bakala bedyodyo divutula ti: «Tuuka kintwenya kyani, nkwe vuminanga Misiku mimvimba bemyomyo.» 22 Bu kayuwa bobo, Yesu wumuteela ti: «Dyambu dimosi di kusidi: yadika bima byaku bimvimba, kaba byo ku bamiwelo, mbo wubaka kimvwama ku mazulu. Ku manima, yiza, mboki ndanda.» 23 Kansi bakala bedyodyo bu kayuwa bobo, wukota mu kyadi mu dyambu ti wuba na bimvwama bibingi. 24 Yesu bu kayena ti weka mu kyadi, wuta ti: «Mpasi ku bamvwama mu kota mu kimfumu ki Nzambi! 25 Bulutidi nayaki-yaki ku kibulu ki na nkumbu yi samo mu lutila ha mwa bulu di ntumbu, kansi kamvwama ko mu kota mu kimfumu ki Nzambi.» 26 Yobobo bedi muyuwa bata ti: «Nani kwandi lenda baka mpulusu e?» 27 Yesu wuvutula ti: «Mikwe banga mpasi ku bantu, mi mpasi ku Nzambi ko.» 28 Petelo wuta ti: «Bwabu yeto tumeni sisa bimvimba mu kulanda.» 29 Yesu wubateela ti: «Kedika nina luteela, mu dyambu di kimfumu ki Nzambi, kunaani muntu waasisa, nzo andi, mukento andi, mpangi zandi zi babakala, ngudi na tata andi na baala bandi, 30 waalembolo tambula bibingi mu ntangu beyiyi, mpe mu ntangu yina kwiza, luzingu lu mimvu ka mimvu.»

31 Yesu wukutikisa milongoki myandi kumi na myole na wubateela ti: «Yuweno, tuna tomboka ku Yelusalemi. Mimvimba misonama mu mimbikudi mu dyambu di Mwana Muntu, mina kwenda detila. 32 Baamuyekola mu moko ma bantu balembolo ba Bayudayo, baamuseha, baamutuka, baamulobodila mante, 33 baamuzuba bikoti mboki baamuhonda. Mu kilumbu kibitatu waafuluka mu bafwa.» 34 Kansi milongoki mibakula kani dyambu ko. Mbangudulu yi misamu bemyomyo yiba yi mansweki ku yawu, na bazaba ko Yesu nki kedi ta.

35 Yesu wuba bela-bela na mbanza yi Yeliko, Mpofo yimosi yiba yizakala ha ntendo yi nzila yedi sanga mundombila. 36 Bu kayuwa lusuku lu mpumbu yi bantu yedi kwiza, wufuula ti nkye musamu kwandi wukoko e? 37 Bamuteela ti: «Ni Yesu mwisi Nazaleti wuna hyoka.» 38 Ni kalokana ti: «Yesu, Mwana Davidi, wumfwila nkenda!» 39 Bantu bedi kwe tekidi ku mutwala babamina mpofo mwanki kakanga munwa andi, kansi yandi wubulana dyaka mungolo ti: «Mwana Davidi, wumfwila nkenda!» 40 Yesu wutelama na wulomba bamunatina mpofo beyoyo. Bu kaba bela-bela, Yesu wumufuula ti: 41 «Nki tiidi na kuhidikila e?» Wumuvutudila ti: «Mfumu, ntiidi na bwesa yena.» 42 Yesu wumuteela ti: «Bika meso maku mayena dyaka, kiminu kyaku ki kuvuukisi.» 43 Hansi na nsi, wutona mu bwesa yena. Mboki ni kedi kwe yenzi na Yesu buna wuna kwe kembidi Nzambi. Mukangu wumvimba bu wuyena misamu bemyomyo, wutona mu kembila Nzambi.