1 Kilumbu kimosi, Yesu wedi sambila ha kibuka kimosi. Bu kamana sambila, wumosi mu milongoki myandi wumuteela ti: «Mfumu, tulonga bwedi tu lendi sambidilanga, bonso Yoane kalonga ku milongoki myandi.» 2 Yesu wubateela ti: «Bu lwaasambilanga, tangeeno ebu:

"Tata,

bika nkumbu aku yiba yilongo,

bika Kimfumu kyaku kiza!

3 Tuhaana, bindya byeto bi kadi kilumbu.

4 Tulemvokila masumu meto,

bonso yeto mpe, tukwe lemvokilanga bakwe tusanga bubi

na wutukotisandi mu mpukumunu ko."»

5 Mboki, wubateela dyaka ti: «Mboti wumosi muyeno wele tala nkayi andi mu kati-kati dimpimpa mu muteela ti: "Nkayi ani, nsompisa mampa matatu, 6 mu dyambu ti nkayi ani yimosi yi fumini ku nzyetolo yizidi, mpe nina kima kye muhaana ko." 7 Ti nkayi andi mu kati dinzo wukuvutudidi ti: "Biika mu nkwamisa, mwelo wukangama wudi, baala bani na meno bende tu balambalala, ndendi vumbuka dyaka ko mu kuhaana mampa." 8 Meno nina luteela ti, kati kavumbuka ko mu dyambu di kikundi kyawu, kansi, mu dyambu ti watatamana mu mukwamisa, waavumbuka mu muhaana bima bimvimba binandi nsatu. 9 Meno bwabu nina luteela ti: Lombeeno na baaluhaana, soseeno mpe lwaabaka, konkoteeno na baaluzibudila. 10 Ni hahoho, wonso waalomba, waatambula, mboki wonso waasosa waabaka na baazibudila ku yondowo waakonkota. 11 Nkye tata ha kati dyeno, lenda haana nyoka ku mwana andi tala ti wumulombidi mbizi e? 12 Hoti, lenda muhaana nkutu-nkutu tala ti wumulombidi diiki e? 13 Mpeleko yeno nkatika bantu bambi ludi, luzebi muhaana bima bimbote ku baala beno. Bila nki Tata eno wu ku yulu kalendi lembolo haanina Mpeve Yilongo ku bana mu lomba yo!»

14 Kilumbu kimosi, Yesu wedi kuma mpeve yimbi yi kitula muntu wumosi baaba. Mpeve yimbi beyoyo bu yiduuka, baaba di zonza na mpumbu yi bantu yi yituku. 15 Kansi mwa kabu di bantu dita ti: «Mu lulendo lu Belizebuli*, mfumu yi mpeve zimbi, kana kumina mpeve zimbi!» 16 Bantu bahiika mu mutonta, bamulomba ka balonka kidimbu kya fuma ku yulu. 17 Kansi Yesu wuzaba mayindu mawu na wubateela ti: «Tala ti bantu bakintinu kimosi bakabukidi yawu na yawu kimwangani, na zinzo zawu za bwa ha yulu nzo zihiika. 18 Tala ti Satana wuna kinwanisa yandi bende, bwedi kimfumu kyandi kyaatatamana mu zingila e? Mboki yeno luna ta ti mu lulendo lu Belizebuli nina kumina mpeve zimbi. 19 Tala ti meno mu lulendo lu Belizebuli nina kumina zo, bwabu nani wuna haana baala beno lulendo lwe kumina zo e? Ni hahoho baala beno mbo baba mimfundisi myeno. 20 Kansi, tala ti mu lulendo lu Nzambi nina kumina mpeve zimbi, kedika Kimfumu ki Nzambi bwabu ki tudidi ku yeno.

21 Mboti muntu wuna ngolo na binwanunu bifwana, nzo andi na mvwilu andi yimvimba yaaba ku nsye lukengolo. 22 Kansi, tala ti muntu wu muvudidi ngolo wizidi na wumututidi nkuba, waamuzika binwanunu byandi bimvimba bi kakwe silanga kivuvu na mbo kakabula ku banandi bima bimvimba bi kamuzikidi.

23 Wonso lembolo ba nani kintwadi, mbeni ani kadi, mpe yondowo kwe lembolo yonzikanga kintwadi nani, kwe mwangisanga.

24 Tala ti mpeve yimbi yi totokidi mu muntu, yakwe dyengila mu nsi yinkatu mu kwe sosa kibuka ki kaaba. Tala ti kabeki kyo ko, mbo yaa ta ti: "Mbote na vutuka ku nzo ani yi nasisidi." 25 Bu kavutuka, bweni yo yikombolo na yihidiku bumbote. 26 Ni hahoho, kakwe landila mpeve nsambwadi zihiika zi muvudidi bubi, mboki zimvimba zaakwiza kota kintwadi nandi mpe za zakala mu nitu yi muntu bewowo. Ku manima kitezo ki muntu bewowo kyaalutila ku koba na bu kaaba ntete.»

27 Yesu bu kedi zonza misamu bemyomyo, mukento wumosi wuba ha kati di mukangu wuta ti: «Kyese ku mukento wu kubuta na wu kunwika mabene mandi!» 28 Kansi Yesu wumuvutudila ti: «Kyese ku bantu bebobo bakwe yuwanga mambu ma Nzambi na bakwe sadilanga mo!»

29 Mukangu bu wedi yonzama, Yesu wubateela ti: «Mbandu beyiyi, mbandu yimbi yidi, yina sosa kidimbu, kansi ku kidimbu ki kaka kiba bahaana ko, tala ti ka ki Yona kaka ko. 30 Bonso Yona wuba kidimbu ku bisi-Ninive, bwabobo mpe Mwana Muntu kabeela kidimbu ku mbandu beyiyi. 31 Mu kilumbu ki mfundusu, ntinu yi mukento yi kizunga ki Sude yatelama ha ntadisi yi bantu bambandu beyiyi na waabafunda, mu dyambu ti fumini ku zinsi zi sukina butoto mu kwiza yuwa mambu ma ntinu Solomo ma fuluka mu ndwenga. Kansi ha kati dyeto ha na muntu wuvudidi ntinu Solomo! 32 Mu kilumbu ki mfundusu, bantu bambanza yi Ninive baatelama ha kimosi na mbandu beyiyi na waabafunda, mu dyambu ti bisi Ninive bavilula madyela bu bayuwa ndongolo yi Yona. Kansi ha kati dyeto kuu na muntu wuvudidi Yona!

33 Kunani muntu wukwe lemisanga mwinda, na swekidi wo hoti tutidi wo ku nsye kisiku. Kansi kafweti we tentika ha yulu meza, mwanki bantu baakota mu nzo bayena kya. 34 Diisu dyaku ni mwinda wu nitu: tala ti dimbote didi, nitu aku yimvimba yaaba mu kya. Kansi ti dibeela didi, nitu aku yimvimba mpe yaaba mu kati di tombe. 35 Ni hahoho, toma keba kya ki naaku mwanki kilembolo kituka tombe. 36 Tala ti nitu aku yimvimba yi mu kya, mpe kani kinama kimosi ki mu tombe ko, nitu aku yimvimba ya kyenzoka, bonso bukwe ku kyenzolanga mwinda.»

37 Yesu bu kamanisa mu zonza, wumosi mu Bafalisi wumutumisa ku nzo andi mu dya ha kimosi nandi. Yesu wuyenda kota na wuzakala ha meza. 38 Mufalisi wuyituku bwedi Yesu kalembolo sukudila moko mandi teekila ka dya, bonso buba kifu kyawu. 39 Kansi Mfumu wumuteela ti: «Yeno Bafalisi, lukwe sukulanga mbungu na ndonga zeno ku mbazi, kansi ku kati di mitima myeno ku fuluka na mpwila yi bwivi na mbalu. 40 Bizengi bimpamba ludi! Nzambi wuhidika bi ku mbazi ka yandi ko wuhidika bi mu kati e? 41 Kabileeno ntete bamputu bi mu kati, mboki bimvimba byaaba bivedila ku yeno.

42 Kansi kyadi ku yeno Bafalisi! Yeno lukwe haananga kibuku ki kumi-kumi ki bikola bi bonso manzulu, ki bikola bikwe menanga bya bende na ki bikola bi mumpila-mumpila, kansi lukwe zimbakananga lunungu na luzolo lu Nzambi, misamu myamyomyo lufweti sadila, ka mu zimbakana minkaka ko.

43 Kyadi ku yeno Bafalisi! Lukwe tyanga mu zakala ha byandu bintete mu zinzo zi lusambulu zi Bayudayo, na lukwe tyanga bantu benda luheekingi mbote zi buzitu mu *byanzala. 44 Kyadi ku yeno! Ludi bonso zindyamu zikwe lembolo zabakananga, zikwe kwe dyatingi bantu kondo kuzaba!»

45 Wumosi mu milongisi mi Misiku wumuteela ti: «Mulongisi, buteedi bobo, yeto kwandi mpe tukidi!» 46 Yesu wuvutula ti: «Kyadi ku yeno mpe milongisi mi Misiku! Lukwe twikanga bifunda bikizitu ku bantu mu nata, kansi yeno bende lukwe sinsanga mu bye nanguna kani mu mulembo wumosi ko. 47 Kyadi ku yeno! Lukwe tungilanga mimbikudi zindyamu, mpeleko ni matata meno ma bahonda! 48 Zimbangi ludi bu lutambudi mavanga ma matata meno, mu dyambu ti yawu bahonda mimbikudi, mboki yeno lutungidi zindyamu zawu. 49 Ni hahoho Nzambi kazonzila mu ndwenga ti: "Nina batambikila mimbikudi na zintumwa, mbo bahonda ndambu mu kati dyawu na mbo bafyetikisa bahiika." 50 Mwanki bantu ba mbandu beyiyi bafundusu mu dyambu di menga ma mimbikudi ma batengola tuuka mbadukulu yi nza, 51 tuuka menga ma Abeli matengolo natee ku menga ma Zakaliya wu bahonda ha kati-kati di ziku di bakwe yokilanga minkayulu na kibuka kilongo. Ninga, nina luteela, bantu ba mbandu beyiyi bana fundusu mu bamvimba ba bahonda!

52 Kyadi ku yeno milongisi mi Misiku! Kadi yeno lukatudi nsabi yi nzayulu, yeno bende lukwe mwe kotanga ko, kansi luna kakidila nzila ku yobobo baatidi mu kota momo.»

53 Yesu bu katotoka mu nzo beyoyo, milongisi mi Misiku na Bafalisi ba baka mankesi mangolo na bamuvwika byuhu mu misamu mi mumpila-mumpila: 54 basosa mu mubakila kibila mu mpova zedi duuka mu munwa andi!