1 Yesu wuta ku milongoki myandi ti: «Misamu mikwe tesisanga bantu masakuba milendi kondo ko, kansi kyadi ku muntu wukwe tukisanga myo! 2 Bumbote ba mukanga tadi didinene mu nsingu na ba mu loosa mu mubu, nga ka mubwisa mu masumu wumosi mu baala bebaba bafyoti. 3 Kebeno kweno!»

«Tala ti mpangi aku sumukini, musemba. Kamana viluka, mulemvokila.

4 Kamana sumuka nkumbu nsambwadi mu kilumbu kimosi, mpe wizidi kulomba mulemvo mu ta ti: "Ntambudi bubi bwani", mulemvokila.»

5 Zintumwa ziteela Mfumu ti: «Kudisa kiminu kyeto.» 6 Mfumu wuvutula ti: «Ti luna kiminu ki bunene bonso nswanga yi muti wu mutaade, lulenda tuma ku muti wu sikomole ti: "Tumuka, yenda mena mu mubu", na walutumimina.»

7 «Nani ha kati dyeno, wuna mundongo wukwe mu sadilanga mfuba na wukwe mu vungilanga mameme, ti fumini ku mfuba, waamuteela ti: "Sa muswalu mu kwiza zakala ha meza e?" 8 Kaani, mbo ka muteela ti: "Ndambila bindya, sanza binkutu byaku mu nsadila ti bu na manisa mu dya na mu nwa, kumanima mbo wudya na kunwa." 9 Nganunu lenda vutula matondo ku mundongo andi mu kisalu ki ka mutumini e? 10 Bumosi, yeno mpe: bu lumeni sala kisalu ki ba lutumini, teeno ti: "Bisadi bimpamba tudi, kisalu kyeto kwandi tusedi."»

11 Yesu bu kedi kwenda ku Yelusalemi, wuhyokila mu ndilu yikwe kabulanga Samaliya na Ngalili. 12 Ha nkotolo yi bwala bumosi, bantu kumi baba na kimbevo kibwazi bayiza mu bwana na batelama kitatu nandi 13 na bazonza mu ngolo ti: «Yesu, Mulongisi, tufwila nkenda!» 14 Yesu wubayena na wubateela ti: «Yendeeno lukilonka ku zinganga-Nzambi.» Bu bedi kwe yenzi, ni banyaka. 15 Wumosi ha kati dyawu, bu kayena ti nyeki, wuvutuka. Bu kedi kwe vutuki, wedi kwe kembidi Nzambi mu ndinga yi ngolo. 16 Wuyenda fukama luse ha nsi ha malu ma Yesu, mu vutula matondo. Bakala bedyodyo diba mwisi Samaliya. 17 Yesu wuta ti: «Nganunu kumi dimvimba dinyeki ko e? Kansi ba vwa kwedi badi e? 18 Ka muntu ko mu yawu bamvimba benzi mu kwiza vutula matondo ku Nzambi, tala ti ka nzenza beyiyi ko e?» 19 Mboki, Yesu wumuteela ti: «Telama, yenda, kiminu kyaku ki kuvuukisi.»

20 Bafalisi bafuula Yesu ti: «nkye ntangu Kimfumu ki Nzambi kya kwiza e?» Wubavutudila ti: «Kimfumu ki Nzambi kyaakwiza bonso mona meso ko. 21 Baata ko ti: "Taleno, eku kidi!" Hoti "ekuna!" Kedika, Kimfumu ki Nzambi kii ha kati dyeno.»

22 Mboki, wuteela milongoki ti: «Bilumbu byaakwiza bi lwaaba na nsatu ye yena Mwana Muntu, kati mu kilumbu kimosi kwandi, kansi lwaamuyena ko.» 23 Bu baaluteela ti: «Ekuna kadi!» Hoti «eku kadi!» Lwendandi kooko ko, lwendandi kooko mu ntiinu ko. 24 Bonso mpedamu bu yikwe pedamanga ku yulu mu kyenzola ndambu ka ndambu, bwabobo mpe bwaaba kilumbu kyaakwiza Mwana Muntu. 25 Kansi kafweti teka kwamusu bubwingi na fweti nyafunu ku bantu ba mbandu beyiyi. 26 Misamu mihyoka mu ntangu yi Nowa, myamyomyo kwandi mpe myaaba bilumbu byaakwiza Mwana Muntu. 27 Bantu badya, banwa, bakwela, bakwedisa natee kilumbu ki kota Nowa mu nzaza, nyamba yiyinene bu yiyiza, yifuukisa bamvimba. 28 Bonso mu ntangu yi Loti: Bantu badya na banwa, basumba na bayadika, bakuna na batungisa, 29 kansi kilumbu ki duuka Loti mu Sodomo, tiya na fundu-fundu di tiya bifuma ku yulu binoka bonso mvula na bifuukisa bima bimvimba. 30 Bwabobo mpe bwaaba kilumbu kyaayenika Mwana Muntu.

31 «Mu kilumbu bekyokyo, muntu kyekolo ku *luhukulu lu muludi wu nzo andi, waaba na bima byandi mu kati dinzo, ka kakulumuka mu bye bonga, bumosi mpe ku yondowo kyekolo ku mfuba, ka kaavutuka ku nzo andi. 32 Bambukeno moyo mu mukento wu Loti! 33 Wonso muntu tiidi mu vuukisa luzingu lwandi, lwaakahombisa. Kansi yondowo waahombisa luzingu lwandi lwaakavuukisa. 34 Meno nina luteela ti: mu mpimpa beyoyo kwandi bantu bole balambalala mbuka yimosi: wumosi baabonga, wukaka baamusisa. 35 Bakento bole baanika ha kimosi mbutu: wumosi baabonga, wukaka baamusisa. [36 Babakala bole baaba ku mfuba: wumosi baabonga, wukaka baamusisa.»] 37 Milongoki mi muteela ti: «Mfumu, kwedi waahidimina e?» Na wuvutula ti: «Honso ha mvumbi, hahoho haayonzimina nuni zikwe dyanga mvumbi.»