1 Yesu wukota mu mbanza Yeliko na wuhyokila ha kati di mbanza. 2 Kuba na bakala dimosi nkumbu andi Zakayi, wuba mfumu yi mitoti mimpaku na wuba mvwama yiyinene. 3 Wusosa mu yena nani wuba Yesu, kansi mu dyambu di mukangu wu bantu na muteela andi wuba wuwukufi wulembana mu muyena. 4 Ni kanooka ku mutu na wuyenda maka mu muti wu nkumbu sikomole, mwanki kayena Yesu waahyokila hoho. 5 Yesu bu katula ha kibuka bekyokyo, wusendola meso ku yulu na wumuteela ti: «Zakayi, kumuluka mu muswalu, mu dyambu ti bubedidi ku nzo aku na bwila tolo.» 6 Mu kyese, Zakayi wukulumuka mu muswalu mu mubwana. 7 Bantu bu bayena bobo, bamvimba bavunguta na bata ti: «Muntu bewuwu ku nzo yi munsumuki kena kwe bwila tolo!» 8 Zakayi wuba wutelama ha ntadisi yi Mfumu, wumuteela ti: «Mfumu, naahaana ku bamputu kati-kati di mvwilu ani, mpe tala ti nabongidi kima ki muntu mu luvunu, bitezo biya namuvutudila kyo.» 9 Yesu wumuteela ti: «Bubedidi, mpulusu yi kotidi mu nzo beyiyi, mu dyambu ti yandi mpe mwana wu Abalahami wudi. 10 Mu dyambu ti, Mwana Muntu wuyizidi mu sosa na mu vuukisa yobobo baba bazimbala.»

11 Bantu bu bedi muyuwa, Yesu wu bwesa ta dyaka kingana, mu dyambu ti wuba bela-bela na Yelusalemi na bantu bedi banza ti Kimfumu ki Nzambi kyaayenika mu ntangu beyoyo. 12 Ni kabateela ti: «Bakala dimosi diba mukanda di bantu ba zangama diyenda ku nsi yiyila mwanki ba mubyeka ntinu, mboki kavutuka. 13 Tekila kenda, wutumisa kumi di mindongo myandi, na wubahaana ku konso muntu mbongo yi kisengo yimosi yiwola na wubateela ti: "Bangumuneeno zo natee bu naavutuka." 14 Kansi bantu ba nsi andi bedi mu belanga, ni batambika bantu kumanima andi mu kwe ta ti: "Yeto tutiidi ko muntu bewuwu ka tuyaala." 15 Bu bamana mubyeka ntinu, wuvutuka ku nsi andi. Ni katumisa mindongo mi ka sa sisila mbongo, mwanki kazaba ndandu yi ba beki. 16 Wuntete wuyiza na wumuteela ti: "Mfumu, mbongo yi kisengo yiwola yaku yi butidi ndandu yi mbongo zi kisengo kumi ziwola." 17 Buna wumuteela ti: "Bumbote siidi! kisadi kimbote wudi, mu dyambu ti, ngeye bedi wukwikama mu bima bifyoti, na kubyadisi mfumu yi zimbanza kumi." 18 Wunzole wuyiza na wumuteela ti: "Mfumu, mbongo yi kisengo yiwola yaku yi butidi ndandu yi mbongo zi kisengo zitanu ziwola." 19 Wumuteela ti: "Ngeye mpe bumosi na kubyadisi mfumu yi zimbanza zitanu." 20 Wuhiika mpe wuyiza na wumuteela ti: "Mfumu, mbongo yi kisengo yi wola yaku eyi, mpe ya nasweka ku nsye kitende ki mulele. 21 Bunkuta kwe kuyenanga, mu dyambu ti ngeye muntu wumbalu wudi: ngeye kwe bonganga bima bi wulembolo lundisa, mpe kwe yonzikanga bi wulembolo kuna." 22 Mfumu wumuteela ti: "Kisadi kimbi wudi, nina kufundisa mu mpova zaku, ngeye zebi ti meno muntu wumbalu nidi, nkwe bonganga bima bi ndembolo lundisa, mpe nkwe yonzikanga bi ndembolo kuna. 23 Bila nki wulembolo tudila mbongo zani mu nzo yi kiswekolo ki mbongo e? Mu mvutukulu ani za nketi bakila ndandu bu naketi bonga zo." 24 Mboki, wuteela ku yobobo baba hoho ti: "Muzikeeno mbongo yi kisengo yi wola beyoyo yi nandi, mpe haneeno yo ku yondowo wuna mbongo zi kisengo kumi ziwola." 25 Bamuteela ti: "Mfumu, yandi mbongo zi kisengo kumi ziwola zi nandi!" 26 "Kedika nina luteela ti, mbo bahaana ku yondowo tekidi na kima, kansi yondowo lembolo ba na kyo, mbo ba muzika, na kyo kitekidi nandi. 27 Mu mitantu myani, milembolo tya ti nabayaala, bantwadileno haha mpe bazengeeno madinga ha ntadisi ani."»

28 Yesu bu kamana zonza bobo, wenzi ba ku mutwala wu mukangu, mu tomboka ku Yelusalemi. 29 Bu kaba bela-bela na mabwala Betefange na Betani, ku mulandu wu nkumbu Olive, wutekisa milongoki myandi myole. 30 Wubateela ti: «Yendeeno ha bwala buu ku mutwala, bu lwaatuula koko, lwaayena mwana mbuluku wu wukangama ha muti, waka wameki muntu. Nyanguneeno wo, mpe twaleeno wo. 31 Tala ti muntu wulufuudidi: "Bila nki luna nyangunina wo e?" Muteela ti: "Mfumu wuna wo nsatu."»

32 Milongoki miyenda, na miyenda bwana bonso bu bateedila Mfumu. 33 Bu bedi nyangunanga mwana mbuluku, bavwidi wo babafuula ti: «Bila nki luna nyangunina mwana mbuluku bewuwu e?» 34 Babavutudila ti: «Mfumu wuna wo nsatu.» 35 Ni banata wo ku Yesu, batentika binkutu ha yulu mwana mbuluku, mboki bamakisa Yesu ha yulu. 36 Bu kedi kwe hyoki, bantu ni bedi kwe yadi binkutu byawu mu nzila. 37 Bu kaba bela-bela mu kulumuka mulandu wu Olive, mukangu wumvimba wu milongoki, wufuluka mu kyese, na wedi kwe kembidi Nzambi mu ndinga yi ngolo, mu dyambu di bimangu bi bayena. 38 Bedi kwe te ti:

«Bika Nzambi kasakumuna ntinu yina kwiza mu nkumbu yi Mfumu!

Kiyenge ku yulu

mpe nkembo ku Nzambi mu mazulu mahyokidi kuzangama!»

39 Mwa ndambu yi Bafalisi yiba ha kati di mukangu bateela Yesu ti: «Mulongisi teela milongoki myaku mi dingalala.» 40 Wubavutudila ti: «Kedika nina luteela bamana dingama, ni matadi ma bulana!»

41 Yesu bu kaba bela-bela na mbanza yi Yelusalemi, bu kayena yo, wudila mu dyambu di mbanza beyoyo, 42 Wuta ti: «Ha Yelusalemi! Tala ti ngeye mpe wu wuzaba, misamu milenda ku heeka kiyenge mu kilumbu bekiki! Kansi ntangu beyiyi mi miswama ku ngeye! 43 Ku na bilumbu byaakutudila, mitantu myaku myaakwiza kuzunga mu bibaka bi butoto mu kunwanisa, myaakuzungidila na myaakufyetikisa mu ndambu ka ndambu. 44 Myaakumwangisa, ngeye na baala baku ha kati dyaku, mwa sala kani tadi ha yulu tadi nandi ko, mu dyambu ti wubakudi ntangu yi yizidi kubumina Nzambi ko!»

45 Yesu wukota mu nzo-Nzambi na wedi kuma mintekisi, 46 wubateela ti: «Masonama: "Nzo ani yaaba nzo yi lusambulu." Kansi yeno, lukitudi yo kiswamunu ki bimpumbulu!»

47 Yesu wulonga kadi kilumbu mu nzo-Nzambi. Mfumu zinganga-Nzambi, milongisi mi Misiku mpe bakuluntu ba mukangu, basosa bwedi bamuhondisila. 48 Kansi bazaba ko bwedi balendi sa, mu dyambu ti mukangu wumvimba wedi toma mu yuwilanga.