1 Kilumbu kimosi, Yesu bu kedi longanga mukangu mu nzo-Nzambi na bu kedi samunanga musamu wumbote. Mfumu zinganga-Nzambi na minsoniki mi Misiku batuula ha kimosi na bakuluntu, 2 bamufuula ti: «Tuteela, mu lutumu lu nani wuna hidikila misamu bemimi mpe nani wukuheeni lutumu belulu e?» 3 Wubavutudila ti: «Meno mpe kyuhu nina luziika. Mvutudileeno mvutu: 4 nani wutambika Yoane mu botika, Nzambi hoti bantu e?» 5 Banyunguta yawu na yawu na bata ti: ni twaavutula ti «Ku Nzambi», mbo kata ti: «Mu dyambu di nki lulembolo mukwikila e?» 6 Tumana vutula ti: «Ku bantu», mukangu wumvimba waatuwinda matadi, mu dyambu ti mu mabanza mawu, Yoane mumbikudi wuba. 7 Ni hahoho bavutula ti: «Tu zebyeto ko nani wumuhaana luve belolo.» 8 Yesu wuvutula ti: «Meno mpe naaluteela ko mu lutumu lunani nina hiidikila misamu bemimi.»

9 Yesu wuta ku mukangu kingana eki: «Bakala dimosi dikuna mfuba yi miti mi vinu, wuhaana yo ku bisadi bi vinu mwanki bafutilanga yo, mpe wuyenda ntangu yiyingi mu nzyetolo. 10 Ntangu yi nyonzokolo bu yifwana, wutambika kisadi kimosi ku bisadi bimfuba yi vinu mwanki kenda kamubongila kikunku kyandi. Kansi bisadi bimfuba yi vinu batuuta kisadi bekyokyo nkuba na bamuvutula moko na moko. 11 Wubwesa tambika dyaka kisadi kihiika, kansi bamutuuta na bamusafula mpe bamuvutula moko na moko. 12 Wubwesa tambika dyaka wumitatu, bamulwekisa na bamukuma. 13 Mu nga mfuba andi yi miti mi vinu wuta bwabu ti: "Nki nasa e? Mbote na tambika mwana wutomini tya, kampe baamuvumina." 14 Kansi bisadi bi mfuba yi miti mi vinu bu bamuyena, bateelasana yawu na yawu ti: "Taleno wabyadila fwa. Tumuhondeno mwanki tu byadila dyo!" 15 Bamutuba ku mbazi yi mfuba yi miti mi vinu na bamuhonda. Mfumu yi mfuba yi miti mi vinu, nki kasa bwabu e?»

16 «Bu kaakwiza, mbo kahondisa bisadi bebyobyo bi mfuba yi miti mi vinu na mbo kahaana mfuba yo ku bantu bahiika.» Bu bayuwa bobo, ni bata ti: «Bulendi ba ko!» 17 Kansi Yesu wubatala na wuta ti: «Nkye mbangudulu tulendi haana ku masonama bemama:

"Tadi dinyafuna bituungi

dyeka tadi divudidi mfunu"

18 Wonso muntu waabwa ha yulu tadi bedyodyo wa mwangana, dimana bwila muntu, dya mu kosona.»

19 Milongisi mi Misiku na mfumu zinganga-Nzambi basosa mu bwila Yesu mu ntangu beyoyo kwandi, mu dyambu ti bazaba ti kingana bekyokyo mu yawu kalongila kyo, kansi ni bayena bunkuta bu mukangu. 20 Ni batona mu kwe langi Yesu. Bamutambikila minketi myedi yenikanga ha meso ma bantu ti yawu bantu balunungu badi, mwanki bamubakila kibila mu nzonzolo andi na bamuyekola ku luyalu na ku mfumu yi kizunga . 21 Bantu bebobo bamufuula ti: «Mulongisi, tuzebi ti muludedomo kwe zonzilanga na kwe longilanga na wuswasikisanga bantu ko, kansi ngeye kwe longanga nzila yi Nzambi mu kedika. 22 Tuteeleti, nga Misiku myeto mikwe tuhaananga luve mu futa mpaku yi Kayisali hoti kaani e?» 23 Kansi Yesu wubakula ti mutambu bamulebikila ni kabateela ti: 24 «Ndongiseeno mbongo zi kisengo. Kini na nkumbu binani bidi mu mbongo zi kisengo bezizi e?» Bamuvutudila ti: «Bi Kayisali bidi.» 25 Yesu wubateela ti: «Vutuleeno bi Kayisali ku Kayisali, bi Nzambi ku Nzambi.» 26 Balembakana mu mubakila kibila mu mo makedi zonza ha ntadisi yi mukangu. Bapamuka mu mvutu yi kabahaana ni bayiza ba na swii.

27 Mwa kabu di basaduki bayiza ha ntadisi yi Yesu. Yawu bakwe kwikilanga mu mfulukulu yi bafwa ko. Bamufuula ti: 28 «Mulongisi, Mose wutusonikina ebu: "Tala ti bakala dikwela difwidi na lembakani mu buta kani mwana wumosi, mpangi andi yi bakala fweti kwela mukento bewowo mwanki kaahaana nkuna ku mpangi andi yi fwidi." 29 Nsambwadi baba mu kimpangi kyawu. wuntete wukwela na wufwa, kasa buta mwana ko. 30 Wunzole kwedidi mukento bewowo, 31 mboki wumitatu mpe. Bumosi mu mpangi za nsambwadi zimvimba. Bamana fwa, ka musa buta baala ko. 32 Ku manima, mukento mpe wuyiza fwa. 33 Mu kilumbu ki mfulukulu mu bafwa, mukento bewowo wunani waaba e? Mu dyambu ti yawu nsambwadi bamukwela!» 34 Yesu wubavutudila ti: «Babakala na bakento ba nza beyiyi bakwe kwelananga, 35 kansi babakala na bakento baayenika balunga mu fuluka mu bafwa na mu zinga mimvu ka mimvu, bakwe kwelanga ko. 36 Balendi bwesa fwa ko, mu dyambu ti bafwanakani na zimbazi. Baala ba Nzambi badi, mu dyambu ti bafuluka mu bafwa. 37 Mose wakata ti bafwa baafuluka. Wakazonzila mu musamu wu vunda di mwa muti wedi lema mu milaka mitiya, bu katumisina Mfumu "Nzambi yi Abalahami, Nzambi yi Isaaki na Nzambi yi Yakobi." 38 Nzambi yi Nzambi yi bafwa ko, kansi yi bamoyo. Mu dyambu ti ku yandi, bamvimba ba bamoyo.» 39 Mwa kabu di milongisi mi Misiku bavutula ti: «Mulongisi, tomini zonza bumbote.» 40 Balenda dyaka mu muziika byuhu bihiika ko.

41 Yesu wubateela ti: «Bwedi tulendi singisila wo ti Klisto mwana wu Davidi kadi e? 42 Mu dyambu ti Davidi yandi bende wuta mu buuku di mikunga ti:

"Mfumu Nzambi wuta ku Mfumu ani ti:

Yiza zakala ha lweka lu lubakala lwani,

43 Natee bu nasa ti mitantu myaku

miba bitentekolo bi bitambi byaku."

44 Tala ti Davidi wuna mutumisina "Mfumu", bwedi Mesiya kalendi bwesa bela dyaka mu mwana Davidi e?»

45 Mu ntangu mukangu wumvimba wedi muyuwa, Yesu wuta ku milongoki myandi ti: 46 «Kebeno kweno na milongisi mi Misiku! Batiidi mu kwe yungingi mu mazwele mamala. Bakwe tyanga benda bahekingi mbote zi buzitu mu byanzala. Bakwe tyanga mu sola bibuka bintete mu zinzo zi lusambulu zi Bayudayo na bibuka bi buzitu mu minkembo mi zindambisa. 47 Bakwe zyonanga bima bimvimba bi mafoola, na bakwe sanga zinsambulu zizila mu kiyenikisa. Baatambula mfundusu yi hyokidi kitezo.»