1 Mukembo wu mampa ma kiputi kilembolo vimba, wuba kwe tumisinanga ti Pake wuba bela-bela. 2 Mfumu zinganga-Nzambi na milongisi mi Misiku basosa bwedi balendi hondila Yesu, kansi bedi yena mukangu bunkuta.

3 Satana wukota mu Yuda, yondowo wuba kwe tumisinanga ti Isikalyoti, na wuba wumosi mu milongoki kumi na myole 4 Wuyenda mokana na bamfumu ba zinganga-Nzambi mpe na mfumu zi minkengi mi nzo-Nzambi, mu zaba bwedi kalendi bayekodila Yesu. 5 Batoma yangalala, mboki bayuwasana mu muhaana mbongo. 6 Wutambula na wutona mu sosa nkye ntangu yifwanakani yi kalendi bayekodila Yesu, kondo mukangu kazaba.

7 Kilumbu ki mukembo wu mampa ma kiputi kilembolo vimba bu kitula, kilumbu bekyokyo ki bakwe haananga munkayulu we yoka wu mwana dimeme mu dyambu di mukembo wu Pake, 8 Yesu wutambika Petelo na Yoane, wubateela ti: «Yendeeno lukubika bindya bi Pake, mwanki tudyeeno.» 9 Bamufuula ti: «Kwedi tiidi tukubikila byo e?» 10 Wubavutudila ti: «Bu lwaakota mu mbanza, lwaabwabana muntu wuna kwe naati sanga di mamba ha yulu mutu. Mulandeeno natee mu nzo yi kakwe kota, 11 mboki teeleeno mfumu yi nzo ti: "Mulongisi ebu kakuteedidi: Kwedi ku kihinga ki naadila bindya bi Pake na milongoki myani e?" 12 Waalulonka kihinga kikinene kitoma kubuku ku yulu mu nzo beyoyo yi kibanga. Ni mwamomo lwaakubikila bindya bi Pake.» 13 Bayenda, mpe babwana misamu bonso bu kabateedila myo na bakubika bindya bi Pake.

14 Ntangu bu yifwana, Yesu wuzakala ha meza na zintumwa zandi. 15 Wubateela ti: «Tuka ntama, na bedi nkatika na ngunda na luzolo mu dya neeno bindya bebibi bi mukembo wu Pake kintwadi neeno tekila na yena mpasi! 16 Kedika nina luteela, naabwesa dya wo ko natee bu waalunga mu Kimfumu ki Nzambi.» 17 Buna yandi wubonga mbungu, wuvutula matondo na wuta ti: «Bongeno mbungu beyiyi na kabaneeno yo yeno na yeno. 18 Wukedika nina luteela, naabwesa nwa dyaka vinu ko natee Kimfumu ki Nzambi bu kyaakwiza.» 19 Mboki wubonga dimpa, bu kamana vutula matondo, wubukuna dyo na wubahaana dyo, ni kata ti: «Yi ni nitu ani yihaanu mu dyambu dyeno. Sangeeno bobo mu mbambukilanga moyo.» 20 Wusa bumosi mpe na mbungu, bu bamana dya, wuta ti: «Mbungu beyiyi ni luwawanu lumona mu menga mani matengolo mu dyambu dyeno. 21 Kansi taleno: yondowo waanyekola wu kintwadi nani ha meza bemama! 22 Mwana Muntu waafwa, bonso budi nzengolo yi Nzambi. Kansi nkya mpila kyadi ku muntu bewowo waamuyekola!» 23 Yawu na yawu bafulasana mu zaba, nani mu yawu lendi hidika misamu mi mutindu bewowo.

24 Milongoki myedi mi sa mpaka mu zaba nani hyokidi mfunu ha kati dyawu. 25 Yesu wubateela ti: «Mintinu mi zinsi mikwe bayaalanga mu kingolo na yobobo bakwe batumanga batiidi batumusunu ti "Minsa-mbote" 26 Kansi mu yeno ka bu belandi bobo. Mu dyambu ti yondowo hyokidi mfunu ha kati dyeno kaba bonso yondowo vudidi bulezi, mpe yondowo kwe tumanga kaba bonso kisadi. 27 Bwedi luna banza, nani hyokidi mfunu, yondowo wu ha meza hoti yondowo wuna sala e? Ka ni muntu wu ha meza ko e? Meno niidi ha kati dyeno bonso muntu wuna sala. 28 Yeno ni bantu batatamani naani mu zimpasi zani, 29 bonso Tata ani kampanina *Kimfumu, bwabobo mpe meno naaluhaanina kyo: 30 mwanki ludya na lunwa ha meza mu Kimfumu kyani, mpe luzakala ha byandu bi kintinu mu fundisa makanda kumi na mole ma Isaeli.»

31 Yesu wuta ku Simoni Petelo ti: «Simoni, Simoni! Toma yuwa: Satana wundombidi ka kaluningisa bonso bu bakwe yengisilanga mbutu zibele ha kiyengoso. 32 Kansi nakusambididi mwanki kiminu kyaku kilembolo zeza, mpe ngeye bu waavutuka ku meno, syamisa zimpangi zaku.» 33 Petelo wumuteela ti: «Mfumu, meno nkubamani mu kwenda naaku ku boloko mpe mu fwa naku.» 34 Yesu wumuteela ti: «Petelo, nina kuteela ti bubedidi, nsusu ya kikubila ko, ngeye waambisa nkumbu tatu.»

35 Mboki Yesu wubateela dyaka ti: «Bu nalutambika kondo kikebolo ki mbongo, ka nkutu ko, mpe ka nsampatu ko, bwedi, kima ki lukondolo e?» Bavutula ti: «Kani, tukondolo kima ko» 36 Wubateela ti: «Kansi bwabu, wonso wu nakikebolo ki mbongo ka bonga kyo, bumosi mpe ku yondowo wu na nkutu, mboki ku muntu lembolo sabala ka yadika kinkutu kyandi mwanki kasumba sabala dimosi. 37 Kedika nina luteela, mambu bemama masonama mu dyambu dyani mafweti kwenda detila ti: "Bamutanga ha kati di bimpumbulu." Misamu mintadidi mina lunga.» 38 Bamuteela ti: «Mfumu, tala masabala mole.» Wubavutudila ti: «Bulungidi.»

39 Yesu wutotoka na wuyenda ku mulandu wu Olive, bonso buba kifu kyandi. Milongoki myandi mi mulanda. 40 Bu batula ha kibuka bekyokyo, wubateela ti: «Sambileno mwanki lulembolo bwa mu ntontolo.» 41 Mboki wubatatukila na wuyenda mwa hahala, mpe wufukama mu sambila 42 wuta ti: «Tata, tala ti tiidi, ntatudila mbungu beyiyi. Kansi, ka bonso bu ntiidi ko, kansi bonso buu luzolo lwaku.» [43 Ni hahoho, mbazi yimosi yi yulu yi muyenikina mu musyamisa. 44 Bunkuta bungitukulu bu mubaka, wusambila mu kibakala. Mpe kyufuta kyandi ki kituka bonso mabete mamenga medi dada ha nsi.]

45 Bu kamana sambila, wutelama na wuvutuka ku kasisa milongoki myandi, kansi wuyenda babwana ku nsye tolo tu kyadi. 46 Wubateela ti: «Bila nki luna bwila tolo e? Telameeno na sambileno mwanki lu lembolo bwa mu ntontolo.»

47 Kakimanisina mu zonza ko, mpumbu yi bantu yitula. Yuda, wumosi mu milongoki kumi na myole wedi kwe batwadi. Wufinama ha ntadisi yi Yesu mu mufiba. 48 Kansi Yesu wumuteela ti: «Yuda, mu kufiba wizidi yekodila Mwana Muntu e?» 49 Bu bayena misamu myedi hyokanga, yobobo baba nandi kintwadi bamufuula ti: «Mfumu, tulendi nwanina mu sabala e?» 50 Na wumosi mu yawu wukata mundongo wu mfumu nganga-Nzambi na wumuzenga kutu di lubakala. 51 Kansi Yesu wubateela ti: «Bikeno, bulungidi.» Wusimba kutu di muntu bewowo na wumunyakisa. 52 Mboki Yesu wuteela ku zimfumu zinganga-Nzambi, ku mfumu zi minkengi mi nzo-Nzambi na ku bakuluntu bayiza mu kwiza mukanga ti: «Yeno lwizidi na mbele zimvita na bibono, bonso ti kimpumbulu nidi. 53 Bilumbu bimvimba nabedi neeno mu nzo-Nzambi, na lusosidi mu mbwila ko. Kansi bwabu yeka ntangu eno, na yi lulendo lutombe.»

54 Bu bamana mukanga, bamunata, na bamukotisa mu nzo yi mfumu nganga-Nzambi. Petelo wedi kwe balandi mwa kitatu. 55 Balemisa tiya ha kati di mbazi yi lupangu na bazakala. Petelo wuzakala ha kati dyawu. 56 Kisadi kimosi ki mukento wu muyena wuba wuzakala ha ntendo tiya, wumusungimina na wuta ti: «Bakala bedidi yanandi mpe babedi!» 57 Kansi mu bisa kwandi, wuta ebu: «Kani mama, namuzebi ko.» 58 Mwa ntangu fyoti kwa yihyoka, wuhiika wumuyeni na wuta ti: «Ngeye mpe, wudi wumosi ha kati dyawu!» Kansi Petelo wuta ti: «Kani tata, kameno ko.» 59 Ku manima ma kilokola kimosi, wuhiika dyaka wuyiza nyema ti: «Mu nkatika kedika, bakala bedidi mpe yanandi babedi, mu dyambu ti mwisi-Ngalili kadi.» 60 Petelo wuvutula ti: «Nzebi ko bwedi wuna saka ta!» Mu kilokola bekyokyo kwandi kikedi zonza, nsusu yikuba. 61 Mfumu wubangumuka na wusungimina Petelo. Petelo wubambuka moyo mu musamu bewowo Mfumu wu kamuteela ti: «Tekila nsusu yikuba bubedidi, ngeye wambisa nkumbu zitatu.» 62 Wutotoka ku mbazi na wutoma dila mu kyadi kikingi.

63 Babakala bedi kenga Yesu bedi mutukanga na bedi muzubanga bikoti. 64 Bedi mufukanga kini na bedi mufuulanga ti: «Bakula! Nani wukuzubidi e?» 65 Na bedi mutukanga bituku bimpila-mumpila.

66 Bwisi bu bukya, mbuta zi bantu zi Bayudayo, zimfumu zinganga-Nzambi na milongisi mi Misiku bakutakana. Na batwala Yesu ha ntadisi yi kimvuka ki bakuluntu ba Bayudayo. 67 Bamufuula: «Ti ngeye wuu Klisto e? Tuteela wo.» Wuvutula ti: «Namana luteela wo, lwaankwikileno ko, 68 namana luziika kyuhu, lwaamvutudileno mvutu ko. 69 Kansi kutonina ntangu beyiyi, Mwana Muntu waazakala ha kooko ku lubakala lu Nzambi yi lulendo.» 70 Bamvimba bata ti: «Ni ngeye wuu Mwana Nzambi e?» Yandi wubavutudila ti: «Yeno luna ta wo ti ni meno.» 71 Buna bata ti: «Tusidi dyaka na nsatu yi zimbangi ko! Yeto bende tuyudi mu makutu meto misamu mikatotodi ha munwa andi!»